ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ގާނޫނު އަސާސީ އާއި ގާނޫނާ ހިލާފަށް ހިފައި ހައްޔަރު ކުރި މައްސަލާގައި ކުރީގެ ރައީސް މުހައްމަދު ނަޝީދުގެ މައްޗަށް ޓެރަރިޒަމްގެ ދައުވާ އުފުލައި، ނަޝީދު މިއަދު ހައްޔަރުކޮށްފި އެވެ. ނަޝީދު ހައްޔަރުކޮށްގެން ގެންދިޔައީ ދޫނިދު އަށެވެ.

ކްރިމިނަލް ކޯޓުން މިއަދު ނެރުނު އަމުރެއްގައި ބުނީ ނަޝީދު ހައްޔަރު ކުރުމުގެ އަމުރެއް ނެރުނީ، ނަޝީދުގެ މައްޗަށް ކޮށްފައިވާ ޓެރަރިޒަމްގެ ކުށުގެ ދައުވާ އަށް ނަޝީދު "ކޯޓަށް ހާޒިރު ނުވެދާނެ ކަމަށާއި ފިލާފާނެ ކަމަށް ޓަކައި" ކަމަށެވެ. އަދި އެފަދަ އަމުރެއް ނެރެން ޖެހުނީ، ނަޝީދުގެ މައްޗަށް އެ މައްސަލައިގެ ޝަރީއަތް ހުޅުމާލޭ ކޯޓުގައި ހިނގި އިރު، "ކަން ހިނގާފައިވާ ގޮތާއި ފުލުހުންގެ އިންޓަލިޖެންސް ރިޕޯޓަށް"ބެލުމަށް ފަހު ކަމަށެވެ.

ނަޝީދުގެ މައްސަލައިގެ ޝަރީއަތް ހުޅުމާލޭ ކޯޓުގައި ހިނގި އިރު ކަން ހިނގި ގޮތަކީ ކޮބައި ކަމެއް ކޯޓަކުން ނުބުނެ އެވެ. ނަމަވެސް އެ މައްސަލަ ހުޅުމާލޭ ކޯޓުގައި ހިނގި ދުވަސްވަރު ނަޝީދު ވަނީ މާލޭގައި ހުންނަ އިންޑިއަން ހައިކޮމިޝަނަށް ވަދެވަޑައިގެން 11 ދުވަސްވަންދެން "ހިމާޔަތް ހޯއްދަވައިފަ" އެވެ. ނަމަވެސް ނަޝީދަށް ރަސްމީކޮށް ހިމާޔަތް ދެއްވި ކަމަކަށް އިންޑިއަން ހައިކޮމިޝަނަކުން އެއްބަހެއް ނުވެ އެވެ.

މި މަހު ކުރީ ކޮޅު ނަޝީދު އިންޑިއާގެ ނޫހަކަށް ދެއްވި އިންޓިވިއުއެއްގައި ވެސް ވިދާޅުވީ އޭނާގެ އުމުރުން ބޮޑު ބައެއް ޖަލުގައި ހޭދަ ކުރައްވާފައިވާ ކަމަށާއި ދެން އިތުރަށް ޖަލަށް ވެދެވަޑައިގަތުމަށް ބޭނުންފުޅު ނުވާ ކަމަށެވެ. އަދި އާދޭހާ އެކު އޭނާ ސަލާމަތްކޮށްދެއްވުމަށް އިންޑިއާ އިން އެދޭ ކަމަށެވެ.

"... އަޅުގަނޑު އިންޑިއާ މީހުންނަށް އާދޭސް ކުރަން... އަޅުގަނޑު ޖަލަށް ލައިފި ނަމަ އައިސް އަޅުގަނޑު ގެންދޭ. ބެންގަލޫރުގައި އަޅުގަނޑު އުޅޭ ހިތްވޭ،" އިންޑިއާ ޓްޑޭ އަށް ދެއްވި އިންޓަވިއުގައި ނަޝީދު ވިދާޅުވި އެވެ.

ނަޝީދުއާ އެކު ދައުލަތުން މިއަދު ޓެރަރިޒަމްގެ ދައުވާ އުފުލި ބޭފުޅުންގެ ތެރޭގައި އެ މަނިކުފާނުގެ ސަރުކާރުގެ ޑިފެންސް މިނިސްޓަރު ތޮލްހަތު އިބްރާހީމް ކަލޭފާނާއި މިހާރުގެ ޑިފެންސް މިނިސްޓަރު މޭޖާ ޖެނެރަލް ރިޓަޔަޑް މޫސާ އަލީ ޖަލީލާއި ބްރިގޭޑިއާ ޖެނެރަލް ރިޓަޔަޑް އަދި މިހާރު ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެމްބަރު އިބްރާހީމް މުހައްމަދު ދީދީ އާއި ކާނަލް ރިޓަޔާޑު މުހައްމަދު ޒިޔާދު ހިމެނެ އެވެ.

