15 Jan 2015, 14:30
ދިވެހި މުޖްތަމަޢަށް ދީލަތި އެހީތެރިކަން ވެދެއްވަމުން ގެންދަވާ އެކުވެރި އަރަބި އިމާރާތުގެ ރައްޔިތެއް ކަމުގައިވާ މަޙްމޫދު ފައްތާޙް ޢަލީ ޢަބްދުﷲ އަލް ޚާޖާއަށް "ނިޝާން މުލީގޭ ޝަރަފުގެ ޢިއްޒަތް" އަރުވައިފި އެވެ.
ރައީސުލްޖުމްހޫރިއްޔާގެ އޮފީހުގައި މިއަދު މެންދުރުފަހު ބޭއްވި ރަސްމިއްޔާތުގައި މަޙްމޫދު ފައްތާޙް ޢަލީ ޢަބްދުﷲ އަލް ޚާޖާއަށް ދިވެހި ދައުލަތުގެ ޢިއްޒަތް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އެރުވީ ޤާނޫނުއަސާސީގެ 115 ވަނަ މާއްދާގެ (ޑ)ގެ ދަށުންނެވެ. އެ މާއްދާގައި ބުނެފައި ވަނީ ޤާނޫނުގައިވާ ގޮތުގެ މަތިން އިނާމާއި، ލަޤަބާއި، ޝަރަފާއި، މެޑެލް ދިނުމުގެ ބާރު ރައީސުލްޖުމްހޫރިއްޔާއަށް ލިބިގެންވާ ކަމަށެވެ.
ލިބިދީފައިވީ ހިނދު، ދިވެހި ރައްޔިތުންގެ ލާބަޔާއި މަންފާއަށްޓަކައި، ވަކިން ޚާއްޞަކޮށް، މުޖުތަމަޢުގައި ދަތިކަން އިޙްސާސްކުރަން ޖެހިފައިވާ މީހުންގެ ޙާލަތު ރަނގަޅުކުރުމަށްޓަކައި ވެދެއްވަމުން ގެންދަވާ ދީލަތި އެހީތެރިކަމާއި އެއްބާރުލެއްވުމުގެ އަގު ވަޒަންކުރުމުގެ ގޮތުންނެވެ.
މަޙްމޫދު ފައްތާޙް ޢަލީ ޢަބްދުﷲ އަލް ޚާޖާއަށް ނިޝާން މުލީގޭ ޝަރަފުގެ އިއްޒަތް އެރުވީ ދިވެހިންނާމެދު ބަހައްޓަވާ ގާތް ކަމަށާއި، ދިވެހި ރައްޔިތުންނަށް ކޮށްދެއްވަމުން ގެންދަވާ މަސައްކަތްތަކަށް ޝުކުރު އަދާ ކުރައްވަމުންނެވެ.
އެ ރަސްމިއްޔާތުގައި މަޙްމޫދު ފައްތާޙް ޢަލީ ޢަބްދުﷲ އަލް ޚާޖާ ދެއްކެވި ވާހަކަފުޅުގައި ދިވެހި ދައުލަތުގެ ޢިއްޒަތް އެމަނިކުފާނަށް އެރުވިކަމަށް ދިވެހި ސަރުކާރަށާއި ރައްޔިތުންނަށް ޝުކުރު އަދާކުރެއްވި އެވެ. އަދި މިއީ އެމަނިކުފާނަށާއި، އެމަނިކުފާނުގެ އާއިލާއަށް ލިބުނު ވަރަށް ބޮޑު ޝަރަފަކާއި ފަޚުރެއް ކަމުގައި ވިދާޅުވި އެވެ. މީގެއިތުރަށް، ކުރިއަށްއޮތްތަނުގައިވެސް ރާއްޖޭގެ އުޚްވަތްތެރި ރައްޔިތުންނަށް އެހީތެރިކަން ފޯރުކޮށްދެއްވަމުން ގެންދަވާނެކަމުގެ ޔަޤީންކަންވެސް ދެއްވިއެވެ.