09 Apr 2015, 16:06
ފީފާ ކޮކާ-ކޯލާ ވޯލްޑް ރޭންކިންގައި މިދިޔަ މަހުން މި މަހަށް އަށް ދަރަޖަ ދަށަށް ވެއްޓި، ރާއްޖެއަށް އޭއެފްސީ ސައުތު އޭޝިއާ ސަރަހައްދުގެ އެއް ވަނަ މަގާމު ގެއްލިއްޖެ އެވެ.
މިދިޔަ މަހު ފީފާ ކޮކާ-ކޯލާ ވޯލްޑް ރޭންކިންގެ 133 ވަނައިގައި އޮތުމަށް ފަހު، މި މަހު ރާއްޖެ ވަނީ ތާވަލްގެ 141 ވަނައަށް ވެއްޓިފަ އެވެ. ދުނިޔޭގެ ތާވަލްގައި ފަހަތަށް ޖެހިލުމުން މިދިޔަ މަހުން މި މަހަށް ތާވަލްގައި ދެ ދަރަޖައިގެ ކުރިއެރުމެއް ހޯދި އަފްގާނިސްތާން ވަނީ 135 ޖެހިލައި، ސަރަހައްދީ ގޮތުން އެއް ވަނަ އަނެއްކާ ވެސް ހޯދާފައެވެ. ރާއްޖެ އޮތީ ސަރަހައްދުގެ ދެ ވަނާގަ އެވެ.
ދުނިޔޭގެ ރޭންކިންގައި ރާއްޖެ އަށް ދަރަޖަ ފަހަތަށް ވެއްޓުނަސް، ފީފާ ވޯލްޑް ކަޕް ކޮލިފިކޭޝަންގެ އޭއެފްސީ ސަރަހައްދުން ރާއްޖެ އަދިވެސް ވަނީ ތިން ވަނަ ޕޮޓުގައި ލައްވާލާފަ އެވެ. އެ މުބާރާތުގެ ގުރު ނެގަން ހަމަޖެހިފައި ވަނީ މި މަހުގެ 14 ވަނަ ދުވަހު އެވެ.
މިދިޔަ މަހުގެ ފީފާ ޑޭސްގެ ތެރޭގައި ރާއްޖެ އާއި ތަޖަކިސްތާނު ބައްސަލުކުރި ބައިނަލްއަގްވާމީ ރަހުމަތްތެރިކަމުގެ މެޗުން 2-0 ގެ ނަތީޖާއަކުން ރާއްޖެ ބަލިވެފައި ވާއިރު، ތަޖަކިސްތާނުވެސް ވަނީ މިދިޔަ މަހުން މި މަހަށް ވޯލްޑް ރޭންކިންގައި ދެ ދަރަޖަ ދަށަށް ޖެހިލާފައެވެ. މިހާރު އެ ގައުމު އޮތީ ވޯލްޑް ރޭންކިންގައި 143 ވަނައިގައެވެ.
ސަރަހައްދީ ގައުމުތަކުގެ ތެރެއިން މިދިޔަ މަހުން މި މަހަށް އެންމެ ފާހަގަ ކޮށްލެވޭ ކުރިއެރުމެއް ހޯދާފައި ވަނީ ސަރަހއްދީ ގޮތުން މިދިޔަ މަހު ތާވަލްގެ އެންމެ ފުލުގައި އޮތް ބޫޓާނެވެ. އެ ގައުމު މިދިޔަ މަހުން މި މަހަށް 46 ދަރަޖައިގެ ކުރިއެރުމެއް ހޯދާފައި ވާއިރު، މިޙާރު އެ ގައުމު އޮތީ ތާވަލްގެ 163 ވަނައިގަ އެވެ.
ބޫޓާންގެ އިތުރުން އިންޑިއާ ވެސް ވަނީ މިދިޔަ މަހުން މި މަހަށް ވޯލްޑް ރޭންކިންގައި 26 ދަރަޖައިގެ ބޮޑު ކުރިއެރުމެއް ހޯދާފަ އެވެ. މިދިޔަ މަހު އެ ގައުމު ފީފާ ކޮކާ-ކޯލާ ވޯލްޑް ރޭންކިންގެ 171 ވަނައިގައި އޮތްއިރު، މިހާރު އެ ގައުމު އޮތީ ތާވަލްގެ 147 ވަނައިގަ އެވެ.
ސައުތު އޭޝިއާ ސަރަހައްދުގެ އެހެން ގައުމުތަކަށް ބަލާއިރު، ބަންގްލަދޭޝް އާއި ޕާކިސްތާން، ނޭޕާލް އަދި ސްރީލަންކާވެސް ވަނީ މިދިޔަ މަހުން މި މަހަށް ތާވަލްގައި ދަށަށް ޖެހިލާފައެވެ. އެގޮތުން ބަންގްލަދޭޝް ފަސް ދަރަޖަ ދަށަށް ޖެހިލާފައި ވާއިރު، ސްރީލަންކާ ވަނީ 12 ދަރަޖަ ދަށަށް ޖެހިލާފައެވެ. އަދި ޕާކިސްތާން ދެ ދަރަޖަ ދަށަށް ޖެހިލާފައި ވާއިރު، ނޭޕާލް ދަށަށް ޖެހިފައި ވަނީ އެންމެ ދަރަޖަ އެކެވެ.
އެއާއެކު ފީފާ ކޮކާ-ކޯލާ ވޯލްޑް ރޭންކިންގައި ލަންކާ މިހާރު 186 ވަނައިގައި އޮތްއިރު، ބަންގްލަދޭޝް އޮތީ 167 ގައެވެ. އަދި ޕާކިސްތާން 172 ގައި އޮތްއިރު، ނޭޕާލް މިހާރު އޮތީ ފީފާ ކޮކާ-ކޯލާ ވޯލްޑް ރޭންކިންގެ 181 ގަ އެވެ.