06 Apr 2015, 09:47
ފެނަކަ ކޯޕަރޭޝަން އިން ހދ. މަކުނުދުއަށް ދެމުންދާ ކަރަންޓްގެ ތެރެއިން ވިޔަފާރިވެރިންގެ ކަރަންޓް ބިލްތައް ދެ ގުނައަށް ބޮޑުވެއްޖެ ކަމަށް ބުނެ އެ ރަށު ފިހާރަތައް ބަންދުކޮށްފި އެވެ.
މަކުނުދޫގައި 12 ފިހާރަ ހުންނައިރު އެ ހުރިހާ ފިހާރައެއް ވެސް ވަނީ "ކަރަންޓް ބިލް އިންތިހާއަށް ބޮޑުވުމުގެ ސަބަބުން މިއަދު ފިހާރަތައް ބަންދު" ކަމުގެ ނޯޓިސް ހިއްޕާފައެވެ.
މަކުނުދޫ ކައުންސިލް މެމްބަރު މުހައްމަދު ފައިސަލް މިއަދު "ސަން"އަށް ވިދާޅުވީ އެ ރަށުގެ 12 ފިހާރަ ވެސް ކަރަންޓްބިލް ބޮޑު ވެއްޖެކަމަށް ބުނެ ބަންދުކޮށްފައިވާއިރު ކުރިއާ އަޅާބަލާއިރު މިހާރު ފިހާރަތަކުގެ ކަރަންޓް ބިލްތައް ދެ ގުނަ ބޮޑުވެފައިވާ ކަމަށެވެ.
"ކަރަންޓު ބިލް ބޮޑުވެގެން އެބޭފުޅުން ކަންބޮޑުވުން ހުރުމުން ފިހާރަތައް ވަނީ ވަގުތީ ގޮތުން ބަންދުކޮށްފައި، އެބޭފުޅުންގެ ޝުއޫރުތައް ކައުންސިލްގައި ހިއްސަކޮށްލުމަށް އެބޭފުޅުން ދުރުވެ ތިބީ،" ފައިސަލް ވިދާޅުވިއެވެ.
އޭނާ ވިދާޅުވީ ވިޔަފާރިވެރިންނާއި ކައުންސިލްއިން މަޝްވަރާ ކުރަމުންދާ ކަމަށާއި ފިހާރަތައް ހުޅުވާނެ ވަކި ވަގުތެއް ބުނަން ނޭންގޭ ކަމަށެވެ.
ކަރަންޓް ސަބްސިޑިއަށް އައި ބަދަލާއެކު ވިޔަފާރި ކުރާ ފަރާތްތަކުގެ ކަރަންޓް ބިލަށް ސަރުކާރުން ދެމުން އައި ސަބްސިޑީ ކަނޑާލުމާއި ގުޅިގެން ބިލް އެތައް ގުނައަކަށް ބޮޑުވެފައިވާތީ ކުޅުދުއްފުއްޓާއި އައްޑޫގައި އިއްޔެވެސް ވަނީ ވިޔަފާރިވެރިން އިހްތިޖާޖްކޮށްފައެވެ. އަދި ގިނަ ފިހާރަތަކެއް ވަނީ ވަގުތީ ގޮތުން ބަންދުކޮށްފައެވެ.
ފެނަކަ ކޯޕަރޭޝަންގެ ޑިރެކްޓަރު ހުސައިން ހަމީޒު ވިދާޅުވީ މި ސަރުކާރުން ކަރަންޓް ބިލުގެ އަގަށް އެއްވެސް ބަދަލެއް ނުގެންނަ ކަމަށެވެ. މިހާރު ތަންފީޒު ކުރަމުންދާ އުސޫލަކީ ރައީސް ނަޝީދުގެ ސަރުކާރުން ކަނޑައެޅި އަގުތަކެއް ކަމަށާއި އޭރު ފާސްކޮށްފައިވާ އަގުތަކަށް ބިލުނުކޮށް އެކި ރަށްރަށުގައި ތަފާތު އަގުތަކުގައި ދެމުން ދިޔަ ސަބްސިޑީ މިހާރު ހަމަހަމަކޮށްފައިވާ ކަމަށް އޭނާ ވިދާޅުވި އެވެ.