17 Sep 2014, 21:16
މި އަހަރުގެ ނޮވެމްބަރު މަހު ނޭޕާލުގައި ބޭއްވުމަށް ހަމަޖެހިފައިވާ 18 ވަނަ ސާކް ސަމިޓުގައި ބައިވެރިވެވަޑައިގެން ދެއްވުން އެދިވަޑައިގެން، ނޭޕާލުގެ ބޮޑުވަޒީރު ސުޝިލް ކޮއިރަލާ، ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމަށް ދައުވަތު އަރުއްވައި ސިޓީފުޅެއް ފޮނުއްވައިފި އެވެ.
މިސިޓީފުޅު، ރައީސުލްޖުމްހޫރިއްޔާ އަށް އެރުއްވީ، ނޭޕާލުގެ ބޮޑުވަޒީރުގެ ހާއްސަ މަންދޫބެއްގެ ހައިސިއްޔަތުން އެ ގައުމުގެ ފޮރިން މިނިސްޓަރު މަހެންދްރާ ބަހާދުރު ޕާންޑޭ އެވެ.
ރައީސް އޮފީހުގައި މިއަދު ބޭއްވި ބައްދަލުވުމުގެ ތެރެއިން -- ފޮޓޯ ރައީސް އޮފީސް
މިއަދު މެންދުރު ރައީސުލްޖުމްހޫރިއްޔާގެ އޮފީހުގައި އޮތް މި ބައްދަލުކުރެއްވުމުގައި، ދިވެހި ރާއްޖެ އާއި ނޭޕާލާ ދެ ގައުމުގެ ދެމެދުގައި އުފެދިފައިވާ ގާތް ގުޅުމުގެ މައްޗަށް ދެބޭފުޅުން ރައީސް ޔާމީނާއި ނޭޕާލުގެ ފޮރިން މިނިސްޓަރު ބައްލަވައިލެއްވި ކަމަށް ރައީސް އޮފީހުން ބުންޏެވެ.
އެ ބައްދަލުވުމުގައި ވަކިން ހާއްސަކޮށް، ތައުލީމާއި ވިޔަފާރީގެ ދާއިރާގައި ދެގައުމުގެ ގުޅުން އިތުރަށް ބަދަހިކުރެވޭނެ ގޮތްތަކާ ބެހޭ ގޮތުން ދެބޭފުޅުން މަޝްވަރާކުރެއްވި ކަމަށް ވެސް ރައީސް އޮފީހުން ބުންޏެވެ.
ރައީސް އޮފީހުގައި މިއަދު ބޭއްވި ބައްދަލުވުމުގެ ތެެރެއިން -- ފޮޓޯ ރައީސް އޮފީސް
ރާއްޖޭގެ ގިނަ އަދަދެއްގެ ދިވެހި ކިޔަވާކުދިން ނޭޕާލުގައި މިހާރު ވެސް ތައުލީމު ހާސިލުކުރަމުންދާކަން ފާހަގަކުރައްވަމުން، މެޑިސިންގެ ދާއިރާ އިން ކިޔަވަން ބޭނުންވާ ދިވެހި ކުދިންނަށް ނޭޕާލުގެ ޔުނިވަސިޓީތަކުން އިތުރު ފުރުސަތުތައް ހޯއްދަވައި ދެއްވުމަށް މަސައްކަތްކުރައްވާނެ ކަމުގައި ފޮރިން މިނިސްޓަރު މަހެންދްރާ ބަހާދުރު ޕާންޑޭ ވިދާޅުވި ކަމަށް ރައީސް އޮފީހުން ބުންޏެވެ.