ޕީޕަލްސް ކަޕްގެ ފަސް ވަނަ މެޗުގައި މިއަދު ހަވީރު ނިއުރޭޑިއަންޓް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން ބައްދަލުކުރި މެޗު، ލަނޑެއް ނުޖެހި ދެޓީމު އެއްވަރުވެގެން ނިމިއްޖެ އެވެ. މި މެޗުގެ ނަތީޖާއާއެކު މުބާރާތުގައި ކުޅުނު ހުރިހާ މެޗަކުން ޖުމުލަ ފަސް ޕޮއިންޓް ލިބިގެން މާޒިޔާ ވަނީ މުބާރާތުގެ ފައިނަލުން ޖާގައެއް ކަށަވަރު ކޮށްފައެވެ.

މުބާރާތުގައި ނިއު މިހާތަނަށް ކުޅުނު އެއްވެސް މެޗަކުން މޮޅުވެފައި ނުވާއިރު، މިއަދުގެ މެޗަށް ނުކުތްއިރު ވެސް އެޓީމު ވަނީ މުބާރާތުން ކަޓައިފައެވެ. އެހެން ނަމަވެސް މިއަދުގެ މެޗު އެއްވަރުވުމުން އެޓީމަށް ވަނީ ހުސްއަތާ ނިންމާނުލައި ޕޮއިންޓެއް ލިބިފައެވެ.

މުބާރާތުގެ ފައިނަލްގައި މާޒިޔާއާ ވާދަކުރާނެ ޓީމެއް އެނގޭނީ މިރޭ، މެލޭޝިއާގެ ޕީޑީއާރުއެމްއާއި ސިންގަޕޫރުގެ ލަޔަންސް ވާދަކުރާ މެޗަށް ފަހުއެވެ. އެ މެޗުގެ ނަތީޖާ އެއްވަރު ވިޔަސް ނުވަތަ ޕީޑީއާރުއެމް މޮޅުވިޔަސް އެޓީމަށް ފައިނަލްގެ ޖާގައެއް ލިބޭނެ އެވެ. ލަޔަންސަށް މުބާރާތުގެ ފައިނަލުން ޖާގައެއް ލިބޭނީ މިރޭގެ މެޗުން މޮޅުވެގެންނެވެ.

މިއަދުގެ މެޗުގައި ދެޓީމަށް ވެސް ލަނޑު ޖަހާނޭ ފުރުސަތުތަކެއް ލިބުނެވެ. އެހެންނަމަވެސް އިދިކޮޅު ޓީމުގެ ގޯލް އެއްވެސް ޓީމަކަށް ފޫއަޅުވާލެވޭ ގޮތެއް ނުވިއެވެ.

މެޗުނިމެން ހަތް މިނިޓަށް ވެފައި ވަނިކޮށް ނިއުގެ މުޙައްމަދު ސިފާން (ކުޑައްޓެ) ލައިންސަމަނާ ދިމާއަށް ކުޅިވަރުގެ ރޫހާ ހިލާފު ގޮތަކަށް މުއާމަލާތުކުރުމުން ރެފްރީ ޝިފާން ވަނީ، ކުޑައްޓޭއަށް ސީދާ ރަތްކާޑެއް ދައްކައި ދަނޑުން ފޮނުވާލައިފައެވެ.

ޕީޕަލްސްކަޕްގެ ހަަވަނަމެޗުގައި ޕީޑީއާރުއެމްއާއި ލަޔަންސް ބައްދަލުކުރާ މެޗު ފެށުމަށް ހަމަޖެހިފައި ވަނީ، މިރޭ 9:00ގައެވެ.