07 Apr 2015, 10:24

ވަރުގަދަ ހަނގުރާމައެއް ހިނގަމުންދާ ޔަމަނުގައި ކިޔަވަން ހުރި ދިވެހި ދަރިވަރަކު، އިންޑިއާގެ އެހީގައި ސަލާމަތްކޮށްގެން ރާއްޖެއަށް ގެނެސްފި އެވެ.

އިންޑިއާގައި ހުންނަ ރާއްޖޭގެ ހައި ކޮމިޝަންގެ ރަސްމީ ޓްވިޓާ އެކައުންޓުން ރޭ ކުރި ޓްވީޓެއްގައި ބުނެފައި ވަނީ ޔަމަނުގައި ހާލުގައި ޖެހިފައި ހުރި ދަރިވަރު އިންޑިއާގެ އެހީގައި ސަލާމަތްކޮށްފައިވާ ކަމަށާއި އިންޑިއާއަށް ޝުކުރު އަދާ ކުރާ ކަމަށެވެ. އަދި އިއްޔެ ކުރި ޓްވީޓެއްގައި ބުނެފައި ވަނީ އެ ދަރިވަރު މިހާރު ރާއްޖެއަށް ދަތުރުކުރަމުން އަންނަ ކަމަށެވެ.

ޔަމަނުގައި ހުރި ދަރިވަރު ސަލާމަތް ކުރީ އެގައުމުގައި ތިބި އިންޑިއާ މީހުން ސަލާމަތް ކުރުމަށް އިންޑިއާއިން މިދިޔަ އާދީއްތަ ދުވަހު ހިންގި އޮޕަރޭޝަނެއްގަ އެވެ. އިންޑިއާގައި ހުންނަވާ ރާއްޖޭގެ ސަފީރު އަހުމަދު މުޙައްމަދާ ހަވާލާދީ އިންޑިއާގެ ދަ ހިންދޫ ނޫހުން އެކަން ވަނީ ކުރިން ރިޕޯޓްކޮށްފަ އެވެ.

ޔަމަނުގައި ހަނގުރާމައާއި ހެދި ހާލުގައި ޖެހިފައި ތިބި މީހުން ސަލާމަތް ކުރުމަށް އިންޑިއާއިން ވަނީ ބޮޑެތި މަސައްކަތްތަކެއް ކޮށްފަ އެވެ. އެގޮތުން އިންޑިއާއިން ވަނީ އިއްޔެއާ ހަމައަށް 1052 މީހުން އެގައުމުން ސަލާމަތްކޮށްފައެވެ.