ކުރީގެ ރައީސް ނަޝީދުގެ މައްޗަށް އެ މައްސަލާގައި ފުރަތަމަ ކުރި ދައުވާއަކީ ގާނޫނާ ހިލާފަށް މީހަކު ހިފައި ހައްޔަރުކުރުމުގެ ދައުވާ އެވެ. ހުޅުމާލޭ ކޯޓުގައި އެ މައްސަލަ ހިންގި އިރު ޓެރަރިޒަމްގެ ދައުވާއެއް ނުކުރެ އެވެ. ނަމަވެސް ދައުލަތުން އެ ދައުވާ އަނބުރާގެންދިއުމަށް ފަހު ނަޝީދުގެ މައްޗަށް ޓެރަރިޒަމްގެ ދައުވާ އުފުލައި މައްސަލަ އަލުން ވަނީ ކްރިމިނަލް ކޯޓަށް ވައްދައިފަ އެވެ.

އެ މައްސަލަ ކްރިމިނަލް ކޯޓަށް ހުށަހެޅުމާ އެކު އެ ކޯޓުގެ އިސް ފަނޑިޔާރު އަބްދުﷲ މުހައްމަދު ވަނީ ޗުއްޓީ ނަންގަވައިފަ އެވެ.

ނަޝީދުގެ ވެރިކަމުގައި 2012 ވަނަ އަހަރު ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ހައްޔަރުކޮށް 21 ދުވަސް ވަންދެން އެކަހެރިކޮށް ގެންގުޅުނެވެ. އަދި ބައިނަލްއަގުވާމީ ފަރާތްތަކުން ކޯޓުގެ ފަނޑިޔާރު މިނިވަން ކުރުމަށް އަޑު އުފުލި އެވެ. އޭގެ ތެރޭގައި އދ. އާއި ޔޫރަޕިއަން ޔޫނިއަން ފަދަ ބޭރުގެ ޖަމާއަތްތައް ހިމެނެ އެވެ. އަދި ރާއްޖޭގެ ސުޕްރީމް ކޯޓާއި ހައި ކޯޓާއި ޕްރެސެކިއުޓާ ޖެނެރަލްގެ ފަރާތުން ވެސް އަބްދުﷲ ގާޒީ ވަގުތުން މިނިވަން ކުރުމަށް ގޮވައިލި އެވެ. ނަމަވެސް ނަޝީދު ވިދާޅުވީ އަބްދުﷲ މުހައްމަދަށް، ނަޝީދުގެ ވެރިކަމުގައި ކޯޓާ 100 ފޫޓަށް ވެސް ކައިރި ނުވެވޭނެ ކަމަށެވެ.

ނަޝީދު އިސްތިއުފާ ދެއްވީ އަބްދުﷲ ގާޒީ މިނިވަން ކުރުމަށް ރައްޔިތުންގެ ތެރެއިންބަޔަކު ކެނޑިނޭޅި 21 ރޭ ވަންދެން ކުރި މުޒާހަރާ އަށް ފަހު، އަދި ފުލުހުންނާއި ސިފައިން ހިންގި "މިއުޓިނީ" އަކަށް ފަހު އެވެ.

މުޒާހަރާތަކުގައި މޫނު ނިވާ ނުކުރުމަށާއި އަދި ކުޑަކުދިން ބައިވެރި ނުކުރުމަށް ފުލުހުން އިލްތިމާސްކޮށްފި.

ފުލުހުންގެ ވެބްސައިޓުގައި އާންމުކޮށްފައިވާ ލިޔުމެއްގައި ބުނެފައި ވަނީ ފުލުހުންގެެ އަމުރަށް ނުކިޔަމަންތެރިވެ، ފުލުހުންގެ ބެރިކޭޑުތައް ފަޅާލައި ވަންނަން އުޅޭނަމަ ގާނޫނީ ފިޔަވަޅު އަޅާނެ ކަމަށް.

