24 Mar 2015, 15:47
ވޮލީބޯޅަ އެސޯސިއޭޝަނުން އިންތިޒާމްކޮށްގެން ކުރިއަށް ގެންދާ ވީއޭއެމް ޕްރެޒިޑެންޓްސް ކަޕްގައި، ގްރޫޕް އެކަކުން ސެމީފައިނަލްގެ ފަހު ޖާގަ ކްލަބް ތްރީ ސްޓާ ހޯދައިފި އެވެ.
ކްލަބް ތްރީ ސްޓާ މުބާރާތުގެ ސެމީފައިނަލަށް ދަތުރުކުރީ ގްރޫޕް އެކެއްގެ ގްރޫޕް ސްޓޭޖުގެ ފަހު މެޗުގައި، އިއްޔެ ހަވީރު ސްޕޯޓްސް ކްލަބް ހޯކްސްއާ ވާދަކޮށް، ސީދާ ތިން ސެޓުން މެޗު ކާމިޔާބު ކޮށްގެނެވެ. އެ މެޗުގެ ސެޓުތައް ތްރީ ސްޓާ ގެންދިޔައީ ފަސޭހަ ކަމާއެކު 15-25، 10-25 އަދި 4-25 ގެ ނަތީޖާއަކުންނެވެ. އަދި އެ މެޗުގެ މޮޅު ކުޅުންތެރިއަކަށް ހޮވުނީ ތްރީ ސްޓާގެ އައިޝަތު އިމްތިނާން އެވެ.
ގްރޫޕް ސްޓޭޖުގައި ކުޅުނު ތިން މެޗުގެ ތެރެއިން ދެ މެޗު ކާމިޔާބު ކުރި ތުރީ ސްޓާ މުބާރާތުގެ ސެމީއަށް ދަތުރުކޮށްފައި ވަނީ ގްރޫޕް އެކެއްގެ ދެ ވަނަ ޓީމެއްގެ ގޮތުގައެވެ. އެ ގްރޫޕުން އެއްވަނަ ހޯދައިން ސެމީއަށް ދަތުރުކުރި ޕޮލިސް ކްލަބް ވަނީ ގްރޫޕް ސްޓޭޖުގައި ކުޅުނު ތިން މެޗު ވެސް ސީދާ ތިން ސެޓުން ކާމިޔާބު ކޮށްފައެވެ.
މުބާރާތުގެ ގްރޫޕް ދެއަކުން ސްޕޯޓްސް ކްލަބް ގުޑީސް އާއި އަމިކާ ކުޅުނު ފުރަތަމަ ދެ މެޗު ކާމިޔާބުކޮށް، މުބާރާތުގެ ސެމީގެ ޖާގަ ވަނީ ކަށަވަރު ކޮށްފަ އެވެ. އަދި އެ ގްރޫޕްގެ ފަހު މެޗުގައި އިއްޔެ ރޭ އެ ދެ ޓީމް ބައްދަލުކޮށްފައި ވާއިރު، އެ މެޗު ކާމިޔާބުކޮށް، ގުޑީސް ވަނީ ގްރޫޕް ދެއެއްގެ އެއްވަނަ ހޯދާފައެވެ.
ގުޑީސް އާއި އަމިކާ ރޭ ބައްދަލުކުރި މެޗު ގުޑީސް ކާމިޔާބު ކުރީ ސީދާ ތިން ސެޓުންނެވެ. މެޗުގެ ފުރަތަމަ ދެ ސެޓު ފަސޭހަކަމާއެކު 11-25 ގެ ނަތީޖާއަކުން އެ ޓީމް ކާމިޔާބު ކުރިއިރު، ވާދަވެރި ކުޅުމެއް ފެނިގެން ދިޔަ ތިންވަނަ ސެޓު އެ ޓީމަށް ކާމިޔާބު ކުރެވުނީ 22-25 ގެ ނަތީޖާއަކުންނެވެ. އަދި އެ މެޗުގެ މޮޅު ކުޅުންތެރިއަކަށް ހޮވުނީ ގުޑީސްގެ ފާތިމަތު ސަމާ އެވެ.
މުބާރާތުގެ ސެމީފައިނަލް މެޗުތައް މާދަމާ ކުޅެން ހަމަޖެހިފައި ވާއިރު، މާދަމާ ހަވީރު ކުޅޭ ފުރަތަމަ ސެމީގައި ބައްދަލުކުރަން ހަމަޖެހިފައި ވަނީ ގްރޫޕް އެކެއްގެ ދެ ވަނަ، ކްލަބް ތްރީ ސްޓާ އާއި ގްރޫޕް ދޭއްގެ ދެ ވަނަ، އަމިކާ އެވެ. އަދި މާދަމާ ރޭ ކުޅޭ ދެވަނަ ސެމީގައި ބައްދަލުކުރަން ހަމަޖެހިފައި ވަނީ ގްރޫޕް އެކެއްގެ އެއްވަނަ ޕޮލިހާއި ގްރޫޕް ދެއެއްގެ އެއްވަނަ ގުޑީސް އެވެ.