08 Apr 2015, 19:41
މިއަދު އިރު އޮއްސުނު ވަގުތު މަޖީދީ މަގުން ދިޔަ ފުލުހަކަށް ހަމަލާދީ މޫނާއި އަނގަމަތި ޒަޚަމް ކޮށްލައިފިއެވެ.
ފުލުހުން ބުނީ، އެ ހަމަލާދިންކަމަށް ތުހުމަތު ކުރެވޭ މީހާ މިހާރު ހައްޔަރުކޮށްފައިވާ ކަމަށެވެ.
ފުލުހުން ބުނީ، އެ ހާދިސާގައި އަނިޔާ ލިބިފައިވަނީ ވިލިމާލޭ ޕޮލިސް ސްޓޭޝަންގައި މަސައްކަތްކުރާ ޕޮލިސް ސްޓާފް ސާޖަންޓް ޚާލިދު ޢަބްދުﷲއަށް ކަމަށެވެ. އަދި އެ ހަމަލާގައި ޚާލިދު ޢަބްދުﷲގެ މޫނު މައްޗާއި އަނގަމަތި ފަޅައިގެން ދިއުމުގެ އިތުރުން ބޮލުގެ ދެ ތަނެއް ވަރަށް ބޮޑަށް ދުޅަވެފައިވާ ކަމަށާއި، މިހާރު އައިޖީއެމް ހޮސްޕިޓަލުގައި އޭނާއަށް ފަރުވާދެމުން ދާކަމަށެވެ.
ޚާލިދު ޢަބްދުﷲއަށް ހަމަލާދީފައިވަނީ މިއަދު ހަވީރު 6:00 ކަންހާއިރު މަޖީދީ މަގުން މާވެޔޮމަގާ ގުޅުނު ހިސާބުން މާފަންނާ ވީކޮޅަށް ދަތުރުކޮށްފައިދަނިކޮށް އެވަގުތު މަޖިދީމަގުގައި މަޑުކޮށްގެން ހުރި އުމުރުން 40 އަހަރުގެ ދިވެހި ފިރިހެނެއް ކަމަށް ފުލުހުން ބުންޏެވެ.
ފުލުހުން ބުނީ، އެ މައްސަލައިގައި ހައްޔަރުކޮށްފައިވާ މީހާއަކީ، މީގެ ކުރިންވެސް ތަފާތު މައްސަލަތަކުގައި ފުލުހުންގެ ބެލުމުގެ ދަށަށް ގެނެސްފައިވާ މީހެއް ކަމަށެވެ. އެގޮތުން އެމީހާއަކީ ގަސްތުގައި މީހުންގެ މުދަލަށް ގެއްލުން ދިނުމާއި، މާރާމާރީ ހިންގަން ބޭނުންކުރާ ހަތިޔާރު ބޭނުން ކުރުމާއި، އެފަދަ ހަތިޔާރުން ބިރުދެއްކުމުގެ އިތުރުން ފުލުހުންގެ ވާޖިބަށް ހުރަސްއެޅުމުގެ ރެކޯޑް ވެސް އޮތް މީހެއްކަމަށް ފުލުހުން ބުންޏެވެ.
އޭގެ އިތުރުން އޭނާ އަކީ 19 ފަހަރެއްގެ މަތިން ހުއްޓުވައި ބަލައި ފާސްކޮށް 9 ފަހަރު ފުލުހުންގެ ބެލުމުގެ ދަށަށް ގެނެސް 4 މައްސަލައެއްގައި ހައްޔަރުކޮށް 2 މައްސަލައެއްގެ ތަހުގީގު ނިންމައި ދައުވާކުރުމަށް ޕީޖީއަށް ފޮނުވާފައިވާ މީހެއް ކަމަށްވެސް ފުލުހުން ބުންޏެވެ.
ޚާލިދު ޢަބްދުﷲއަށް ހަމަލާދިން މަސައްލަަ ކުއްްވެރިކުރައްވައި ކޮމިޝަނަރ އޮފް ޕޮލިސް ޙުސައިން ވަޙީދު ވިދާޅުވީ، ގާނޫނު ތަންފީޒް ކުރުމުގެ މަސައްކަތުގައި ހަރަކާތްތެރިވާ ފުލުހުންނަށް ހަމަލާދިނުމުގެ ފިނޑި އަމަލެއްގެ ސަބަބުން ގާނޫނު ތަންފީޒްކޮށް ރައްޔިތުންނަށް ރައްކާތެރިކަން ހޯދައި ދިނުމަށް ފުލުހުން ކުރަމުންދާ މަސައްކަތް ހުއްޓުވައި ނުލެވޭނެ ކަމަށެވެ. އަދި، އެމައްސަލަ ތަހުގީގުކޮށް އެޅެންހުރި އެންމެ ހަރުކަށި ފިޔަވަޅު އަޅުއްވާނެ ކަމަށްވެސް ސީޕީ ވިދާޅުވިއެވެ.