ހާމިދު އަބްދުލްޣަފޫރުގެ ގޭގައި އަލިފާން ރޯކޮށްލަން މަސައްކަތްކޮށްފި

26 Sep 2014, 03:15

ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ ކުރީގެ މެމްބަރު ހާމިދު އަބްދުލްޣަފޫރުގެ ގެކަމުގައިވާ ހ. ޝޭޑީކޯނާގައި ރޯކޮށްލަން މަސައްކަތް ކޮށްފިއެވެ.

ހާމިދުގެ އާއިލާއިން ވާހަކަދެއްކި މީހަކު ބުނީ މިރޭ ގާތްގަނޑަކަށް 2:15 އެހައިކަންހާއިރު އެގޭގައި އަލިފާން ރޯކޮށްލުމުގެ ގޮތުން މައި ދޮރުގައި އަލިފާން ރޯކޮށްލާފައިވާ ކަމަށެވެ. ނަމަވެސް މާބޮޑު ގެއްލުމެއް ނުވަނީސް އަލިފާންގަނޑު ނިއްވާލާފައިވާ ކަމަށް ވެސް އޭނާ ބުންޏެވެ.

މަންޒަރު ދުށް މީހަކާ ހަވާލާދީ އޭނާ ބުނީ އެގޭގެ މައި ދޮރުގައި ހުޅުޖަހާފައި ވަނީ ފުޅިއެއްގައި ރޯކޮށްލައި ދޮރާއި ދިމާލަށް އެއްލާލައިގެން ކަމަށެވެ.

ފުލުހުންގެ މީޑިއާ އޮފިޝަލް ވިދާޅުވީ ހާމިދުގެ ގޭގައި އަލިފާން ރޯކޮށްލަން އުޅުނު މައްސަލަ ފުލުހުންނަށް ހުށަހެޅިފައިވާ ކަމަށާއި އެ މައްސަލަ ތަހުގީގު ކުރަމުން އަންނަ ކަމަށެވެ.