01 Mar 2015, 18:44
ކުޅިވަރުގެ ބިލު ރައްޔިތުންގެ މަޖިލީހަށް ހުށަހެޅުމަށްޓަކައި ސަރުކާރުން މިއަދު ފޮނުވައިފިއެވެ.
އެ ބިލަކީ، ރާއްޖޭގެ ކުޅިވަރު ދާއިރާ ތަރައްޤީ ކުރުމަށާއި ކުޅިވަރުގައި ޙަރަކާތްތެރިވާ ފަރާތްތަކާއި ކްލަބް ޖަމްޢިއްޔާތައް ކުރިއެރުވުމަށާއި، ދިވެހިރާއްޖޭގައި ޙަރަކާތްތެރިވާ ކްލަބް، ޖަމްޢިއްޔާތައް ޒަމާނީ ފެންވަރުގައި ހިންގުމަށް އެހީތެރިވެ މަގުފަހިކޮށްދިނުމަށާއި، މޯލްޑިވްސް އޮލިމްޕިކްސް ކޮމިޓީ އާއި ކުޅިވަރު ކައުންސިލް އަދި މޯލްޑިވްސް ނޭޝަނަލް ސްޕޯޓްސް ލިމިޓެޑް ޤާއިމުކޮށް، އެ ތަންތަން ރެގިއުލޭޓްކުރުމުގެ އުޞޫލުތައް ބަޔާންކުރާ ބިލެކެވެ.
އޭގެ އިތުރުން، ސަރުކާރުގެ ކުޅިވަރު މެނިފެސްޓޯގައިވާ އެކިއެކި ކަންތައްތައް ތަންފީޒުކޮށް، މެނިފެސްޓޯގައިވާ ފަދައިން ޤައުމީ އަދި ރަށު ފެންވަރުގައި ވާދަވެރި އަދި އިޖުތިމާޢީ ކުޅިވަރާއި ޘަޤާފީ ޙަރަކާތްތައް ކުރި އަރުވައި، އެންމެންގެ ބައިވެރިވުމުން މުޅި ޤައުމު ތަރައްޤީކުރުމަށާއި އަދި ހުރިހާ އުމުރުފުރާގެ މީހުންގެމެ ޢާންމު ހަޔާތް މުއްސަނދި ކުރުވުމަށް މަގުފަހި ކުރުވުމަށް ބޭނުންވާ އުސޫލުތަކާއި ސިޔާސަތުތައް ވެސް މި ބިލުގައި ކަނޑައަޅާފައިވާނެ އެވެ.