27 Jan 2015, 13:35
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް، ގްރީސްގެ ބޮޑުވަޒީރު ކަމަށް އިންތިހާބުވެވަޑައިގެންނެވި އެލެކްސިސް ސީޕްރަސް އަށް ތަހުނިޔާ ވިދާޅުވެއްޖެ އެވެ.
ރައީސްގެ މެސެޖުގައި، ދިވެހި ސަރުކާރާއި ރައްޔިތުންގެ ނަމުގައި އަދި އެމަނިކުފާނުގެ އަމިއްލަ ނަންފުޅުގައި، އެލެކްސިސް ސީޕްރަސްއަށް މަރްޙަބާ ވިދާޅުވެ، ހެޔޮއެދުންތައް ފޮނުއްވާފައިވެ އެވެ.
އެލެކްސިސް ސީޕްރަސްގެ ޒައާމަތުގައި، ގްރީސްގެ ރައްޔިތުންނަށް އިތުރު ފާގަތިކަމާއި ކުރިއެރުން ލިބިގެންދާނެ ކަމަށް އުންމީދު ކުރައްވާ ކަމުގައި ރައީސް ވިދާޅުވެފައިވެ އެވެ. އަދި ރާއްޖެ އާއި ގްރީސާ ދެ ގައުމުގެ ދެމެދުގައި އޮތް ގުޅުން، ކުރިއަށް އޮތް އަހަރުތަކުގައި އިތުރަށް ބަދަހިވެގެންދާނެ ކަމަށް ޔަގީން ކުރައްވާ ކަމުގައި ވެސް ރައީސްގެ މެސެޖުގައި ވިދާޅުވެފައިވެ އެވެ.