ޑރ. މައުސޫމްގެ ބައްޕާފުޅު އަވަހާރަވެއްޖެ

03 Jun 2014, 15:21

ރައްޔިތުންގެ މަޖިލީހުގެ ކެލާ ދާއިރާގެ ކުރީގެ މެމްބަރު ޑރ. އަބްދުﷲ މައުސޫމްގެ ބައްޕާފުޅު މުހައްމަދު ރަޝީދު (ކެލާ ސީދިބެ) އިއްޔެ އަވަހާރަވެއްޖެ އެވެ. ސީދިބެ އަވަހާރަވީ އުމުރުފުޅުން 73 އަހަރުގަ އެވެ. ރާއްޖޭގައި ހިންގި ފުރަތަމަ ގާޒީކޯސް ނިންމެވުމަށް ފަހު، ހއ. އަތޮޅު އެކި ރަށްރަށުގައި އޭނާ ވަނީ ފަނޑިޔާރުކަން ކުރައްވައިފަ އެވެ. ސީނިއާ މެޖިސްޓްރޭޓަކަށް ހުންނެވުމަށް ފަހު 43 އަހަރުގެ ޚިދުމަތާ އެކު، އުމުރުފުޅުން 70 އަހަރުވުމުން ޝަރަފުވެރިކަމާ އެކު އޭނާ ރިޓަޔާ ކުރެއްވީ 2011 ވަނަ އަހަރު އެވެ.

ސީދިބެޔަކީ އުގެނުމަށް ބާރު އަޅުއްވައި ގައުމުގެ ތަރައްގީ އަށް ތައުލީމީ ޖީލެއްގެ މުހިންމު ކަމުގެ މަށްޗަށް ވަކާލާތު ކުރެއްވި ބޭފުޅެކެވެ. ކެލާ މަދުރަސަތުލް ޝައިޚް އިބްރާހީމްގެ ނާޒިރުކަން ކުރައްވައި ކިޔަވައިދިނުމާއި ތަފާތު ކުޅިވަރާއި ކަސްރަތުތައް ތައާރަފުކޮށްދިނުމުގެ އިތުރުން ދަރިވަރުންނަށް ވަރަށް ގިނަ މަސައްކަތްތަކެއް ސީދިބެ ވަނީ ދަސްކޮށްދެއްވާފަ އެވެ. ސީދިބެ ކުރެއްވި މަސައްކަތުގެ އަގު ވަޒަން ކުރައްވައި ސަރުކާރުން އޭނާ އަށް ތައުލީމަށް ޚިދުމަތްކުރުމުގެ އާންމުޚިދުމަތުގެ ގައުމީ އިނާމު ދެއްވާފައިވެ އެވެ.

ސީދިބޭގެ ބޭފުޅުންގެ ތެރެއިން ޓޫރިޒަމްގެ ދާއިރާ އިން ޕީއެޗްޑީ ހާސިލްކުރައްވާފައިވާ، މިހާރު ސަން އައިލެންޑް ރިޒޯޓުގެ ޖެނެރަލް މެނޭޖަރު ޑރ. މައުސޫމް ވަނީ ދައުލަތުގެ ވަޒީރުކަމުގެ އިތުރުން ރައްޔިތުންގެ މަޖިލީހުގެ މެންބަރުކަން ކުރައްވައިފަ އެވެ. އަދި ސީދިބޭގެ އަހުމަދު ނިޒާމަކީ ވެސް ރައްޔިތުންގެ ހާއްސަ މަޖިލީހާއި ރައްޔިތުންގެ މަޖިލީހުގެ ހއ. އަތޮޅުގެ މެންބަރުކަން ކުރެއްވި ބޭފުޅެކެވެ. ސީދިބޭ އަވަހާރަވި އިރު ދެ އަނބިކަނބަލުންނާއި ފަސް ފިރިހެން ބޭފުޅުންނާއި 12 ކާފަ ދަރިކަލުން ދުނިޔޭގައި އެބަ ތިއްބެވި އެވެ. ސީދިބޭގެ ފަސް ފިރިހެން ބޭފުޅުންނަކީ ތަފާތު ދާއިރާތަކުން ގައުމަށް ޚިދުމަތް ކުރައްވަމުން ގެންދަވާ ޚިދުމަތްތެރިންނެވެ.