17 Jan 2015, 12:12
ބްރެޒިލްއިން 1983 ވަނަ އަހަރު ވަގަށް ނެގި އޮރިޖިނަލް ވޯލްޑް ކަޕް ޓްރޮފީގެ ބައެއް ފީފާގެ މައި އިދާރާގެ ބިމުގެ އަޑީގައި ހުރި ކޮޓަރިއަކުން ފެނިއްޖެއެވެ.
ޚަބަރު ލިބިފައިވާގޮތުގައި މިދިޔަ މަހު ފެނިފައި ވަނީ އެ ޓްރޮފީގެ ފުލުގެ ބައެކެވެ. އެ ޓްރޮފީގެ ފުލުގައި 1930 ވަނަ އަހަރާއި 1950 ވަނަ އަހަރުގެތެރޭ ބޭއްވި ހަތަރު ވޯލްޑް ކަޕް ކާމިޔާބު ކުރި ޓީމްތަކުގެ ނަންތައް ލިޔެވިފައި ވެއެވެ.
އެކަމާ ގުޅޭ ގޮތުން ފީފާގެ ދާރުލް އާސާރުގެ ކްރިއޭޓިވް ޑައިރެކްޓަރު ޑޭވިޑް އޮސީލް ބުނީ އެ ޓްރޮފީގެ ބައެއް ފެނުމަކީ ވަރަށް އުފާވެރި ޚަބަރެއް ކަމަށާއި، އެއީ އަގު ނުކުރެވޭނެ ފަދަ އާސާރީ ތަރިކައެއް ކަމަށެވެ.
"އެ ޓްރޮފީގެ ބައެއް ފެނުމަކީ މިސްރުގެ ކުރީގެ ރަސްގެފާނެއްގެ މަމީއެއް ފެނުން ކަހަލަ ކަމެއް. އެއީ އަގު ނުކުރެވޭނެހާ އަގުބޮޑު ތަރިކައެއް. މީގެ ކުރިން ބެލެވުނީ އެ ޓްރޮފީ 1983 ގައި ބްރެޒިލުން ގެއްލުނު އިރު އޭގެ ފޫވެސް ގެއްލިފައި ވާކަމަށް. ޖޫލްސް ރިމްލެޓް ފިޔަވާ އެހެން އެއްވެސް ފީފާގެ ރައީސަކަށް އެ ޓްރޮފީގެ އަސްލުގެ ބައެއް ފެނިފައި ވާނެކަމަކަށް ލަފައެއް ނުކުރެވޭ،" ޑޭވިޑް ބުންޏެވެ.
ޑޭވިޑް ބުނީ މިހާރު ފެނިފައިވާ އެ ޓްރޮފީގެ އެ ބައި އަންނަ އަހަރު ހުޅުވާ ފީފާގެ އާ ދާރުލް އާސާރުގައި ދައްކާލުމަށް ބަހައްޓަން ހަމަޖެހިފައި ވާކަމަށެވެ. ބްރެޒިލްއިން ވަގަށް ނެގި އެ ޓްރޮފީ ހޯދުމުގެ މަސައްކަތް ނާކާމިޔާބު ވުމުން އޭރު ބެލެވުނީ އެ ޓްރޮފީ ވިރުވާލުމަށްފަހު އޭގެ ރަނުގެ ބައިތައް ބަޔަކު ވިއްކާލީ ކަމަށެވެ.
ޖެހިޖެހިގެން ތިން ވޯލްޑް ކަޕް ކާމިޔާބު ކުރުމުން 1970 ވަނަ އަހަރު އެ ޓްރޮފީ ދާއިމީކޮށް ދީފައި ވަނީ ބްރެޒިލަށް ށެވެ. ނަމަވެސް ބްރެޒިލް އެ ޓްރޮފީ މިލްކު ކުރުމުގެ ކުރިންވެސް އެ ޓްރޮފީ ވަނީ އެއް ފަހަރު ވަގަށް ނަގާފައެވެ. އެ ފަހަރު އެ ޓްރޮފީ ވަގަށް ނެގީ 1966 ގައި އިނގިރޭސިވިލާތުގައި ބޭއްވި ވޯލްޑް ކަޕްގެ ތިން މަސް ދުވަސް ކުރިން އެ ގައުމުންނެވެ. އަދި އެ ފަހަރު އެ ޓްރޮފީ ފެނިފައި ވަނީ ވަގަށް ނެގިތާ ހަފްތާއެއް ފަހުން ދެކުނު ލަންޑަންގެ ހިސާބުގަނޑަކުން ނެވެ.
ވޯލްޑް ކަޕް 1930 ވަނަ އަހަރު އިފްތިތާހު ކުރެވުނު ފަހުން، އެ މުބާރާތުގެ ޗެންޕިއަން ޓީމަށް ދޭން އެންމެ ފުރަތަމަ ތައްޔާރު ކުރީ ޖޫލްސް ރިމްލެޓް ޓްރޮފީ އެވެ.