26 Jun 2014, 15:30
ދިވެހިރާއްޖޭގެ ނާއިބް ރައީސް ޑރ. މުހައްމަދު ޖަމީލް އަހްމަދު، ސްރީލަންކާގެ ރައީސް މަހިންދަ ރާޖަޕަކްސައާ މިއަދު ބައްދަލުކުރައްވައިފިއެވެ.
އެ ބައްދަލުކުރެއްވުން އޮތީ، މިއަދު މެންދުރުކުރީގައި ކުރުނބާ މޯލްޑިވްސްގައެވެ.
އެ ބައްދަލުކުރެއްވުމުގައި، ރާއްޖެއާއި ސްރީލަންކާއާ ދެގައުމުގެ ދެމެދުގައި އޮތް ޒަމާންވީ ގާތް ރަހްމަތްތެރި ގުޅުމާއި، މިގުޅުން އިތުރަށް ބަދަހިކުރެއްވުމާ ބެހޭގޮތުން ދެބޭފުޅުން މަޝްވަރާ ކުރެއްވިއެވެ.
އެބައްދަލުކުރެއްވުމުގައި، ނާއިބް ރައީސް ޑރ. ޖަމީލް ދެއްކެވި ވާހަކަފުޅުގައި ސްރީލަންކާ ސަރުކާރުން ރާއްޖެއާމެދު ބަހައްޓަވާ ގާތް ކަމަށާއި، މިގުޅުން ދެމެހެއްޓުމަށްޓަކައި ސްރީލަންކާ ސަރުކާރާއި ރައްޔިތުން ކުރައްވާ މަސައްކަތްޕުޅަށާއި، ދިވެހިރާއްޖެއަށް ދެއްވާ އެއްބާރުލެއްވުމާއި އެހީތެރިކަމަށްޓަކައި ސްރީލަންކާގެ ރައީސަށާއި ސަރުކާރަށް ޝުކުރު އަދާކުރެއްވިއެވެ.
ސްރީލަންކާ ރައީސްގެ މިދަތުރުފުޅުގައި ދެގައުމުގެ ދެމެދުގައި ސޮއިކުރެވުނު ތިން އެއްބަސްވުމުގެ ސަބަބުން، ދެގައުމުގެ ގުޅުން އިތުރަށް ތަރައްގީވެގެން ދާނެކަމަށް އުންމީދު ކުރައްވާ ކަމުގައިވެސް ނާއިބް ރައީސް ވިދާޅުވިއެވެ.
ރައީސް ރާޖަޕަކްސަގެ ވާހަކަފުޅުގައި، ރާއްޖެއަށް ދަތުރުފުޅެއް ކުރެއްވުމަށް ދައުވަތު ދެއްވި ކަމަށްޓަކައި ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމަށާއި، ދިވެހި ސަރުކާރާއި ރައްޔިތުންނަށް ޝުކުރު އަދާކުރެއްވިއެވެ. އަދި، ރާއްޖެއިން ބޭނުންވާ ކަންކަމުގައި ސްރީލަންކާ ސަރުކާރުން އަބަދުވެސް އެހީތެރިކަމާއި އެއްބާރުލެއްވުން ދެއްވާނެކަމުގެ ޔަގީންކަންވެސް ރައީސް ރާޖަޕަކްސަ ދެއްވިއެވެ.