06 Nov 2014, 16:07
ރަޝިޔާގެ ޕްރޮސެކިއުޓާ ޖެނެރަލް، ޔޫރީ ޔަކޮވްލެވިޗް ޗަކްޔާ، ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމާ މިއަދު ބައްދަލުކުރައްވައިފި އެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި އޮތް މި ބައްދަލުކުރެއްވުމުގައި، ރާއްޖެއާއި ރަޝިޔާއާ ދެމެދު ގާއިމްވެފައިވާ ހަރުދަނާ ގުޅުމުގެ މައްޗަށް އަލިއަޅުއްވައިލައްވަމުން، ކުރިއަށް އޮތްތާނގައި މިގުޅުން އިތުރަށް ބަދަހި ކުރެއްވުމާ ބެހޭގޮތުން ދެ ބޭފުޅުން މަޝްވަރާ ކުރެއްވިއެވެ.
ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ރަޝިޔާއިން އަބަދުވެސް ރާއްޖެއަށް އެކި ދާއިރާތަކުން އެއްބާރުލުން ލިބެމުންދާ ކަމުގައި ވިދާޅުވެ، އެކަމަށްޓަކައި ޝުކުރު އަދާކުރެއްވިއެވެ. ރާއްޖޭގެ އާ ގާނޫނު އަސާސީގެ ދަށުން، ޕްރޮސެކިއުޓާ ޖެނެރަލަށް ވަރަށް މިނިވަން އިޚްތިޔާރެއް ލިބިފައިވާކަން ފާހަގަ ކުރައްވައި، ރާއްޖޭގެ މިނިވަން މުއައްސަސާތައް ހަރުދަނާކުރުމުގެ މަސައްކަތުގައި، އެކި ދާއިރާތަކުން މީހުން ބިނާކުރުމަކީ ސަރުކާރުން ވަރަށް ބޮޑު އިސްކަމެއް ދެއްވާ ކަމެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި، ރަޝިޔާގެ ޕްރޮސެކިއުޓަރ ޖެނެރަލްގެ މި ދަތުރުފުޅުގެ ސަބަބުން، ދިވެހި ދައުލަތުގެ ވަކީލުންނަށް ވަރަށް ގިނަ ފައިދާތަކެއް ލިބިގެންދާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
މި ބައްދަލުކުރެއްވުމުގައި ރަޝިޔާގެ ޕްރޮސެކިއުޓާ ޖެނެރަލް ދެއްކެވި ވާހަކަފުޅުގައި، ރާއްޖެއަށް އެހީތެރިކަން ބޭނުންވާ ދާއިރާތަކުން، އެގައުމުން އަބަދުވެސް އެއްބާރުލެއްވުން ދެއްވަމުން ގެންދަވާނެ ކަމުގައި ވިދާޅުވިއެވެ. މިގޮތުން، އެހީތެރިކަން ބޭނުންވަނީ ކޮން ދާއިރާތަކުންތޯ އެމަނިކުފާނު ރައީސުލްޖުމްހޫރިއްޔާގެ އަރިހުން އޮޅުން ފިލުއްވިއެވެ. އަދި، ރަޝިޔާގެ އެކެޑެމީ އޮފް ދަ ޕްރޮސެކިއުޓާ ޖެނެރަލްސް އޮފީސްގެ ފަރާތުން، ރާއްޖޭގެ ދައުލަތުގެ ވަކީލުންނަށް ތަމްރީންގެ ފުރުސަތު ފަހިކޮށްދެއްވުމާ ބެހޭގޮތުން ރައީސުލްޖުމްހޫރިއްޔާއާ މަޝްވަރާ ކުރެއްވިއެވެ.
ރަޝިޔާގެ ޕްރޮސެކިއުޓާ ޖެނެރަލް ދެއްކެވި ވާހަކަފުޅުގައި، ޖިނާއީ ކުށްތަކުގެ ދައުވާ އުފުލުމުގެ އިތުރުން ރަޝިޔާގެ ޕްރޮސެކިއުޓާ ޖެނެރަލްގެ އޮފީހުން ކުރަމުން ގެންދާ މުހިންމު އެކިއެކި މަސައްކަތްތަކާ ބެހޭ މައުލޫމާތު ރައީސުލްޖުމްހޫރިއްޔާއާ ހިއްސާ ކުރެއްވިއެވެ. އަދި، މި ދާއިރާއިން ރާއްޖެއަށް ބޭނުންވާ ލަފާދިނުންފަދަ، އެކިއެކި ދާއިރާތަކުން ރާއްޖެއަށް އެއްބާރުލުން ދެއްވަން ރަޝިޔާއިން ތައްޔާރަށް އޮތް ކަމުގައިވެސް ރަޝިޔާގެ ޕްރޮސެކިއުޓާ ޖެނެރަލް ވިދާޅުވިއެވެ.
މިބައްދަލުކުރެއްވުމުގައި، ޕްރޮސެކިއުޓާ ޖެނެރަލް މުހުތާޒް މުހުސިނާއި، ފޮރިން މިނިސްޓަރު ދުންޔާ މައުމޫނާއި، ރައީސުލްޖުމްހޫރިއްޔާގެ އޮފީހުގެ މިނިސްޓަރު މުޙައްމަދު ޙުސައިން ޝަރީފް ބައިވެރިވެވަޑައިގެންނެވިއެވެ.