ދިވެހި ފިލްމީ ފަންނު ކުރިއަރުވަން ވަގުތީ ކޮމިޓީއެއް އެކުލަވައިލައިފި

10 Sep 2014, 12:31

ދިވެހި ފިލްމީ ދާއިރާގައި ދިގު މުއްދަތަކަށް ހިދުމަތް ކޮށްފައިވާ ތަޖުރިބާކާރު ފަންނާނުންތަކެއް އެކުވެގެން އެ ދާއިރާ ކުރިއެރުވުމަށް ވަގުތީ ކޮމިޓީއެއް އެކުލަވައިލައިފި އެވެ.

ސޯޝަލް ސެންޓަރުގެ ސެމިނާ ހޯލްގައިރޭ ބޭއްވި ބައްދަލުވުމެއްގައި 20 އަހަރަށް ވުރެ ގިނަ ދުވަހު މި ދާއިރާގައި މަސައްކަތްކޮށްފައިވާ ފިލްމީ ފަންނާނުން ވަނީ ބައިވެރިވެފަ އެވެ. އޭގެ ތެރޭގައި ފިލްމީ ތަރިންނާއި ޑިރެކްޓަރުންނާއި ޕްރޮޑިއުޝަރުންނާއި ކެމެރާމަނުންގެ އިތުރުން ޓެކްނިކަލް ފަންނާނުން ހިމެނެ އެވެ.

ރޭ ބޭއްވި އެ ބައްދަލުވުމުގައި މި ދާއިރާ ކުރިއެރުވުމަށް އެހީތެރިކަން ފޯރުކޮށްދިނުމަށް ނެގި ވަގުތީ ކޮމިޓީގެ މެމްބަރުންގެ ތެރޭގައި ހިމެނިވަޑައިގެންނަ ވަނީ މުހައްމަދު މުސްތަފާ ހުސެއިން އާއި އަސްލަމް ރަޝީދާއި ހުސެއިން ރަޝީދު (މަހުމާ) އާއި އިބްރާހިމް ވަހީދު އާއި މުހައްމަދު ނިޔާޒު (ޓެޑްރީ) އާއި ހުސެއިން ރަމީޒު އާއި އަމްޖަދު އިބްރާހިމް އާއި ފައުޒިއްޔާ ހަސަން އަދި ޔޫސުފް ރަފީއު (ޔޫސޭ) އެވެ.


އެ ބައްދަލުވުމާ ބެހޭ ގޮތުން ވާހަކަ ދެއްކެވި ބައެެއް ބޭފުޅުން ވިދާޅުވީ މިފަދަ ކޮމިޓީއެއް އެކުލަވާލުމުގެ އެންމެ ބޮޑު އެއް ބޭނުމަކީ މިދާއިރާގައި ގިނަ ދުވަހު ތަޖުރިބާ ހުރި ފަރާތްތަކަށް މި ދާއިރާ ކުރިއެރުމަށް ކުރަމުންދާ މަސައްކަތްތަކުގައި ވެދެވެން އޮތް އެހީތެރިކަމަކީ ކޮބައިތޯ ބަލައި އެކި ރޮނގުރޮނގުން ދިވެހި ފަންނީ ދާއިރާ ކުރިއެރުވަން މަސައްކަތް ކުރުން ކަަމަށެވެ.


ރޭގެ އެ ބައްދަލުވުމުގައި ވާހަކަ ދެއްކެވި ހުރިހާ ފަންނާނުން ވެސް ވަނީ ދިވެހި ކޮމާޝަލް ފިލްމެއް ފުރަތަމަ ފަހަރަށް ވުޒޫދަށް ގެނައުމަށް ޓަކައި ދިވެހިންގެ ތެރެއިން މަދު ބަޔަކު ކުރި ބުރަ މަސައްކަތުގެ މައްޗަށް އަލިއަޅުވާލެއްވި އެވެ.

އެ ބައްދަލުވުމުގައި އެ ފިލްމް އުފެއްދުމަށް މަސައްކަތް ކުރި ފިލްމްގެ ބައެއް ކްރޫއިން ވެސް ވަނީ އެ ކަމާ ބެހޭ ގޮތުން ވާހަކަ ދައްކަވައިފަ އެވެ. އެ ބޭފުޅުންގެ ވިދާޅުވީ އެންމެ ފުރަތަމަ ރާއްޖޭގައި ސިނަމާއެއްގައި އެޅުވި ކޮމާޝަލް ފިލްމަކީ ދިވެހި ފިލްމް "ތިން ފިޔަވަޅު" ކަމަށެވެ.