Last Updated: 1 decade 9 month ago
ޖުމްހޫރީ ޕާޓީ އަދި އެމްޑީޕީ ގުޅިގެން "ގާނޫނުއަސާސީ ގެ ދިފާއުގައި" ކަމަށް ބުނެ ސަރުކާރަށް ކޮށްފައިވާ ޑިމާންޑްތަކަށް ހަފަތާއެއްވާން ކައިރިވުމާއި ގުޅިގެން އެމްޑީޕީން މިރޭ "އިންޒާރުގެ މުޒާހަރާ"ގެ ނަމުގައި ކުރިއަށް ގެންދަނީ ގައިރުގާނޫނީ އެއްވުމެއް ކަމަށް ނިންމައި ފުލުހުން އެ އެއްވުން ހުއްޓުވައިފި އެވެ.
މުޒާހަރާގެ ބައިވެރިން އުސްފަސްގަނޑުން ފެށިގެން ރައްޔިތުންގެ މަޖިލިސް ކުރާ ގެއާ ހަމައަށް އައުމުން ފުލުހުން ވަނީ މުޒާހަރާ ހުއްޓާލުމަށް އިންޒާރު ދީފަ އެވެ.
މިރޭ 9:15 ކަންހާއިރު އުސްފަސްގަނޑު ސަރަހައްދުން ފެށި މުޒާހަރާ ހަމަނުޖެހުންތަކަށް ފަހު ނިންމާލާފައިވަނީ 1:30 ކަންހާއިރު އެވެ.
މުޒާހަރާގައި 26 މީހަކު ފުލުހުންގެ ބެލުމުގެ ދަށަށް ގެންގޮސްފައިވާއިރު އޭގެ ތެރޭގައި ތިން ކުޑަކުދިން ހިމެނޭ ކަމަށް ފުލުހުން ބުނެއެވެ.
ފުލުހުން މިރޭ ހައްޔަރު ކުރި މީހުންގެ ތެރޭގައި އެމްޑީޕީގެ ނައިބު ރައީސް މުހައްމަދު ޝިފާޒު އާއި ކުރީގެ މަޖިލިސް މެމްބަރު އިލްޔާސް ލަބީބް އާއި ލ. ގަމު ދާއިރާގެ މެންބަރު ފައްޔާޒު އިސްމާއިލް ވެސް ހިމެނެއެވެ.
މިރޭގެ މުޒާހަރާ އުސްފަސްގަނޑުން ފެށިއިރު އިސްކޮށް ހުންނެވީ ރައްޔިތުންގެ މަޖިލީހުގެ މެންބަރުން ކަމަށްވާ، އަބްދުﷲ ޝާހިދާއި މާރިޔާ ދީދީ އަދި އިބްރާހީމް މުހައްމަދު ސޯލިހު އާއި އެމްޑިޕީގެ ނައިބް ރައީސް މުހައްމަދު ޝިފާޒު ފަދަ ބޭބޭފުޅުންނެވެ.
މުޒާހަރާގެ ބައިވެރިން މެދުޒިޔާރަތް މަގުން މެދުޒިޔާރަތް ކައިރިއަށް އެއްވި ވަގުތު ފުލުހުން ޖަހާފައި ހުރި ބެރިކޭޑްތައް ހުރަސްކޮށް މުޒާހަރާގެ ބައިވެރިން ވަނީ އެ ސަރަހައްދަށް ވަދެގެންފައެވެ. ނަމަވެސް ކުޑައިރުކޮޅެއްގެ ތެރޭގައި އެސްއޯ ފުލުހުން އައިސް ވަނީ މުޒާހަރާގެ ބައިވެރިން ފަހަތައް ޖައްސާފައެވެ.
މެދުޒިޔާރަތް ސަރަހައްދުން މުޒާހަރާގެ ބައިވެރިން ފަހަތައް ޖެއްސުމުން ގިނަ މީހުން ދެންގޮސްއެއްވީ ޗާނދަނީ މަގު ދިރާގު ލައިޓް ސަރަހައްދަށެވެ. އެސަރަހައްދަށް އެއްވި މީހުން ފުލުހުން ވަނީ ޗާނދަނީ މަގު ހަތަރު އަނގޮޅިއާއި ހަމައަށް ފަހަތައް ޖައްސާފައެވެ.
މިރޭގެ މުޒާހަރާގައި އާންމުންނާއި ފުލުހުންނާއި ދެމެދު ކޮންމެވެސް ވަރެއްގެ ކުރިމަތިލުންތަކެއް ވަނީ ހިނގާފައެވެ. އަދި ރާއްޖޭގެ ދެ މީޑިއާއެއްގެ ދެ ކެމެރާމަނުން ފުލުހުންގެ ބެލުމުގެ ދަށަށް ގެންގޮސްފައިވާއިރު އެ ދެމީހުން ވެސް ދޫކޮށްލާފައިވާ ކަމަށް ފުލުހުން ބުންޏެވެ.
" ފޮޓޯގްރާފަރު ހައްޔަރުކޮށްފައި ވަނީ ފުލުހުންގެ ވާޖިބަށް ހުރަސްއަޅައި ފުލުހުންގެ އަމުރަށް ނުކިމަންތެރިވުމުގެ ސަބަބުން،" ފުލުހުން ބުންޏެވެ.
މުޒާހަރާ މިރޭ 1:30 ކަންހާއިރު ނިމުނީ، މީހުން މަދުވަމުން މަދުވަމުން ގޮސް އެސަރަހައްދުން ގިނަ ބަޔަކު ދިޔުމުންނެވެ.
މުޒާހިރާއާއި ގުޅިގެން މިހާތަނަށް ފުލުހުންގެ ބެލުމުގެ ދަށަށް ގެނެސްފައިވަނީ 26 މީހުން. މިމީހުންގެ ތެރޭގައި 3 ކުޑަކުއްޖަކުވެސް ހިމެނޭ
ސީއެންއެމްގެ ފޮޓޯގްރާފަރު ހައްޔަރުކޮށްފައި ވަނީ ފުލުހުންގެ ވާޖިބަށް ހުރަސްއަޅައި ފުލުހުން އަމުރަށް ނުކިމަންތެރިވުމުގެ ސަބަބުން
މާލޭގެ ބައެއް ސަރަހައްދުގައި މިހާރު ކުރަމުންދާ މުޒާހިރާއަކީ ސުލްޙަވެރި މުޒާހިރާއެއް ކަމުގައި މޯލްޑިވްސް ޕޮލިސް ސަރވިސްއިން ނުދެކެން
މުޒާހަރާގެ ބައިވެރިންގެ ތެރެއިން ފުލުހުންނާ ދިމާލަށް ފުޅިއާއި ގައު ފަދަތަކެތި އުކަމުން އެބަދޭ
މުޒާހިރާގެ ބައިވެރިންގެ ތެރެއިން މޫނު ނިވާކޮށްގެން ތިބި ބަޔަކު އައިސް ސަލާމަތާއި ރައްކާތެރިކަމަށް އެކި ސަރަޙައްދުގައި މަސައްކަތްކުރަމުންދާ ފުލުހުންނަށް މަރުގެ އިންޒާރު ދެމުން އެބަދޭ
"ސަލާމަތީ ގޮތުން ފުލުހުން ކަނޑައަޅާފައިވާ ސަރަޙައްދުގައި ޖަހާފައިވާ ބެރިކޭޑްތައް ކޮށްޕައި ވައްޓާލުމަށްފަހު ވަންނަން މަސައްކަތްކުރަމުންދާނަމަ ވަގުތުން މުޒާހިރާ ރޫޅާލެވޭނެ"