26 Mar 2015, 21:13
އެމްޑީޕީ 47،000 ރުފިޔާ އިން އަދި އަދާލަތު ޕާޓީ 33،000 ރުފިޔާ އިން ޖޫރިމަނާކޮށް ހަތް ދުވަހުގެ ތެރޭގައި އެ ފައިސާ ދައްކަން އިލެކްޝަންސް ކޮމިޝަނުން އަންގައިފި އެވެ.
އިލެކްޝަންސް ކޮމިޝަނުން މިއަދު ނެރުނު ނޫސްބަޔާނުގައި ވަނީ އެ ދެ ޕާޓީ ޖޫރިމަނާކޮށްފައި ވަނީ މުޒާހަރާތަކުގައި ސިޔާސީ ޕާޓީގެ ގާނޫނާއި، ސުލްހަވެރިކަމާއެކު އެއްވެ އުޅުމުގެ މިނިވަން ކަމުގެ ގާނޫނާ ޚިލާފަށް، ފުލުހުންނަށް ހަމަލާ ދިނުމާއި، އާންމުންގެ މުދަލަށް ގެއްލުން ދިނުމާއި، އަނިޔާވެރި އަމަލުތަކަށް ގޮވައިލުން ފަދަ އަމަލުތައް ހިންގާފައިވާތީ ކަމަށެވެ.
ކުރިއަށް އޮތްތަނުގައި ބާއްވާ މުޒާހަރާތަކުގައި އެފަދަ އަމަލުތައް ތަކުރާރުކުރާނަމަ އެ ދެ ޕާޓީއާ މެދު އަދިވެސް އިތުރު ފިޔަވަޅުތައް އަޅަންޖެހިދާނެ ކަމަށް އެ ބަޔާނުގައި ވެއެވެ.
އެ ދެ ޕާޓީއާ މެދު ފިޔަވަޅު އަޅާފައި ވަނީ މުޒާހަރާތަކުގައި ގާނޫނާ ޚިލާފު އަމަލުތައް ހިންގާނަމަ ފިޔަވަޅު އަޅާނެ ކަމަށް މިއަދު އިންޒާރު ދިނުމަށްފަހު އެވެ.