01 Apr 2015, 17:40
މަސައްކަތް ކުރާ ސަރަހައްދުގައި އިންފެކްޝަން ކޮންޓްރޯލް ކުޅުމާ ބެހޭ ގޮތުން އައިޖީއެމްއެޗް ހޮސްޕިޓަލާއި އެޑްވާންސް ސްޓެރަލައިޒޭޝަން ޕްރޮޑަކްޝަން އާ ގުޅިގެން ފުރަތަމަ ފަހަރަށް ވޯކްޝޮޕެއް ފަށައިފި އެވެ.
ނަސަންދުރަ ޕެލަސް ހޮޓެލްގައި މިއަދު ފެށި އެ ވޯކްޝޮޕް ދެ ދުވަހަށް ކުރިއަށް ދާނެ ކަމަށް އައިޖީއެމް އެޗް އިން ވަނީ ބުނެފަ އެވެ. އައިޖީއެމްއެޗް އިން ބުނާ ގޮތުގައި އެފަދަ ވޯކްޝޮޕެއް ބޭއްވުމުގެ މައިގަނޑު މަގުސަދަކީ ސިއްހީ ހިދުމަތްތެރީން އިންފެކްޝަން ކޮންޓްރޯލް ކުރުމުގެ ކަންތައްތަކަށް އަހުލުވެރި ކުރުން ކަމަށެވެ.
މާލޭގެ ސިއްހީ ދާއިރާގެ 11 ތަނަކުން ބައިވެރި ކޮށްގެން ކުރިއަށް ގެންދާ އެ ވޯކްޝޮޕް އިތުރު ފަރާތްތަކަށް އަމާޒުކޮށްގެން ކުރިއަށް ގެންދިޔުމަށް ހަމަޖައްސާފައިވާ ކަމަށް އައިޖިއެމްއެޗް އިން ވަނީ ބުނެފައެވެ.
ސިއްހީ ހިދުމަތްދޭ ތަންތަނުން ފެތުރޭ ޖަރާސީމާ މެދު މައުލޫމާތު ދިނުމާއި އަތް ސާފުކޮށް ބެހެއްޓުމުގެ މުހިއްމު ކަމުގެ މައްޗަށް އެ ވޯކްޝޮޕުގައި އަލިއަޅުވާލެވޭނެއެވެ.
މީގެ އިތުރުން ސިއްހީ ހިދުމަތްތެރިންގެ ރައްކާތެރިކަމަށާއި ސާޖަރީތައް ހެދުމުގައި އުފެދޭ ޖަރާސީމުތަކުން ރައްކާތެރިވުމުގެ މައްޗަށްވެސް އެ ވޯކްޝޮޕްގައި އަލިއަޅުވާލާނެ ކަމަށް އައިޖީއެމްއެޗް އިން ބުންޏެވެ.
މިއަދާއި މާދަމާ ކުރިއަށް ގެންދިޔުމަށް ހަމަޖެހިފައިވާ އެ ވޯކްޝޮޕްގައި ކްލާސްތައް ނަގައިދޭނީ އެޑްވާންސް ސްޓެރަލައިޒޭޝަން މެނޭޖަރު އިންފެކްޝަން ޕްރިވެންޝަން ސޮލިއުޝަންސް ޑރ. ވިވެކް އެސް އައްޔާ އެވެ.