26 Mar 2015, 10:22
ސަންޢާ (މާވް 26) : ސަޢޫދީ އަރަބިޔާއާއި ގަލްފުގެ ބައެއް އަރަބި ގައުމުތައް ގުޅިގެން ޔަމަންގެ ވެރިރަށް ސަންއާއާއި އެގައުމުގެ އެހެން ބައެއް ސަރަހައްދުތަކަށް ރޭ ދަންވަރުން ފެށިގެން ބޮންއަޅަމުން އެބަގެންދެ އެވެ.
ގަލްފު ކޯޕަރޭޝަން ކައުންސިލްގައި ހިމެނޭ ސައޫދީ އަރަބިޔާ، ގަތަރު، ބަޙްރައިން އަދި ކުވައިތުން ނެރުނު ގުޅިފައިވާ ބަޔާނެއްގައި އެގައުމުތަކުން ޔަމަނަށް ވައިގެ ޙަމަލާތައް ދެމުން ގެންދަނީ ޔަމަންގެ ރައީސް އަބުދުއް ރައްބު މަންސޫރު ހާދީ ގެ އެދިވަޑައިގަތުމަކަށް ކަމަށާއި ހަމަލާތައް އަމާޒު ކުރަމުން ގެންދަނީ ޔަމަންގެ ވެރިކަމަށް އަތްގަދަ ކުރުމަށް މަސައްކަތްކުރާ ޙޫޘީ ޖަމާއަތުގެ ހަނގުރާމަވެރިންނަށާއި ކުރީގެ ރައީސް އަލީ އަބްދުﷲ ސާލިހަށް ތާއީދުކުރާ ފަރާތްތަކުގެ އަމާޒުތަކަަށް ކަމަށް ބުނެފައިވެ އެވެ.
ރިޕޯޓްތައް ބުނާ ގޮތުން ގަލްފުގެ މިފަސް ގައުމުގެ ޙަމަލާތައް އަމާޒުކުރި ތަންތަނުގެ ތެރޭގައި ވެރިރަށް ސަންޢާގެ އިންޓަނޭޝަނަލް އެއާޕޯޓާއި ރިޔާސީ ގަނޑުވަރާއި ޔަމަންގެ ވައިގެ ސިފައިންގެ ބޭސްތަކާއި ހަތިޔާރު ގުދަންތައް ހިމެނެ އެެވެ. ޔަމަންގެ ރައީސް އަބްދު ރައްބު މަންސޫރު ހާދީގެ ކޮންޓްރޯލް އޮންނަނީ އެގައުުމުގެ ދެކުނުގެ ރަށެއްކަމަށްވާ އަދަން ގައެވެ. އިއްޔެގެ ވަގުތެއްގައި އަދަން އަށް ހޫޘީ ހަނގުރާމަވެރިން ވެދެގަތުމާ އެކު އެރަށުގެ ކަންކޮޅުތަކުގައި ރައީސް ހާދީއަށް ތާއީދުކުރާ ފަރާތްތަކާއި ހޫޘީ ހަނގުރާމަވެރިންނާ ދެމެދު ދަނީ ވަރުގަދައަށް ހަނގުރާމަ ހިނގަމުންނެވެ.
ޔަމަންގެ ޚާރިޖީ ވަޒީރު ރިޔާޒް ޔާސީން ވިދާޅުވީ ހޫޘީންގެ އަތްދަށަށް އަދަން އަދި ނުދާ ކަމަށާ އެމީހުންގެ އަތްދަށަށް ޢަދަން ހިނގައްޖެ ނަމަ ދާޚިލީ ވަރުގަދަ ހަނގުރާމައެއްގެ ތެރެއަށް ޔަމަން ވެއްޓިގެންދާނެ ކަމުގަ އެވެ. ޢަދަންގެ ބައެއް އަވަށްތަކަށް ހޫޘީ ހަނގުރާމަވެރިން ވެދެގަތުމާ އެކު އެރަށުގައި ހުންނަ ރިޔާސީ ގަނޑުވަރު ދޫކުރައްވައި ރައީސް ހާދީ ފިއްލަވައި ވަޑައިގެންފައިވާ ކަމަށް ރިޕޯޓްތައް ބުނެ އެވެ.
ރިޔާސީ ގަނޑުވަރު ދޫކުރެއްވުމަށް ފަހު ރައީސް ހާދީ ހުންނެވީ އަދަންގެ ރައްކާތެރި ތަނެއްގައި ކަމަށް ހާދީ އަށް ތާއީދު ކުރައްވާ ޔަމަންގެ މަސްއޫލުވެރިން ވިދާޅުވި އެވެ. (އަލްޖަޒީރާ)