22 Aug 2014, 17:27
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ އަރިހަށް، ސާކް ސެކްރެޓަރީ ޖެނެރަލް އަރްޖުން ބަހަދަރު ތާޕާ އިހްތިރާމުގެ ޒިޔާރަތެއް ކުރައްވައިފި އެވެ.
ބުރާސްފަތި ދުވަހު ހެނދުނު ރައީސުލްޖުމްހޫރިއްޔާގެ އޮފީހުގައި އޮތް އެ ބައްދަލުކުރެއްވުމުގައި ރައީސް ޔާމީން ވަނީ، ސާކްގެ ސެކްރެޓަރީ ޖެނެރަލްކަމާ ތާޕާ ހަވާލުވެވަޑައިގަތުމާ ގުޅިގެން، އޭނާއަށް މަރްޙަބާ ވިދާޅުވެފައެވެ.
ރައީސް ޔާމީން ދެއްކެވި ވާހަކަފުޅުގައި، ސަރަޙައްދީ ގުޅުންތައް ބަދަހިކޮށް، ގައުމުތަކުގެ އިޖްތިމާއީ އަދި އިގްތިޞާދީ ހާލަތު ރަނގަޅުކުރުމަށްޓަކައި ސާކުން އަދާކުރަމުން ގެންދާ މުހިންމު ދައުރުގެ މައްޗަށް އަލިއަޅުއްވާލައްވައި އެ ޖަމިއްޔާގެ ކަންތައްތަކަށް އެމަނިކުފާނު ދެއްވާ އަހަންމިއްޔަތު ފާހަގަކުރެއްވި އެވެ.
ސާކުގެ ހަރަކާތްތައް މިހާރަށްވުރެ ފުޅާކޮށް، ސާކުގެ ހިންގުން އިތުރަށް ހަރުދަނާކުރެއްވުމަށްޓަކައި އެޅުއްވިދާނެ ފިޔަވަޅުތަކާ ބެހޭގޮތުން ވެސް އެ ބައްދަލުކުރެއްވުމުގައި ރައީސް ޔާމީން ވަނީ ސާކުގެ ސެކްރެޓެރީ ޖެނެރަލާ މަޝްވަރާ ކުރައްވައިފައެވެ.
އިއްޔެ ބޭއްވި އެބައްދަލުކުރެއްވުމުގައި، ފޮރިން މިނިސްޓަރު ދުންޔާ މައުމޫނާއި، ފޮރިން ސެކްރެޓެރީ ޑރ. ޢަލީ ނަޞީރު މުޙައްމަދު ބައިވެރިވެވަޑައިގެންނެވި އެވެ. އަދި ސާކް ސެކްރެޓޭރިއަޓަށް ރާއްޖެއިން ކަނޑައަޅުއްވާފައި ހުންނަ ޑިރެކްޓަރު ފާޠިމަތު ނަޖުވާ ވެސް އެބައްދަލުކުރެއްވުމުގައި ބައިވެރިވެވަޑައިގަތެވެ.