01 Mar 2015, 19:22
މަސްތުވާތަކެތި ބޭނުންކުރާ މީހުންނަށް ފަރުވާދޭ މަރުކަޒުތައް މިހާރަށްވުރެން ޚަރަދުކުޑަ އަދި ހަރުދަނާ ނިޒާމެއްގެދަށުން ހިންގުމަށް ވަޒީރުންގެ މަޖިލީހުން ނިންމައިފިއެވެ.
ވަޒީރުންގެ މަޖިލީހުގައި އެގޮތަށް ނިންމާފައި ވަނީ މިއަދު ބޭއްވި އެ މަޖިލީހުގެ ޖަލްސާއަށް ނޭޝަނަލް ޑްރަގް އެޖެންސީއިން ހުށަހެޅުއްވި ކަރުދާހަކާ ގުޅިގެން، މެމްބަރުން މަޝްވަރާކުރެއްވުމަށްފަހު ކަމަށް ރައީސް އޮފީހުން ބުންޏެވެ.
މިއަދުގެ މަޝްވަރާތަކުގައި، މިހާރުހުރި މަރުކަޒުތަކަށް ދައުލަތުން ކުރަންޖެހޭ ހޭދަ ބޮޑުވުމާއި، މިހާރު އެތަންތަން ހިންގުމުގައި ދިމާވެފައިވާ މައްސަލަތަކާގުޅޭގޮތުން ވަޒީރުންގެ މަޖިލީހުގެ މެންބަރުން މަޝްވަރާ ކުރެއްވިއެވެ.
މީގެއިތުރަށް މިނިސްޓްރީ އޮފް އެންވަޔަރަންމަންޓް އެންޑް އެނަރޖީއިން ހުށަހަޅުއްވާފައިވާ 'ދޯހާ އެމެންޑްމެންޓް' ރާއްޖެއިން ރަސްމީކޮށް ބަލައިގަތުމާ ބެހޭގޮތުންވެސް ވަޒީރުންގެ މަޖިލީހުގައި މަޝްވަރާކުރެވުނެވެ. އަދި، ކިޔޯޓޯ ޕްރޮޓޮކޯލުގެ ދަށުން ގާއިމްކުރެވިފައިވާ 'ދޯހާ އެމެންޑްމެންޓް' ވީ އެންމެ އަވަސް މުއްދަތެއްގެ ތެރޭގައި ރާއްޖެއިން ބަލައިގަތުމަށް ފެނިވަޑައިގަންނަވާކަމަށް ވަޒީރުންގެ މަޖިލީހުގެ މެމްބަރުންގެ އިއްތިފާގުން ނިންމާފައިވާ ކަމަށް ރައީސް އޮފީހުން ބުންޏެވެ.
'ދޯހާ އެމެންޑްމެންޓް' އަކީ، ރާއްޖެއިން ބައިވެރިވެ ތަސްދީގުކޮށްފައިވާ މޫސުމަށް އަންނަ ބަދަލުތަކާބެހޭ ބައިނަލްއަގުވާމީ މުޢާހަދާއެއްކަމުގައިވާ 'ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް' (ޔޫއެންއެފްސީސީސީ) އާއި މި މުޢާހަދާގެ ދަށުން އެކުލަވާލެވިފައިވާ ކްޔޯޓޯ ޕްރޮޓޮކޯލަށް އުނިއިތުރު ގެނައުމުގެ ދެވަނަ މަރުޙަލާ (ސީޕީ2) އެވެ.