އަންނަ ބުދަ ދުވަހުގެ ރޭ 9:00ގައި ގައުމީ ފުޓްބޯޅަ ދަނޑުގައި ކުޅޭ ފައިނަލް މެޗުގައި ޕީޑީއާރުއެމާ ވާދަކުރާނީ، ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން އެވެ.

މިރޭގެ މެޗުގައި ދެޓީމުގެ ފަރާތުން ވެސް ރީތި ކުޅުމެއް ފެނިފައިވާއިރު، ފުރަތަމަ ހާފުގެ ކުރީކޮޅުގައި ލަޔަންސުން ވަނީ، ޕީޑީއާރުއެމްގެ ގޯލަށް ނުރަށްކާކޮށް ތިން ހަމަލާއެއް ފޮނުވާލާފައެވެ. އަދި ޕީޑީއާރުއެމުން ވެސް ލަޔަންސްގެ ގޯލަށް ނުރައްކާތެރި ދެ ހަމަލާއެއް އެ ހާފުގައި ފޮނުވާލާފައިވާއިރު ފުރަތަމަ ހާފު ނިމުނީ، ލަނޑެއް ނުޖެހި އެއްވަރުވެގެންނެވެ.

މެޗުގައި ފެނިގެންދިޔަ ހަމަ އެކަނި ލަނޑު ޕީޑީއާރުއެމަށް ކާމިޔާބުކޮށްދިނީ އެޓީމަށް ލިބުނު ޕެނަލްޓީއަކުން، 52 ވަނަ މިނިޓްގައި ޑްރަމާނޭ ޓްރައޮރޭ އެވެ.

ޕީޑީއާރުއެމަށް ޕެނަލްޓީ ލިބުނީ، ލަޔަންސްގެ ޕެނަލްޓީ އޭރިޔާތެރެއަށް ދަގަނޑޭ ބޯޅަ ހިފައިގެން ވަދެ ބޯޅަ ފޮނުވާލަން އުޅެނިކޮށް ލަޔަންސްގެ ކެޕްޓަން އީސަ، ދަގަނޑޭގެ ފައިގައި އަޅުވާ ވައްޓާލުމާ ގުޅިގެނެވެ. އެ ފައުލާއެކު ރެފްރީ އަމީޒް ވަނީ، އިސައަށް ރަތްކާޑެއް ދައްކައި ދަނޑުން ފޮނުވާލައިފައެވެ. މެޗުގެ ބާކީ ބައި ލަޔަންސް ކުޅެފައި ވަނީ 10 ކުޅުންތެރީންނާއެކު އެވެ.

ފަހު ހާފުގައި ޕީޑީއާރުއެމުން ވަނީ، ލަޔަންސްގެ ގޯލަށް އަމާޒުކޮށް ނުރައްކާތެރި ހަމަލާތަކެއް ފޮނުވާލައިފައެވެ. އެހެން ނަމަވެސް މެޗު ނިމިގެން ދިޔައީ އިތުރު ލަނޑެއް ނުޖެހި 1-0 އިން ޕީޑީއާރުއެމް މޮޅުވެގެންނެވެ.