ކ. ތުލުސްދޫ ރާޅާ އަޅާ ސަރަހައްދުގެ ރުށްތަކެއްގައި އިސްރާއީލާ ދެކޮޅަށް ހަރުކޮށްފައި ހުރި ބޯޑެއް، އެ ރަށަށް ގޮސް ތިބި އިސްރާއީލުގެ ޓޫރިސްޓުންތަކެއް ހަލާކުކޮށްލި މައްސަލާގައި އެ މީހުންނާ ދެކޮޅު ހެދުމަށް އެ ރަށަށް އެރި ބަޔަކު ފުލުހުން ހައްޔަރު ކުރުމުން މިރޭ މެންދަމު މާލެ ތެރެ "ހަލަބޮލިކޮށްލައިފި" އެވެ.

ސުނާމީ ބިނާ ސަރަހައްދުން މިރޭ މެންދަމު އެކެއް ޖެހިފަހުން ފެށި މުޒާހާރާގައި ރައީސް އަބްދުﷲ ޔާމިން އަބްދުލް ގައްޔޫމް ދިރިއުޅުއްވާ ގ. ދޫވެހި ކައިރިއަށް އެއްވެ، އަޑުގަދަކޮށްފައިވެ އެވެ. ސައިކަލުތަކުގައި މާލެ ތެރޭގައި ދުއްވަމުންދާ މީހުން ވަނީ ފުލުހުންގެ މައި މަރުކަޒު ޝަހީދު ހުސައިން އާދަމް ބިލްޑިންގ ކައިރިއަށް ވެސް ޖަމާވެ، ތުލުސްދޫއިން ހައްޔަރު ކުރި މީހުން ދޫކޮށްލުމަށް ގޮވާލާފަ އެވެ.

އިސްރާއީލު ޓޫރިސްޓުން ހައްޔަރުކޮށް، ތުލުސްދޫއިން ހައްޔަރު ކުރި މީހުން މިނިވަން ކުރުމަށް ގޮވާލައި މުޒާހަރާ ކުރާ މީހުން ވަނީ ފޮރިން މިނިސްޓްރީ ކައިރީއަށް އެއްވެ، އިސްރާއީލުގެ ދިދަ އަންދާލާފަ އެވެ. އަދި ފުލުހުންގެ މަރުކަޒެއް ކަމަށްވާ އިސްކަންދަރު ކޮށި ކައިރިއަށް އެއްވެ، ފުލުހުނާ ދެކޮޅަށް އެ މީހުން ވަނީ އަޑު އުފުލާފަ އެވެ.

އިސްރޭލު ޓޫރިސްޓުން ރާއްޖެ އައުން ހުއްޓުވާލުމަށް ގޮވާލައި އަޑުއުފުލި މުޒާހަރާގައި އިސްލާމިކް މިނިސްޓަރު އަދި އަދާލަތު ޕާޓީގެ އިލްމުވެރިންގެ މަޖިލީހުގެ ރައީސް ޑރ. ޝަހީމް އަލީ ސައިދު ދިރިއުޅުއްވާ ގެކޮޅު ކައިރިއަށް ވެސް އެއްވެ، އެތަނުގައި ވެސް ވަނީ އިސްރާއީލުގެ ދިދަ އަންދާލާފަ އެވެ.