ފުލުހުން ސިޓީ ކައުންސިލަށް ވަދެ ލިޔެކިޔުންތަކެއް ގެންގޮސްފި

ބުލޮގު ޚުލާސާ

މާލޭ ސިޓީ ކައުންސިލްގެ އިދާރާ ތެރެއަށް ފުލުހުން ވަދެއްޖެ އެވެ.

ފުލުހުންގެ މީޑިއާ އޮފިޝަލް ވިދާޅުވީ ބަލަމުންދާ މައްސަލައަކާ ގުޅިގެން ކޯޓު އަމުރެއްގެ ދަށުން މާލޭ ސިޓީ ކައުންސިލްގެ އިދާރާގެ ތެރޭގައި ފުލުހުން މިހާރު ހަރަކާތްތެރިވާ ކަމަށެވެ. އެހެންނަމަވެސް އެއީ ކޮން މައްސަލައެއް ކަމެއް ވިދާޅެއް ނުވެއެވެ.

މާލޭ ސިޓީގެ ޑެޕިއުޓީ މޭޔަރު ޝިފާ މުހައްމަދު މިރޭ ސަން އަށް ވިދާޅުވީ އެ ކައުންސިލްގެ ބިމާ ބެހޭ ސެކްޝަން ފުލުހުން ބަލައި ފާސްކުރަމުން އަންނަ ކަމަށާއި ފުލުހުން ތަހުގީގު ކުރަންޖެހޭ ވަރުގެ ކަމެއް އޮންނާނެ ކަމަށް ގަބޫލުނުކުރައްވާ ކަމަށެވެ.

އޭނާ ވިދާޅުވީ ފުލުހުން މައްސަލައެއް ތަހުގީގުކުރާނަމަ އެ ފުރުސަތުދޭނެ ކަމަށާއި އެހެންނަމަވެސް ހިތާމައަކީ ބަލައިފާސްކުރުމުގެ ކުރިން މޭޔަރަށް އެކަން އަންގަވާފައިނުވުން ކަމަށެވެ.

ބަލައިފާސްކުރުމުގެ ކުރިން ފުލުހުން އެކަން އަންގާފައި ވަނީ ސެކްރެޓަރީ ޖެނެރަލް މުހައްމަދު އަންވަރު އާއި ޑިރެކްޓަރު ޖެނެރަލް އަބްދުލް ހަމީދަށް ކަމަށް ވެސް ޝިފާ ވިދާޅުވިއެވެ.

އޭނާ ވިދާޅުވީ ސިޓީ ކައުންސިލްގެ އެއްވެސް ކަމަކާ ގުޅިގެން އެއްވެސް ފަރާތަކުން އެ ކައުންސިލަށް މައްސަލައެއް ހުށަހަޅާފައިނުވާ ކަމަށެވެ.

01:56ސަމާއު ޝަރީފް، ކައުންސިލަރު

ސިޓީ ކައުންސިލުން ޕްލޭން ހެދުމަށް ބޭނުންކުރި ކޮމްޕިއުޓަރު ސިސްޓަމްތައް ވެސް ވަނީ ގެންގޮސްފައި. އެއީ ވަރަށް ގިނަ ޚިދުމަތްތައް ދިނުމަށް ބޭނުންކުރާ ކޮމްޕިއުޓަރު ސިސްޓަމްތަކެއް. މާދަމާ އެ ސެކްޝަންގެ މަސައްކަތް މުޅިން ހުއްޓޭނެ.

01:52ޕޮލިސް

ސިޓީ ކައުންސިލްގެ މުވައްޒަފުން އެތަނުގެ ލިޔުންތަކެއް ނާޖާއިޒު ގޮތުގައި ބޭނުންކުރާތީ އެ ލިޔުންތައް ވަނީ ނަގާފައި

01:43ޝިފާ މުހައްމަދު، ޑެޕިއުޓީ މޭޔަރު

ފުލުހުން ގެންދެވީ އަޅުގަނޑުމެން އެ ސަރަހައްދުގެ ރައްޔިތުންނަށް ފަސް ބުރިއަށް އަދި 10 ބުރިއަށް ގެދޮރު ހެދޭނެ ގޮތަށް ތައްޔާރުކޮށްފައިވާ ޕްލޭނެއްގެ ލިޔެކިޔުންތައް

01:40ޝިފާ މުހައްމަދު، ޑެޕިއުޓީ މޭޔަރު

ފުލުހުން ގެންދެވީ އަޅުގަނޑުމެން ހެންވޭރުގެ ރައްޔިތުންނަށް ގެދޮރު ބިނާ ކުރުމަށް ސިޓީ ކައުންސިލުން މަސައްކަތް ކުރަމުން ގެންދިޔަ ޕްރޮޖެކްޓެއްގެ މައުލޫމާތު.

01:30ޝިފާ މުހައްމަދު، ޑެޕިއުޓީ މޭޔަރު

ގާނޫނާ ގަވާއިދާ ޚިލާފަށް މިތަނުގައި އެއްވެސް ކަމެއް އަޅުގަނޑުމެން ނުކުރަން

01:18