25 Mar 2015, 15:02
ރާއްޖޭގެ އެންމެ ބޮޑު ފުޓްސެލް މުބާރާތް ކަމަށްވާ ކްލަބް މޯލްޑިވްސް ކަޕް 2015 ގެ ދެވަނަ ބުރުން ބީއެމްއެލް އާއި ފެނަކަ، އެސްޓީއޯ އަދި އެމްޕީއެލް ޖާގަ ހޯދައިފި އެވެ.
ކްލަބް މޯލްޑިވްސް ކަޕްގެ ދެވަނަ ބުރުން، ގްރޫޕް 'ބީ'ގައި ހިމެނޭ ބީއެމްއެލް ޖާގަ ހޯދީ ގްރޫޕް ސްޓޭޖުން ދެވަނަ ހޯދާ ޓީމްތަކުގެ ތެރެއިން އެންމެ ނަތީޖާ ރަނގަޅު ޓީމުތަކުގެ ތެރޭގައި ހިމެނިގެންނެވެ. އެ ޓީމު ރޭ ކުޅުނު މެޗުގައި ދިރަގު އަތުން 4-0 ގެ ނަތީޖާއަކުން މޮޅުވެފައި ވާއިރު، އެ ޓީމް ވަނީ ގްރޫޕް ސްޓޭޖުގައި މިހާތަނަށް ހަތް ޕޮއިންޓް ހޯދާފައެވެ.
އެ ގްރޫޕުން އެއްވަނަ ޓީމެއްގެ ގޮތުގައި މުބާރާތުގެ ދެވަނަ ބުރަށް ދަތުރުކޮށްފައި ވަނީ ރޭ ތަފާތުބޮޑު 15-0 ގެ ނަތީޖާއަކުން މިރާ ކްލަބް ބަލިކުރި އެމްޕީއެލް އެވެ. އެ ޓީމަށްވެސް ގްރޫޕް ސްޓޭޖުގައި މިހާތަނަށް ހަތް ޕޮއިންޓް ލިބިފައިވި ނަމަވެސް، ގްރޫޕް 'ބީ' ގެ އެއްވަނައިގައި ބީއެމްއެލް އޮތީ ލަނޑުގެ ތަފާތުންނެވެ.
ކްލަބް މޯލްޑިވްސް ކަޕްގެ ގްރޫޕް 'އޭ'ގައި ރޭ އެމްއެމްއޭ ސޯޝަލް ކްލަބާ ދެކޮޅަށް ކުޅުނު މެޗު 1-1 ގެ ނަތީޖާއަކުން އެއްވަރު ވިނަމަވެސް، ފެނަކަ ޓީމު މުބާރާތުގެ ދެ ވަނަ ބުރަށް ދަތުރުކޮށްފައި ވަނީ ހަތް ޕޮއިންޓާއެކު ގްރޫޕް 'އޭ' ތާވަލްގެ އެއްވަނަ ހޯދައިންނެވެ.
ގްރޫޕް 'އޭ' ގެ ދެވަނައިގައި ރޭ މޯލްޑިވްސް ގޭސްއާ ވާދަކޮށް، 2-0 ގެ ނަތީޖާއަކުން މޮޅުވި ފިއުލް ސަޕްލައި މޯލްޑިވްސް (އެފްއެސްއެމް) އޮތްއިރު، ގްރޫޕް ތަކުގެ ދެވަނަ ހޯދާ ޓީމްތަކުގެ ތެރެއިން އެންމެ ރަނގަޅު ނަތީޖާ ހޯދާ ޓީމެއްގެ ގޮތުގައި މުބާރާތުގެ ދެވަނަ ބުރަށް ދަތުރު ކުރުމުގެ ފުރުސަތު އަދިވެސް އެފްއެސްއެމްއަށް އެބައޮތެވެ.
އެ މުބާރާތުގެ ގްރޫޕް 'ސީ'ގައި ހިމެނޭ އެސްޓިއޯ ދެވަނަ ބުރަށް ދަތުރުކޮށްފައި ވަނީ ރޭ 5-1 ގެ ނަތީޖާއަކުން ގައުމީ ޔުނިވާސިޓީ ބަލިކޮށް، ނުވަ ޕޮއިންޓާއެކު އެ ގްރޫޕްގެ އެއްވަނަ ހޯދައިންނެވެ. އަދި ގްރޫޕް 'ސީ'ގެ ދެވަނައިގައި ހަ ޕޮއިންޓާއެކު އޮތް ސިވިލް ކޯޓަށްވެސް ދެވަނަ ބުރަށް ދިޔުމުގެ ފުރުސަތު އޮތްއިރު، އެ ޓީމް ރޭ ފިނޭންސް ބަލިކުރީ 1-0 ގެ ނަތީޖާއަކުންނެވެ.
ކްލަބް މޯލްޑިވްސް ކަޕްގެ އަންހެން ބައި ކަމަށްވާ 18/30 ވިމެންސް ފުޓްސެލް ފިއެސްޓާގައި، ގްރޫޕް 'އޭ'ގެ އެއްވަނަ ހަ ޕޮއިންޓާއެކު ހޯދާފައި ވަނީ ކްލަބް އިމިގްރޭޝަން އެވެ. އަދި އެ ގްރޫޕްގެ ދެވަނައިގައި ސިފައިންވެސް ހަ ޕޮއިންޓާއެކު އޮތްއިރު، އެ ޓީމް ދެވަނަގައި އޮތީ އިމިގްރޭޝަނަށް ވުރެ ފައިދާ އެއް ލަނޑު މަދު ވުމުންނެވެ.
ވިމެންސް ފުޓްސެލް ފިއެސްޓާގެ ގްރޫޕް 'ބީ'ގެ އެއްވަނަ އޭޑީކޭ ސައިނާޖީ ހަ ޕޮއިންޓާއެކު ހޯދާފައި ޥާއިރު، އެ ގްރޫޕްގެ ދެވަނައިގައި ފެނަކަ ޓީމް އޮތީ ތިން ޕޮއިންޓާއެކު އެވެ. އަދި ގްރޫޕް 'ސީ'ގެ އެއްވަނައިގައި ހަ ޕޮއިންޓާއެކު ޕޮލިސް ދެވަނަ ބުރަށް ދަތުރުކޮށްފައި ޥާއިރު، އެ ގްރޫޕްގެ ދެވަނައިގައި ކްލަބް އެމްއާރްޑީސީ އޮތީ ހަތަރު ޕޮއިންޓާއެކު އެވެ.
ސަރުކާރު އޮފީސްތަކާއި ކުންފުނިތަކަށް ހުޅުވާލައިން ކުރިއަށް ގެންދާ ކްލަބް މޯލްޑިވްސް ކަޕްގެ ގްރޫޕް ސްޓޭޖުގެ އެންމެ ފަހު މެޗުތައް މިރޭ ކުޅެން ހަމަޖެހިފައި ވާއިރު، މާދަމާ ރޭ ކުޅެން ތަވަލް ކުރި މެޗުތައް ވަނީ ގައުމީ ޓީމު ތަޖަކިސްތާނާ ދެކޮޅަށް ކުޅޭ މެޗުގެ ސަބަބުން ފަސްކޮށްފައެވެ.