މާލޭގައި މާރާމާރީ ހިންގައި ބަޔަކު ޒަހަމްކޮށްލައިފި

ބުލޮގު ޚުލާސާ

މޫނު ނިވާކޮށްގެން ތިބި ބަޔަކު ސައިކަލްތަކެއްގައި ގޮސް މަގުމަތިން ހިނގާފައި ދިޔަ ތިން މީހަކަށް ހަމަލާދީ ޒަހަމްކޮށްލައިފި އެވެ.

މަންޒަރު ދުއް މީހަކު "ސަން"އަށް މިރޭ ބުނީ އެ ހާދިސާ ހިނގާފައި ވަނީ ޝޭޑީކޭބިން އުތުރު ގޯޅީގައި ކަމަށެވެ. އިސްކަންދަރު ސްކޫލް ކުރިމަތިން އޮންނަ "ފުޑްބޭންކް" ހުންނަ "ދިދި ގޯޅީ"ގައި ހިންގި މާރާމާރީގައި ޒަހަމްކޮށްލި ތިން މީހުންގެ ގައިން އޮހޮރުނު ލޭ މަގު މަށްޗަށް އެޅިފައި އެބަ ހުއްޓެވެ.

އެސަރަހައްދުގައި ފުލުހުން ގެންދަނީ ހަރަކާތްތެރިވަމުންނެވެ.

ފުލުހުން ބުނީ އެ މާރާމާރީގައި ޒަހަމްވި ތިން މީހުންނަށް ފަރުވާ ދިނުމަށް އައިޖީއެމްއެޗަށް ގެންގޮސްފައިވާ ކަމަށެވެ.

އައިޖީއެމްއެޗްގެ އޮފިޝަލަކު ދާދިދެންމެއަކު ވިދާޅުވީ މާރާމާރީއާ ގުޅިގެން މިހާތަނަށް ދެ މީހަކު އައިޖީއެމްއެޗަށް ގެންގޮސް ފަރުވާދެމުން އަންނައިރު އޭގެތެރެއިން އެކަކު އޮޕަރޭޝަން ތިއޭޓަރަށް ވައްދާފައިވާ ކަމަށެވެ. އަދި ދެވަނަ މީހާއަށް ޕްރޮސީޖާ ރޫމްގައި ފަރުވާ ދެމުން އަންނަ ކަމަށް ވެސް އޭނާ ވިދާޅުވި އެވެ.

22:41އައިޖީއެމްއެޗުން

މާރާމާރީގައި ޒަހަމްވި ތިން މީހުންގެ ތެރޭގައި އުމުރުން 13 އަހަރުގެ ކުޑަކުއްޖަކު ވެސް ހިމެނޭ. އޭނާގެ ބޮލުގައި އެއްޗަކުން ޖެހުމުން ލިބިފައިވާ ޒަހަމްތަކަށް އައިޖީއެމްއެޗުން ވަނީ ފަރުވާދީފައި. އަދި އެ މާރާމާރީގައި ޒަހަމްވި އުމުރުން 20 އަހަރުގެ ޒުވާނެއްގެ ބުރަކަށްޓަށް ވަނީ ތޫނު އެއްޗަކުން ހަމަލާދީ ޒަހަމްކޮށްލާފައި. އެ ދެ މީހުންގެ ހާލު އެހާ ސީރިއަސްއެއް ނޫން ކަމަށް ޑޮކްޓަރުން ބުނޭ.

ފަރުވާއަށްފަހު އެ ދެ މީހުން ހޮސްޕިޓަލުން ވަރަށް އަވަހަށް ދޫކޮށްލާނެ ކަމަށް މައުލޫމާތު ލިބޭ.

22:37އައިޖީއެމްއެޗުން

މާރާމާރީގައި ސީރިއަސް ޒަހަމްތަކެއް ލިބިފައި ވަނީ އުމުރުން 19 އަހަރުގެ ޒުވާނަކަށް. އޭނާގެ ހަށިގަނޑުގެ އެކިތަންތަނަށް ތޫނު އެއްޗަކުން ހަރައި ވަރަށް ބޮޑަށް ޒަހަމްކޮށްލާފައިވޭ. އޭނާގެ ހަށިގަނޑަށް ތޫނު އެއްޗެއް ހަރާފައި ވަނީ ވަރަށް ފުންކޮށް ކަމަށް ވޭ.