03 Apr 2015, 12:13
ސައުދީ އަރަބިއްޔާގެ މަޝްހޫރު ޓީވީ ޗެނަލް އަލް އަރަބިއްޔާއިން އެ ޗެނަލްގެ ވެބްސައިޓްގައި އާއްމު ކުރި ހަބަރަކީ ސައްހަ ހަބަރަކަށް ވެދާނެއެވެ. އެއީ ސައުދީން އިސްވެ އޮވެ، ޔަމަނުގެ ހޫތީންނާ ދެކޮޅަށް މިހާރު ދެމުން ގެންދާ ވައިގެ ހަމަލާތަކުގެ ހަބަރެކެވެ.
ނަމަވެސް އެޗެނަލްގެ ވެބްސައިޓްގައި މިދިޔަ ހޯމަ ދުވަހު ޝާއިއު ކުރި ފޮޓޯއެއްގެ ފޭކްކަން މިހާރު ވަނީ ފަޅާ އަރާފައެވެ. ހޫތީންނާ ދެކޮޅަށް ދިން ހަމަލާއެއްގެ ނަތީޖާ ކަމަށް ބުނެ އާއްމު ކުރި އެފޮޓޯއަކީ 1991 ވަނަ އަހަރު އެމެރިކާއިން އިރާގާއި ދެކޮޅަށް ކުރި ހަނގުރާމައިގައި ބޮން އަޅައި ހަލާކުކޮށްލާފައިވާ އިރާގު ސިފައިންގެ ވެހިކަލްތަކެއްގެ ފޮޓޯއެއް ކަން ފަޅާ އެރުމުން އަލް އަރަބިއްޔާއަށް ވަރަށް ބޮޑެތި ފާޑުކިއުންތައް ވަނީ އަމާޒުވެފައެވެ.
އެފޮޓޯ އާއްމު ކުރުމަށް ފަހު އަލް އަރަބިއްޔާއިން ބުނެފައި ވަނީ އެއީ "އޮޕަރޭޝަން ޑެސިސިވް ސްޓޯމް"ގެ ނަމުގައި ކުރިއަށް ގެންދާ ހަމަލާތަކުގައި ހަލާކުކޮށްލާފައިވާ ހޫތީންގެ އަސްކަރީ ގާފިލާއެއް ކަމަށެވެ.
ނަމަވެސް އެފޮޓޯއަކީ ފޭކް ފޮޓޯއެއްކަން އެނގުނީ އެމެރިކާގެ ޑިފެންސް ޑިޕާޓްމެންޓުން 1991 ވަނަ އަހަރުގެ މާޗްމަހުގެ ހަތަރުވަނަ ދުވަހު އެފޮޓޯއާއްމުކޮށްފައި ވާތީއެވެ.
ކިއުންތެރިންނަށް އެކަން އެނގުމާއި އެކު ޓްވިޓާގައި އަލް އަރަބިއްޔާއާ ދެކޮޅަށް ފާޑުކިއުމުގެ ވަރުގަދަ ކެމްޕޭނެއް ފެށިއެވެ. އެހިސާބުން އަރަބިއްޔާއިން ވަނީ ވެބްސައިޓުން ފޮޓޯ ނަގާފައެވެ.