08 Sep 2014, 12:40
ދެހާސް ބާރަ ވަނަ އަހަރުގެ ފެބްރުއަރީ މަހުގެ އަށް ވަނަ ދުވަހު ގދ. ތިނަދޫ ޕޮލިސްޓޭޝަންގައި ހުޅުޖެހުމުގެ ހާދިސާއާ ގުޅިގެން ދައުލަތުން ދައުވާ އުފުލި ހަތަރު ކުދިންގެ މައްޗަށް ކުށް ސާބިތުނުވާ ކަމަށް ކުރި ހުކުމް އިސްތިއުނާފު ކުރަން ނިންމައިފި އެވެ.
ޕްރޮސިކިއުޓާ ޖެނެރަލް އޮފީހުގެ އޮފިޝަލަކު 'ސަން' އަށް ވިދާޅުވީ އެ މައްސަލަ އިސްތިއުނާފުކުރުމަށް ކުރަންޖެހޭ މަސައްކަތްތައް މިހާރު ކުރަމުން އަންނަ ކަމަށެވެ.
"އަޅުގަނޑުމެންވާނީ އެ މައްސަލަ އިސްތިއުނާފު ކުރުމަށް ނިންމާފައި. އެކަމަށްޓަކައި ކުރަންޖެހޭ މަސައްކަތްތައް ޕީޖީ އޮފީހުން އަންނަނީ ކުރަމުން،" އޮފިޝަލް ވިދާޅުވި އެވެ.
މިހާރު އުމުރުން 18 އަހަރު ފުރިފައިވާ އެ ހަތަރު ކުދިންގެ މައްޗަށް ދައުލަތުން އުފިލި ޓެރަރިޒަމްގެ ދައުވާ ސާބިތުނުވާ ކަމަށް ޖުވެނައިލް ކޯޓުން ހުކުމް ކޮށްފައި ވަނީ މިދިޔަ ފެބުރުއަރީ މަހުގެ 24 ވަނަ ދުވަހު އެވެ.
އެ ކުދިންގެ މައްޗަށް ކުށް ސާބިތުނުވާ ކަމަށް ޖުވެނައިލް ކޯޓުން ހުކުމްކޮށްފައި ވަނީ ދައުލަތުން ހުށަހެޅި ހެކީންގެ ހެކިބަހުން އެ ހަތަރު ކުދިން ތިނަދޫ ޕޮލިސްޓޭޝަނަށް ގައު އުކި ކަން އެނގެން އޮތްނަމަވެސް، އެއިން އެއްވެސް ގައުބުރިއަކުން އެއްވެސް މީހަކަށް ނުވަތަ ތަނަކަށް ގެއްލުންލިބިފައިވާ ކަން އެނގެން ނެތް ކަމަށް ބުނެ އެވެ.