06 Apr 2015, 10:13
ކްރިކެޓް ބޯޑް އޮފް މޯލްޑިވްސް އިން އިންތިޒާމްކޮށްގެން ކުރިއަށް ގެންދާ އެކްސްއެލް އެނާޖީ ދެވަނަ ޑިވިޝަން ކްރިކެޓް މުބާރާތުގައި، ކުޅުނު ތިންވަނަ މެޗު އެމްއެސް ހެލްޕިންގް ހޭންޑް ސްޕޯޓްސް ކާމިޔާބު ކޮށްފިއެވެ.
އެމްއެސް ސްޕޯޓްސް މުބާރާތުގެ ތިންވަނަ މެޗު ކާމިޔާބު ކުރީ ވޭލިއެންޓް ސްޕޯޓްސް ކްލަބާ ވާދަކޮށް ނުވަ ވިކެޓުންނެވެ. ޓޮސް ދިމާވި ވޭލިއެންޓް ސްޕޯޓްސް ފުރަތަމަ ބެޓް ކުރަން ނިންމި އިރު، 22 އޯވަރުގެ ތެރޭ ހުރިހާ ކުޅުންތެރިން ނުބައިވެގެން އެ ޓީމަށް ހެދިފައި ވަނީ 69 ލަނޑެވެ.
އެ މެޗުގައި ވޭލިއެންޓަށް އެންމެ ގިނަ ލަނޑު ކާމިޔާބު ކޮށްދިނީ ނުބައި ނުވެ 17 ލަނޑު ހެދި އެ ޓީމްގެ އަބްދުﷲ އިޔާދު އެވެ. އަދި އެމްއެސް ސްޕޯޓްސްއިން އެންމެ ރަނގަޅަށް އުކާފައި ވަނީ ހަތަރު އޯވަރު 21 ލަނޑަށް ހަތަރު ވިކެޓު ނެގި އިސްހާގު އީސާ އާއި ފަސް އޯވަރު ހަތަރު ލަނޑަށް 3 ވިކެޓުނެގި ތުސާރު އަދި 11 ލަނޑަށް 2 ވިކެޓުނެގި މުއީޒު އެވެ.
ޖަވާބުގައި ކުޅެން އަރާ އެމްއެސް ސްޕޯޓްސް ވަނީ 6.1 އޯވަރުގެ ތެރޭ އެންމެ ކުޅުންތެރިއެއް ނުބައިވެގެން 70 ލަނޑު ހަދާފައެވެ. އެ ޓީމުގައި އެންމެ ރަނގަޅު ކުޅުމެއް ދެއްކީ ނުބައި ނުވެ 22 ބޯޅައިން 46 ލަނޑު ހެދި އެ ޓީމްގެ ކެޕްޓަން އަޒިޔާން އެވެ. އެމްއެސް ސްޕޯޓްސް އެ މެޗު ކާމިޔާބު ކުރުމުން އެ ޓީމަށް ވަނީ މުބާރާތުގައި މިހާތަނަށް ފަސް ޕޮއިންޓް ލިބިފައެވެ.
މުޅިއަކު ހަތަރު ޓީމް ވާދަކުރާ އެކްސްއެލް އެނަރޖީ ދެވަނަ ޑިވިޝަން ކްރިކެޓް މުބާރަތުގެ ފުރަތަމަ ދެ މެޗު ކާމިޔާބުކޮށް، ސީބީއެލް އާއި މާލެ ސްޕޯޓްސް ކްލަބް ވެސް ވަނީ ކޮންމެ ޓީމެއް މިހާތަނަށް މުބާރާތުގައި ފަސް ޕޮއިންޓް ހޯދާފައެވެ. ކުޅުނު ދެ މެޗުންވެސް ބަލިވި ވޭލިއެންޓް ސްޕޯޓްސްއަށް އަދި މުބާރާތުގައި ޕޮއިންޓެއް ލިބިފައެއް ނުވެ އެވެ.
މާޗް 27 ވަނަ ދުވަހުން އޭޕްރިލް 18 ވަނަ ދުވަހާ ހަމައަށް ކުރިއަށް ގެންދާ އެކްސްއެލް އެނާޖީ ދެވަނަ ޑިވިޝަން ކްރިކެޓް މުބާރާތުގެ ހަތަރުވަނަ މެޗު ކުޅެން ހަމަޖެހިފައި ވަނީ މިމަހުގެ 10 ވަނަ ދުވަހު އެކުވެނި އެއް ނަންބަރު ދަނޑުގަ އެވެ. އެ މެޗުގައި ބައްދަލުކުރަން ހަމަޖެހިފައި ވަނީ ސީބީއެލް އާއި މާލެ ސްޕޯޓްސް ކްލަބެވެ.