01 Apr 2015, 00:20
ސަރުކާރުގެ ސްޕޯޓްސް އެރީނާ ޕްރޮޖެކްޓުގެ ދަށުން ބ. އޭދަފުށީގައި ގާއިމްކުރި ފުޓްސެލް ދަނޑު މިއަދު ރަސްމީކޮށް ހުޅުވައިފި އެވެ.
މިއަދު ހަވީރު އޭދަފުށީގައި ބޭއްވި ހާއްސަ ރަސްމިއްޔާތެއްގައި، އެ ރަށުގައި ގާއިމްކޮށްފައިވާ ފުޓްސެލް ދަނޑު ހުޅުއްވާދެއްވީ ޔޫތު މިނިސްޓަރު މުހައްމަދު މަލީހު ޖަމާލް އެވެ. ދަނޑު ހުޅުވައިދެއްވުމަށް ފަހު، މިނިސްޓަރު މަލީހު ވަނީ އެ ދަނޑު ބ. އޭދަފުށި ކައުންސިލާ ހަވާލު ކޮށްފައެވެ. އޭދަފުށި ކައުންސިލްގެ ފަރާތުން ދަނޑާ ހަވާލުވީ އެރަށު ކައުންސިލްގެ ރައީސް އަލީ ވަހީދު އެވެ.
އެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު މަލީހު ވަނީ އޭދަފުއްޓަކީ ފުޓްބޯޅައިގެ ރޮނގުން އަބަދުވެސް ހުނަރުވެރި ކުޅުންތެރިން އުފައްދާ ރަށެއްކަން ފާހަގަ ކޮށްފަ އެވެ. އަދި ރޭގަނޑު ވެސް ބޭނުން ކުރެވޭނެފަދަ ބައިނަލްއަގްވާމީ ފެންވަރުގެ ދަނޑެއް އެ ރަށުގައި ހުޅުވިގެން ދިޔުމަކީ، އިތުރު ހުނަރުވެރި ކުޅުންތެރިންތަކެއް އުފެއްދޭނެ ކަމެއް ކަމަށް މަލީހު ވަނީ ވިދާޅުވެފަ އެވެ.
"އޭދަފުއްޓަކީ ރާއްޖޭގެ ކުޅިވަރުގައި، ވަކިން ހާއްސަކޮށް އުތުރުގެ އަތޮޅުތަކުގެ ކުޅިވަރުގައި ވަރަށް ފާހަގަ ކޮށްލެވޭ ރަށެއް. އެއީ ފޫތްބޯޅަ އެކަންޏެއް ނޫން، އެއީ ބެޑްމިންޓަނަށް ބެލިކަމުގައި ވިޔަސް، އަދި އެހެން ކުޅިވަރަކަށް ބެލިކަމުގައި ވިޔަސް. އަޅުގަނޑުމެނަށް ލިބޭ ހިންހަމަޖެހުމަކީ މިފަދަ މުހިންމު ރަށެއްގައި، މިފަދަ ވަސީލަތްތައް ގާއިމް ކުރެވިގެން ދިޔުން،" މިނިސްޓަރު ވިދާޅުވި އެވެ.
"އޭދަފުށީގައި ގައުމީ ފެންވަރުގެ އިތުރުން، ބައިނަލްއަގްވާމީ ގެންވަރެއްގ ފުޓްސެލް ކުޅުންތެރިން އުފެދިގެން ދާތަން ދެކުމަކީ އަޅުގަނޑުމެންގެ ހުވަފެނެއް،"
މިނިސްޓަރުގެ ވާހަކަފުޅުގައި، އެ ރަށުގައި ގާއިމްކުރެވުނު ފުޓްސެލް ދަނޑު ގާއިމް ކުރުމަށް، އޭދަފުށި ކައުންިސލާއި އަތޮޅު ކައުންސިލުން ވަަރަށް ފުރިހަމަ އެއްބާރުލުމެއް ލިބިފައި ވާކަން ވަނީ ފާޙަގަ ކޮށްފައެވެ. އަދި ފުޓްސެލް ދަނޑުގެ އިތުރުން، ކުޅިވަރުގެ އިތުރު އިންފްރާސްޓްރަކްޗާތައް އެ ރަށުގައި ގާއިމް ކުރުމަށް ޔޫތު މިނިސްޓްރީން ގިނަ މަސައްކަތްތަކެއް ކުރަމުން ދާކަމަށް ވެސް މިނިސްޓަރު ވަނީ ވިދާޅުވެފައެވެ.
އެ ރަސްމިއްޔާތުގައި ވާހަކަ ދައްކަވަމުން އޭދަފުށީ ކައުންސިލްގެ ރައީސް އަލީ ވަހީދު ވިދާޅުވީ، އެ ރަށުގައި ގާއިމް ކުރެވުނު ފުޓްސެލް ދަނޑަކީ ކުޅިވަރުގެ ދާއިރާއިން އެ ރަށަށް ލިބުނު ވަރަށް ބޮޑު ކުރިއެރުމެއް ކަމަށެވެ. އަދި އެކަމަށްޓަކައި ސަރުކާރަށް ވަރަށް އިހުލާސްތެރިކަމާއެކު ޝުކުރު ދަންނަވާ ކަމަށްވެސް ވަހީދު ވަނީ ވިދާޅުވެފައެވެ.
ބޮޑުބެރުގެ ހަރަކާތްތަކަކާއެކު ކުރިއަށް ގެންދިޔަ ދަނޑު ހުޅުވުމުގެ ރަސްމިއްޔާތުގައި، އެ ދަނޑުގެ މަަސައްކަތް ކުރިއަށް ގެންދިޔަ ލޯން ސްޓާ ކުންފުންޏަށާއި، ދަނޑުގެ މަސައްކަތުގައި އެހީތެރިވެދިން ފެނަކަ ކޯޕަރޭޝަނަށާއި، އޭދަފުށީ ކައުންސިލް އަދި ބ. އަތޮޅު ކައުންސިލަށް ޔޫތު މިނިސްޓްރީން ވަނީ ހަނދާނީ ލިޔުން ދެއްވާފައެވެ.