26 Jan 2015, 13:30
ކިއުބާ ސަރުކާރުން ރާއްޖެއަށް ކަނޑައެޅުއްވި އާ ސަފީރު، ފްލޮރެންޓީނޯ ބަޓިސްޓާ ގޮންޒާލޭޒް، އެމަނިކުފާނުގެ ސަފީރުކަމުގެ ފަތްކޮޅު، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްގައްޔޫމަށް މިއަދު އަރުއްވައިފި އެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި އެ ރަސްމިއްޔާތުގައި ފަތްކޮޅު އެރުއްވުމަށް ފަހު، ކިއުބާގެ އާ ސަފީރާ ރައީސުލްޖުމްހޫރިއްޔާ ބައްދަލުކުރައްވައި ސަފީރަށް ތަހުނިޔާ ވިދާޅުވި އެވެ.
މިބައްދަލުވުމުގައި ދިވެހި ރާއްޖެއާއި ކިއުބާއާ ދެ ގައުމުގެ ދެމެދުގައި އޮތް ގުޅުމާއި މިގުޅުން އިތުރަށް ބަދަހިކުރެއްވުމާ ބެހޭގޮތުން ދެބޭފުޅުން މަޝްވަރާ ކުރެއްވި އެވެ. ވަކިން ޚާއްޞަކޮށް ޞިއްޙީ އަދި ތަޢުލީމީ ދާއިރާ އިން ދެ ގައުމުގެ ދޭތެރޭ އިތުރަށް ގުޅުން ވަރުގަދަ ކުރެވިދާނެ ގޮތްތަކާ ބެހޭ ގޮތުން ދެބޭފުޅުން ޚިޔާލު ބަދަލުކުރެއްވި ކަމަށް ރައީސް އޮފީހުން މިއަދު އާންމު ކުރި ބަޔާނުގައި ބުންޏެވެ.
މީގެ އިތުރަށް، ކުދި ގައުމުތަކުގެ ޙައިސިއްޔަތުންް ދިވެހި ރާއްޖެއާއި ކިއުބާއަކީ ތިމާވެށީގެ ގޮތުންނާއި ބައިނަލްއަގްވާމީ ސިޔާސީ މަސްރަޙުގައި ވަރަށް އެއްގޮތް ގޮންޖެހުންތަކެއް ދިމާވެފައިވާ ދެ ގައުމުކަން ދެބޭފުޅުންގެ ވާހަކަފުޅުގައި ފާހަަގަކުރެއްވި އެވެ. މިގޮތުން، އިންސާނީ ޙަައްގުތައް ހިމާޔަތްކުރުމަށާއި ޖައްވު ހޫނުވުމުގެ ސަބަބުން ދިމާވެފައިވާ ތިމާވެށީގެ މައްސަލަތައް ދުނިޔޭގެ ސަމާލުކަމަށް ގެނައުމަށް ޓަކައި ދިވެހިރާއްޖެ އިން އަދާކުރައްވާ މުހިންމު ރޯލު ފާހަގަކުރައްވައި އެކަމަށްޓަކައި ކިއުބާގެ ސަފީރު ދިވެހި ސަރުކާރަށް ތަޢުރީފުކުރެއްވި އެވެ.
އެ ބައްދަލުކުރެއްވުމުގައި ފޮރިން މިނިސްޓަރު ދުންޔާ މައުމޫން ބައިވެރިވެވަޑައިގެންނެވި އެވެ.