08 Apr 2015, 00:01
އައްޑޫ ސިޓީގެ ހުރިހާ މަގެއްގައި ސައިކަލް ދުއްވާއިރު ހެލްމެޓް އެޅުމަށް މަޖުބޫރު ކުރުމަށް ސިޓީ ކައުންސިލުން މިއަދު ފާސްކޮށްފި އެވެ.
ހުރިހާ ކައުންސިލަރުންގެ އިއްތިފާގުން މިއަދު އެގޮތަށް ފާސްކޮށްފައި ވަނީ އައްޑޫގައި ތަކުރާރުކޮށް ނުރައްކާތެރި އެކްސިޑެންޓުތައް ހިނގައި އެތައްބަޔަކު މިދުނިޔެދޫކޮށްދާން ޖެހުމުގެ ހިތާމަވެރި ހާދިސާތަކެއް ހިނގާފައިވާ ދަނޑިވަޅެއްގަ އެވެ.
އައްޑޫ ސިޓީގެ މޭޔަރު އަބްދުﷲ ސޯދިގު (ސޯބެ) މިއަދު 'ސަން' އަށް ވިދާޅުވީ މިއަދު އެގޮތަށް ފާސްކުރިނަމަވެސް އެ ނިންމުމަށް އަމަލުކުރަން ފެށޭނީ އެކަމާ ގުޅޭ ގަވާއިދުހަދައި ގެޒެޓުކުރުމުން ކަމަށެވެ.
ޓްރާންސްޕޯޓު އޮތޯރިޓީއާ ގުޅިގެން އެކަމާގުޅޭ ގަވާއިދު ހެދުމަށްޓަކައި މަޝްވަރާ ކުރަމުން އަންނަ ކަމަށް ވެސް އޭނާ ވިދާޅުވި އެވެ.
ސޯބެ ވިދާޅުވީ ހެލްމެޓް އަޅާ ގޮތަށް ފާސްކޮށްފައި ވަނީ މަގުތަކުގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން އަޅާ ފިޔަވަޅެއްގެ ގޮތުގައި ކަމަށެވެ.