މިރޭ 8:15 އެހާކަންހާއިރު ހިނގި އެ ހާދިސާގައި އެއްވެސް މީހަކަށް ގެއްލުމެއް ނުލިބެ އެވެ. ނަމަވެސް 10 ބުރީގެ އެ އިމާރާތުގެ ޓެރެހުގައި ރޯވި އަލިފާންގަނޑުގައި އިމާރާތުގެ ޓެރަސް އަށް ވަނީ ބޮޑެތި ގެއްލުންތަކެއް ވެފަ އެވެ. އަލިފާން ރޯވި ވަގުތު އިމާރާތުގެ މަތިން ބިއްލޫރިތަކެއް ފޭބި އެވެ.

އެ އިމާރާތަށް ލިބިފައިވާ ގެއްލުމުގެ ތަފްސީލެއް އެމްއެންޑީއެފަކުން ހާމައެއް ނުކުރެ އެވެ.

ރިލެކްސް އިން ހޮޓެލުގައި ރޯވި އަލިފާންގަނޑު ފުލުހުންނާއި ސިފައިންގެ ފަޔާ އެންޑް ރެސްކިއު ގުޅިގެން ނިއްވާލީ މަސައްކަތް ފެއްޓިތާ 15 ވަރަކަށް މިނިޓްތެރޭގަ އެވެ.

އެމްއެންޑީއެފްގެ ސާޖަންޓް މުހައްމަދު ފާރިޝް ނޫސްވެރިނަށް މައުލޫމާތު ދެއްވަމުން މިރޭ ވިދާޅުވީ އަލިފާނުގެ ހާދިސާ ހިނގިކަމުގެ މައުލޫމާތު ލިބުމާ އެކު އެ ސަރައްދަށް ގޮސް އަލިފާންގަނޑު ނިއްވުމުގެ މަސައްކަތް ފެށި ކަމަށެވެ. އަދި އެ ހާދިސާ ހިނގުމާ އެކު އެ ތަނުގައި ތިބި މީހުން އެ އިމާރާތުން ނެރެ ލިފްޓް ނިއްވާލި ކަމަށް އޭނާ ވިދާޅުވި އެވެ. އަދި އަލިފާންގަނޑު ނިއްވާލުމުގެ މަސައްްކަތްފެށިތާ ގިނަ އިރުތަކެއް ނުވެ އަލިފާން ގަނޑު އެއްކޮން ނިއްވާލެވިފައިވާ ކަމަށް އޭނާ ވިދާޅުވި އެވެ.

އަލިފާންގަނޑު ނިއްވާލާފައި ވަނީ ރިލެކްސް އިން ހޮޓެލާއި އިންވެގެން ހުރި އިމާރާތަކުން ފެންހޮޅި ގެންގޮސްގެން ކަމަށް ވެސް އޭނާ ވިދާޅުވި އެވެ.