ކުރީގެ ރައީސް ނަޝީދު ހައްޔަރު ކުރި ވާހަކަ ބައިނަލްއަގުވާމީ ނޫސްތަކުން ކަވަރުކޮށްފި. ނޫސް އެޖެންސީ، އެސޯސިއޭޓް ޕްރެސް، އޭޕީއާ ހަވާލާދީ، އޭބީސީ ނޫހުން ބުނީ، އެންޓި ޓެރަރިޒަމް ގާނޫނުގެ ދަށުން އިދިކޮޅު ލީޑަރު ނަޝީދު ހައްޔަރު ކުރި ކަމަށް. އަދި ބުނީ ނަޝީދު ހައްޔަރު ކުރީ 2012 ވަނަ އަހަރު ނަޝީދު ސީނިއާ ފަނޑިޔާރަކު ހައްޔަރު ކުރުމުގެ ކުށުގައި ކަމަށް. އަދި ބުނީ 2012 ވަނަ އަހަރު ނަޝީދު އިސްތިއުފާ ދެއްވީ، ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ހައްޔަރު ކުރި މައްސަލާގައި ރައްޔިތުން އެތައް ހަފްތާއެއް ވަންދެން މުޒާހަރާ ކުރުމުން ކަމަށް. އަދި 2013 ވަނަ އަހަރުގެ އިންތިހާބުން ނަޝީދު ބަލިވި ކަމަށް. ބީބީސީ އިން ބުނީ ޓެރެރިޒަމްގެ ކުށުގައި ނަޝީދު ހައްޔަރު ކުރި ކަމަށް. އަދި ނަޝީދަކީ ފުރަތަމަ ޑިމޮކްރެޓިކް ރައީސް ކަމަށް. އަދި އޭނާ އިސްތިއުފާ ދެއްވީ މަޖުބޫރުން ކަމަށް.

ފުލުހުންގެ މީޑިއާ އޮފިޝަލް ވިދާޅުވީ އެމްޑީޕީގެ ޗެއާޕަސަން އަލީ ވަހީދު ހައްޔަރު ނުކުރާ ކަމަށް. ފުލުހުން ބުނީ ނަޝީދު ދޫނިދުއަށް ގެންދިޔަ ލޯންޗުގައި އަލީ ވަހީދު ވެސް ދޫނިދުއަށް ދިޔަ ކަމަށް.

ޖުމްހޫރީ ޕާޓީގެ ލީޑަރު ގާސިމް އިބްރާހީމް ހައްޔަރު ކުރުމަށް ކޯޓު އަމުރަކަށް ނޭދޭ ކަމަށާއި އެފަދަ އަމުރެއް ނުނެރޭ ކަމަށް ފުލުހުން ބުނެފި. އަދި ކްރިމިނަލް ކޯޓުން ވެސް ބުނީ ގާސިމު ހައްޔަރު ކުރުމުގެ އަމުރެއް ނުނެރޭ ކަމަށް.

ކްރިމިނަލް ކޯޓުގެ އަމުރުގައި ވަނީ "ވީއެންމެ އަވަހަކަށް ކުރީގެ ރައީސް މުހައްމަދު ނަޝީދު ހައްޔަރުކުރުމަށް މޯލްޑިވްސް ޕޮލިސް ސާވިސްއަށް އަމުރުކުރާ ކަމަށް"

ރައީސް ނަޝީދު ޝަރީއަތަށް ފިލާފާނެ ކަމުގެ ހެއްކާ ގަރީނާގެ ގޮތުގައި ކޯޓު އަމުރުގައި ބަޔާންކޮށްފައި ވަނީ، "ހުޅުމާލޭ މެޖިސްޓްރޭޓް ކޯޓުގައި މައްސަލަ ހިނގިއިރު ކަންހިނގާފައިވާ ގޮތާއި، ފުލުހުންގެ އިންޓެލިޖެންސް ރިޕޯޓު" ކަމަށް.

އެސަރަހައްދުގައި އާންމުންނާއި ފުލުހުންނާއި މެދު ދަނީ ކުރިމަތިލުންތަކެއް ހިނގަމުންކަމަށް އެސަރަހައްދުގައި ހުރި ސަންގެ ނޫސްވެރިޔާ ބުނޭ. އަދި އެއްވެ ތިބި މީހުންގެ ތެރެއަށް ފުލުހުން ވަނީ ޕެޕާ ސްޕުރޭ ޖަހާފައިކަމަށްވެސް އޭނާ ބުނި.

ކްރިމިނަލް ކޯޓުން ރައީސް ނަޝީދު ހައްޔަރުކުރަން ނެރުނު އަމުރުގައި ސަބަބެއް ކަމަށް ބަޔާންކޮށްފައި ވަނީ، "ދައުލަތުން ރައީސް ނަޝީދުގެ މައްޗަށް އުފުލާފައިވާ ޓެރަރިޒަމްގެ ދައުވާގައި ކޯޓަށް ހާޒިރުނުވެދާނެ ކަމަށާއި ފިލާފާނެ ކަމަށްޓަކައި" ކަމަށް.