އިސްރާއީލުގެ ހަމަލާއެއްގައި މިއަދު ވެސް ޣައްޒާގެ މިސްކިތެއް ފުނޑުފުނޑު ކޮށްލައިފި

31 Jul 2014, 00:31

އިސްރާއީލު ސިފައިން މިއަދު ޣައްޒާއަށް ދިން ލާއިންސާނީ ހަމަލާތަކުގައި މިސްކިތަކަށް ހަމަލާދީ ބޮޑެތި ގެއްލުންތަކެއް ދީފި އެވެ.

ޣައްޒާގެ އުތުރުގައި ހުރި ރެފިއުޖީ ކޭންޕަކަށް އަމާޒުކޮށް މިއަދު ހެނދުނު ދިން ހަމަލާތަކުގައި އެ ސަރަހައްދުގައި ހުރި މަސްޖިދުލް އައްސޫސައި ނަމަކަށް ކިޔާ މިސްކިތަށް ޔަހޫދީ ސިފައިން ވަނީ ހަމަލާދީފަ އެވެ. އެ ހަމަލާގެ ސަބަބުން މިސްކިތުގެ މުންނާރު ބިންދައިގެން ގޮސް ކައިރީގައި ހުރި ގެއެއްގެ މައްޗަށް ވެއްޓި އެގޭގެ ބޮޑުބައެއް ސުންނާފަތިވެފައި ވާއިރު، މިސްކިތް ވަނީ ބޭނުން ނުކުރެވޭ ވަރަށް ހަލާކުވެފަ އެވެ.

ނިމިދިޔަ ރަމަޟާން މަހުގެ ތެރޭގައި ވެސް އިސްރާއީލުގެ ޔަހޫދީ ސިފައިން ޣައްޒާގެ އެކި ސަރަހައްދުތަކުގައި ހުރި މިސްކިތްތަކަށް ހަމަލާދީ އެތަންތަން ސުންނާފަތިކޮށް ބޮޑެތި ގެއްލުންތަކެއް ދީފައި ވެއެވެ.

އިސްރާއީލު ސިފައިންގެ ހަމަލާތަކުގައި ގެދޮރު ގެއްލިފައިވާ ޣައްޒާގެ ގިނަ ބަޔަކު ބޯހިޔާވަހިކަން ހޯދަމުން ގެންދަނީ އެ ސިޓީގައި ހުންނަ ޔުނައިޓެޑް ނޭޝަންސް (ޔޫއެން)ގެ ސްކޫލްތަކުގަ އެވެ. އިސްރާއީލު ސިފައިން ދަނީ އެބައިމީހުންގެ އިންސާނިއްޔަތުކަމެއް ނެތް ރަހުމުކުޑަ ހަމަލާތައް އެފަދަ ތަންތަނަށް ވެސް އަމާޒުކުރަމުންނެވެ.

ޣައްޒާގައި ހުރި ޔޫއެންގެ ސްކޫލްތަކަށް މިއަދު އެކަނިވެސް އިސްރާއީލުން ދިން ހަމަލާތަކުގައި 30 އަށް ވުރެ ގިނަ މީހުން ވަނި ޝަހީދުކޮށްލާފަ އެވެ.