28 Jun 2014, 19:43
ބަރަކާތްތެރި ރަމަޟާން މަސް ފެށުމުގެ މުނާސަބަތުގައި، ރާއްޖޭގެ ލޮބުވެތި ރައްޔިތުންނަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ތަހުނިޔާ ފޮނުއްވައިފިއެވެ.
ބަރަކާތްތެރި ރަމަޟާންމަސް އަޅުގަނޑުމެންނާ ބައްދަލުކުރުމުގެ ހެޔޮ ތައުފީޤު މިންވަރު ކުރެއްވި ކަމަށްޓަކައި މާތްﷲ ގެ ޙަޟްރަތަށް ޙަމްދާއި ޝުކުރު ދަންނަވާ ކަމަށް މިއަދު އެމަނިކުފާނު ފޮނުއްވި ތަހުނިޔާގެ މެސެޖުގައި ވެއެވެ. މި މާތް މައްސަރުގެ ތަހުނިޔާ، ރާއްޖޭގެ އެންމެހާ ލޮބުވެތި ރައްޔިތުންނަށް ދަންނަވައި، މި މައްސަރުގެ ހެޔޮއެދުންތައް އަޅުގަނޑު ވަރަށް އިޚްލާޞްތެރިކަމާއެކު ރައީސް ވަނީ ފޮނުއްވާފައެވެ.
ރަމަޟާން މަހަކީ، މާތްﷲ މަތިވެރި ކުރައްވާފައިވާ ވަރަށް މާތް ރޫޙާނީ މައްސަރެއް ކަމަށާއި އެހެންކަމުން، މި މާތް މައްސަރުގެ ބަރަކާތާއި ހެޔޮ ދަރުމަ ލިބިގަނެ، ރޯދައިގެ މަތިވެރި ވާޖިބު އަދާކޮށް، ޞަދަޤާތްދީ، ހެޔޮ ކަންތައްތައް އިތުރުކުރުމަކީ، އަޅުގަނޑުމެންގެ މައްޗަށް އޮތް ވާޖިބެއް ކަމުގައި އެމަނިކުފާނުގެ މެސެޖުގައި ވިދާޅުވެފައި ވެއެވެ. އަދި މިއީ ކީރިތި ޤުރްއާނުގެ މައްސަރު ކަމަށްވާތީ، ޤުރްއާނަށް އިތުރު އަހަންމިއްޔަތު ކަމެއް ދެއްވުމަށް، ރާއްޖޭގެ ރައްޔިތުންނަށް، މިމުނާސަބަތުގައި ރައީސް ޔާމީން ވަނީ އިލްތިމާސް ކުރައްވާފަ އެވެ.
ރާއްޖޭގެ ރައްޔިތުންނަކީ ޒަމާނުއްސުރެ މާތްވެގެންވާ އިސްލާމްދީނުގެ މަތިވެރި އުޞޫލުތަކަށް ފުރިހަމައަށް ބޯލަނބައި، އެ އުޞޫލުތަކުގެ މަތީގައި ހަރުދަނާކަމާއެކު ސާބިތުވެ ތިބި ބައެއް ކަމަށާއި އެހެންކަމުން، މި ބަރަކާތްތެރި ރަމަޟާން މަސް އަޅުގަނޑުމެންނާ ބައްދަލުކުރާއިރު، މިކަންކަމުގެ މަތިން ހަނދާންކޮށް، އިސްލާމީ ރީތި އުޞޫލުތަކަށާއި، މުޖްތަމަޢުގެ މަތިވެރި ހަމަތަކަށް ސަމާލުކަން ދެއްވުމަށްވެސް ރާއްޖޭގެ ރައްޔިތުންނަށް ރައީސް އިލްތިމާސް ކުރެއްވި އެވެ.
ރައީސްގެ މެސެޖުގައި ވިދާޅުވެފައި ވަނީ ރާއްޖޭގެ ޒަމާންވީ އާދަކާދައިގެ މަތިން، މި ބަރަކާތްތެރި ރަމަޟާން މަހަށް ރާއްޖޭގެ ރައްޔިތުން މިވަނީ ވަރަށް ބޮޑަށް ތައްޔާރުވެފައި ކަމަށާއި ހަމައެޔާއެކު، ރައްޔިތުންގެ ލުއިފަސޭހައަށްޓަކައި ސަރުކާރުންވެސް ވަރަށްގިނަ މަސައްކަތްތަކެއް ކޮށްފައިވާ ކަމަށެވެ. މިގޮތުން، ރާއްޖޭގެ ގިނަ އަދަދެއްގެ މިސްކިތްތައް، ރަމަޟާން މަހަށްޓަކައި މިވަނީ މަރާމާތު ކުރެވި، އާބާތުރަ ފިލުވާފައި ކަމުގައި އެމަނިކުފާނު ވިދާޅުވިއެވެ.
އަދި ރާއްޖޭގައި ޢާންމުކޮށް ބޭނުންކުރާ ކާބޯތަކެތި ފަސޭހައިން ރައްޔިތުންނަށް ލިބޭނެ އިންތިޒާމްތައް ހަމަޖައްސައި، އާންމުކޮށް ބޭނުންކުރާ ކާބޯތަކެތީގެ އަގުތައް، އާދަޔާ ޚިލާފަށް ބޮޑުވިޔަނުދީ ހިފެހެއްޓުމަށްވެސް ޚާއްޞަ ސަމާލުކަމެއް ދެމުން އަންނަ ކަމުގައި ވެސް އެމަނިކުފާނު ވިދާޅުވިއެވެ.
އެމަނިކުފާނުގެ އުންމީދަކީ، މިފެށުނު ބަރަކާތްތެރި ރަމަޟާން މަހަކީ، ހުރިހާ ގޮތަކުންވެސް އަޅުގަނޑުމެންނަށް ބާއްޖަވެރި މަހަކަށް ވެގެންދިޔުން ކަމުގައި ރައީސް ވިދާޅުވިއެވެ.
މާތްﷲ، މި ބަރަކާތްތެރި މައްސަރުގެ ރޯދަ ހެޔޮގޮތުގައި ހިފުމުގެ ހެޔޮ ތައުފީޤު އަޅުގަނޑުމެން އެންމެންނަށް ދެއްވާށި ކަމުގައި ރައީސް ވިދާޅުވިއެވެ. އަދި މި މައްސަރުގެ ބަރަކާތާއި ހެޔޮ ދަރުމަ މިންވަރު ކުރައްވާށި ކަމުގައި އެމަނިކުފާނު ވިދާޅުވިއެވެ.
ބަރަކާތްތެރި ރަމަޟާން މަސް ފެށުމުގެ މުނާސަބަތުގައި، އިސްލާމީ ޤައުމުތަކުގެ ވެރިންނަށާއި، ބައިނަލްއަޤްވާމީ އިސްލާމީ ޖަމާޢަތްތަކުގެ ވެރިންނަށް ވެސް ރައީސުލްޖުމްހޫރިއްޔާ ވަނީ ތަހުނިޔާ ފޮނުއްވާފައެވެ. އަދި އިސްލާމީ ޤައުމުތަކުގެ ވެރިންނާއި، ބައިނަލްއަޤްވާމީ އިސްލާމީ ޖަމްޢިއްޔާ ޖަމާޢަތްތަކުގެ ވެރިންވެސް މި މުނާސަބަތާ ގުޅިގެން ރައީސުލްޖުމްހޫރިއްޔާގެ އަރިހަށް ތަހުނިޔާ ފޮނުއްވަމުން ގެންދަވާ ކަމަށް ރައީސް އޮފީހުން ބުންޏެވެ.