04 Jun 2014, 10:30
ރައީސުލްޖުމްހޫރިއްޔާ، ޕޮލިސް އިންޓެގްރިޓީ ކޮމިޝަން (ޕީއައިސީ)ގެ މެންބަރު ކަމުގެ މަގާމަށް މާފަންނު ކުރޮޅި އާދަމް ޒާހިރުގެ ނަންފުޅު، ރައްޔިތުންގެ މަޖިލީހަށް މިއަދު ހުށަހަޅުއްވައިފި އެވެ.
ރައީސް އޮފީހުން އިއްޔެ ބުނީ ޕޮލިސް އިންޓެގްރިޓީ ކޮމިޝަނުގެ މެންބަރުންގެ ތެރެއިން މެންބަރަކު އިސްތިޢުފާ ދެއްވުމާ ގުޅިގެން އެ މަގާމު ހުސްވެފައިވާތީ، އެ މަގާމަށް ބޭފުޅަކު ޢައްޔަނު ކުރެއްވުމަށް ޓަކައި، އާންމުކޮށް އިއުލާނު ކުރެއްވުމުން، އެކަމަށް 19 ބޭފުޅަކު ކުރިމަތިލައްވާފައިވާ ކަމަށެވެ. އަދި ބުނެފައި ވަނީ ކޮމިޝަނަށް އައްޔަނުކުރާނެ މެންބަރުންގެ ނަންތައް ފޮނުވުމުގައި ޢާންމުކޮށް އިއުލާނުކޮށްގެން އެކަމަށް އިޖާބަދޭ މީހުންނާއި، ރައީސުލްޖުމްހޫރިއްޔާ އަށް ފެންނަ މީހުންގެ ތެރެއިން ނަންތައް ހޮވުމުގެ ފުރުޞަތު، ފުލުހުންގެ ޤާނޫނުގެ 22ވަނަ މާއްދާގެ (ރ)ގެ ދަށުން އޮންނަ ކަމަށެވެ. އެހެންވެ އެކަމަށް އިޖާބަދެއްވި ބޭފުޅުންގެ ތެރެއިން ރައީސުލްޖުމްހޫރިއްޔާ އަބުދުﷲ ޔާމީނު ހޮއްވަވާފައި ވަނީ، އާދަމް ޒާހިރުގެ ނަންފުޅު ކަމަށެވެ.
ޕޮލިސް އިންޓެގްރިޓީ ކޮމިޝަނުގެ މެންބަރުކަމުގެ މަޤާމަށް އިޢުލާނު ކުރެއްވުމުން، އެކަމަށް އިޖާބަ ދެއްވި 19 ބޭފުޅުންގެ ނަންފުޅުތައް ވެސް، ރައްޔިތުންގެ މަޖިލީހުގެ މަޢުލޫމާތަށް ޓަކައި ރައީސުލްޖުމްހޫރިއްޔާ ވަނީ ފޮނުއްވާފަ އެވެ.