19 Mar 2015, 15:29
ދެހާސް އަށް ވަނަ އަހަރުގެ ރިޔާސީ އިންތިހާބުގައި އެމްޑީޕީއާ ކޯލިޝަން ހެދި އަދާލަތު ޕާޓީ އިން "އަނިޔާވެރިކަމާ ދެކޮޅަށް ދިވެހިން" މިނަމުގައި ނުކުންނަން ނިންމައިފި އެވެ.
ސޯލްޓު ކެފޭގައި މިއަދު މެންދުރު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން އަދާލަތު ޕާޓީގެ ރައީސް ޝެއިހް އިމްރާން ވިދާޅުވީ ރާއްޖޭގައި މިއަދު ހިނގަމުން މިދާ ބޮޑެތި "ޖަރީމާތައް" ހުއްޓުވޭނީ ގައުމީ އެއްބައިވަންތަ ކަމުގެ ގުޅުމެއް އުފައްދައިގެން ކަމަށް އަދާލަތު ޕާޓީގެ މަޝްވަރާ މަޖިލީހުން ނިންމި ނިންމުމަށް ގިނަ ފަރާތްތަކަކުން އިޖާބަ ދީފައިވާ ކަމަށެވެ. އަދި މިއަދު އެފަދަ ގައުމީ އެއްބައިވަންތަ ކަމުގެ ގުޅުމެއް ގާއިމް ކުރެވިފައިވާ ކަމަށް އޭނާ ވިދާޅުވި އެވެ.
"އަޅުގަނޑުމެން މިއަދު ގައުމީ ގުޅުމަށް ދީފައިވާ ނަމަކީ އަނިޔާވެރިކަމާ ދެކޮޅަށް ދިވެހިން މި ނަމުގައި އަޅުގަނޑުމެންގެ މަސައްކަތްތައް އިފްތިތާހު ވެގެން މިދިޔައީ" އިމްރާން ވިދާޅުވި އެވެ.
އޭނާ ވިދާޅުވީ އަނިޔާވެރިކަމާ ދެކޮޅަށް ތިބި ހުރިހާ ދިވެހި ރައްޔިތުން ގުޅުމަށް ދައުވަތު އަރުވާ ކަމަށެވެ.
މި ބައްދަލުވުމުގައި ވާހަކަފުޅު ދައްކަވަމުން އެމްޑީޕީގެ ޗެއާ ޕާސަން އަލީ ވަހީދު ވިދާޅުވީ މިއަދަކީ އަނިޔާވެރިކަމާ ދެކޮޅަށް މަސައްކަތް ކުރާ ހުރިހާ ދިވެހިންނަށް އިތުރު ހަރުފަތްތަކެއް ގިރާ ކުރެވިގެންދާ ދުވަހެއް ކަމަށެވެ.
""މިއަދު މިރާއްޖޭގެ ގައުމީ ހާލަތަށް ވިސްނާލާއިރު ތަފާތު ހިޔާލެއްގައި ގަލަމުގެ ތުނޑު ޖައްސާލާއިރު އެ މީހާ ގެއްލެނީ. ތަފާތު ހިޔާލެއްގައި ދުލުން ބަހެއް ބޭރުކޮށްފި ނަމަ އެ މީހާ މަރުވަނީ. ތަފާތު ހިޔާލެއްގައި އެ މީހާ ޝުއޫރެއް ފާޅުކޮށްފިއްޔާ އެ މީހާ ޖަލު ބަންދަށް ދަނީ. ގޭ ބަންދަށް ދަނީ. ނުވަތަ ކޮންމެވެސް ގޮތަކުން އެ މީހާ ނައްތާލަނީ." އަލީ ވަހީދު ވިދާޅުވި އެވެ.
މި ބައްދަލުވުމުގައި އަލީ ވަހީދު ވަނީ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ ޝަރީއަތް ބޭއިންސާފުން ކުރިއަށް ގެންގޮސް އެމަނިކުފާނަށް 13 އަހަރުގެ ޖަލު ހުކުމެއް އިއްވާފައިވާ ކަމަށް ބުނެ، އެކަން ފާހަގަކޮށް ވާހަކަފުޅުދައްކަވާފައި އެވެ.
އެ ބައްދަލުވުމުގައި ޖުމްހޫރީ ޕާޓީގެ ދެ ނައިބު ލީޑަރުން ކަމަށްވާ އަމީން އިބްރާހިިމްއާ ޑރ. ހުސައިން ރަޝީދު ވެސް ވަނީ ބައިވެރިވަޑައިގެންފައި އެވެ. އެހެންނަމަވެސް އެ ދެ ބޭފުޅުން އެ ބައްދަލުވުމުގައި ބައިވެރިވެވަޑައިގެންފައި ވަނީ ފަރުދީ ގޮތުން ކަމަށް އަމީން ވަނީ ވިދާޅުވެފަ އެވެ.
އަމީން ވިދާޅުވީ ރާއްޖޭގެ ކޮންމެ މީހަކަށް ވެސް ލިބޭ އަނިޔާއަށް ނުކުތުމަކީ ކޮންމެ ދިވެހި ރައްޔިތުންގެ ފަރުދީ ޒިންމާއެއް ކަމަށެވެ. އަދި ރައްޔިތުންނަށް ލިބޭ އަނިޔާއިން އެ ރައްޔިތުން ސަލާމަތް ކުރުމަކީ ވަކި ޕާޓީއެއްގެ ވަކި މީހެއްގެ ޒިންމާއެއް ނޫން ކަމަށް އަމީން ވިދާޅުވި އެވެ.
"އަޅުގަނޑުމެންގެ ވިސްނުމަކީ އެއް ވިސްނުމެއް. އަޅުގަނޑުމެން ރެޕްރެޒެންޓު ކުރަނީ ވަކި ބައެއް ނޫން ވަކި ޖަމާއަތެއް ނޫން. އެއީ އަޅުގަނޑުމެން ގަބޫލު ކުރާ ގޮތުގައި މި ހައްގު ކޯޒްއެއް. އަޅުގަނޑުމެން މިކަމުގައި މަސައްކަތް ކުރަން ޖެހޭ ހައްގު ކަމެއް އެބައޮތް." އަމީން ވިދާޅުވި އެވެ.
އަދާލަތު ޕާޓީއާ ގުޅިގެން މަސައްކަތް ކުރުމުގެ ދައުވަތު ޖޭޕީއަށް ލިބިފައިވާ ކަމަށާއި އެހެންނަމަވެސް އަދި އެކަމަށް ގޮތެއް ނުނިންމަވާ ކަމަށް މި ބައްދަލުވުމުގައި އަމީން ވިދާޅުވި އެވެ.
މިބައްދަލުވުމުގައި ރައީސް ވަހީދުގެ ސަރުކާރުގައި ހިއުމަން ރައިޓްސް އެމްބަސެޑަރު ކަމުގެ މަގާމުގައި ހުންނެވި އަހުމަދު އިބްރާހިމް ދީދީ (ސަންދާން އަހަންމައިދީ) އާ އެމްޑީޕީގެ ޕާލިމަންޓްރީ ގުރޫޕުގެ ލީޑަރު އިބްރާހިމް މުހައްމަދު ސާލިހް ވެސް ބައިވެރިވެވަޑައިގެންނެވި އެވެ.