އޭއެފްސީ ޗެލެންޖް ކަޕްގެ ސެމީ ފައިނަލްގެ ދެ ވަނަ މެޗުގައި ރާއްޖެ އަތުން 2-3 ލަނޑުން މޮޅުވެ މުބާރާތުގެ ފައިނަލްގެ ދެ ވަނަ ޖާގަ ފިލިޕީންސުން ހޯދައިފި އެވެ.

ފުރަތަމަ ހާފްގެ 19 ވަނަ މިނިޓްގައި ފިލިޕީންސަަށް މެޗުގެ ކުރި ހޯދައި ދިނީ ފިލިޕް ޖޭމްސް ޔަންގްހަޒްބަންޑް އެވެ. އެހެން ނަމަވެސް 37 ވަނަ މިނިޓްގައި މުހައްމަދު އުމޭރު ވަނީ ފިލިޕީންސް ގޯލަށް ލަނޑު ޖަހައި ނަތީޖާ ހަމަހަމަކޮށްދީފަ އެވެ.

ފިލިޕީންސުން މެޗުގައި ދެ ވަނަ ފަހަރަށް ކުރި ހޯދީ 39 ވަނަ މިނިޓްގައި ޖެރީ ރޫބެން ޖަހައިދިން ލަނޑުންނެވެ. އެ ލަނޑާއެކު ފުރަތަމަ 45 މިނިޓްގެ ކުޅުން ނިމިގެން ދިޔައީ 2-1 ލަނޑުން ފިލިޕީންސް ކުރީގައި އޮވެގެންނެވެ.

ދެ ވަނަ ހާފުގެ ކުޅުން ފެށިގެން ހަތް ވަނަ މިނިޓުގައި ރާއްޖެއަށް ލަނޑު ޖަހާނޭ ރަނގަޅު ފުރުސަތެއް ލިބުނެވެ. ފިލިޕީންސް ޕެނަލްޓީ އޭރިޔަ ތެރެއިން އެ ޓީމުގެ ކުޅުންތެރިއަކު ރާއްޖޭ ކެޕްޓަން އަލީ އަޝްފާގު (ދަގަނޑޭ)އަށް ފައުލުކުރުމާ ގުޅިގެން ރާއްޖެއަށް ވަނީ ޕެނަލްޓީއެއް ލިބިފަ އެވެ. އެހެން ނަމަވެސް ރާއްޖޭގައި ހުރި ޕެނަލްޓީ ޖަހާ އެންމެ ތަޖުރިބާކާރު އެއް ކުޅުންތެރިޔާ އިބްރާހީމް ފަޒީލު (އޮއްޕޮ) ފޮނުވާލި ޕެނަލްޓީ ފިލިޕީންސް ގޯލް ކީޕަރު، މުލާ ވަނީ އަތުން ޖަހައި ދިފާއުކޮށްފަ އެވެ.

ރާއްޖޭ ޓީމަށް ދެ ވަނަ ފަހަރަށް މެޗުގެ ނަތީޖާ ހަމަހަމަކޮށްދިނީ، ފަހު ހާފުގައި އޮއްޕޮގެ ބަދަލުގައި ކުޅެން އެރުވި، އަސަދުﷲ އަބްދުﷲ އެވެ. އަސަދުﷲ އެ ލަނޑު ކާމިޔާބު ކުރީ ފިލިޕީންސް ޕެނަލްޓީ އޭރިޔާ ތެރެއަށް އުމޭރު ނަގައިދިން ކޯނަރެއް ފުންނާބުން ޖަހައި ގޯލް ތެރެއަށް ފޮނުވާލައިގެންނެވެ. އެ ލަނޑު ކާމިޔާބު ކުރީ މެޗުގެ 66 ވަނަ މިނިޓްގަ އެވެ.

މެޗުގެ ފުރިހަމަ ވަގުތު ހަވަމަވި އިރު ދެ ޓީމް 2-2 އިން އެއްވަރުވެފައި އޮތުމުން ނަތީޖާ ނެރެން 15 މިނިޓްގެ ދެހާފު ކުޅެން ޖެހުނެވެ. ފިލިޕީންސުން ތިން ވަނަ ފަހަރަށް މެޗުގެ ކުރި ހޯދީ، މެޗުގެ 114 ވަނަ މިނިޓްގަ އެވެ. އެ ޓީމަށް މެޗުން މޮޅުވި ލަނޑު ޖަހައިދިނީ، ފަހު ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ކްރިސްޓޮފާ ރޮބާޓް އެވެ.

ފިލިޕީންސުން ރާއްޖެ މައްޗަށް 3-2 ލަނޑުން މި ހޯދި ކާމިޔާބީއާއެކު މުބާރާތުގެ ފައިނަލްގައި އެ ޓީމު ވާދަކުރަން ޖެހޭނީ ފަލަސްތީނާ އެވެ.

މުބާރާތުގެ ތިންވަނަ ހޮވާ މެޗުގައި ބުރާސްފަތި ދުވަހުގެ ރޭ 9:00ގައި ރާއްޖެ ވާދަކުރަން ޖެހޭނީ ސެމީގެ ފުރަތަމަ މެޗުން ފަލަސްތީނު އަތުން ބަލިވި އަފްޣާނިސްތާނާ ދެކޮޅަށެވެ.

ޗެލެންޖް ކަޕްގެ ފައިނަލްގައި ފަލަސްތީނާ ފިިލިޕީންްސް ވާދަކުރާ މެޗު އޮންނާނީ ހުކުރު ދުވަހުގެ ރޭ 9:00ގައި ގައުމީ ފުޓްބޯޅަ ދަނޑުގައެވެ.

ފައިނަލްގެ ދެވަނަ ޖާގަ މި ކަށަވަރު ކުރީ ފިލިޕީންސް.

މެޗު ނިމިއްޖެ. ފިލިޕީންސް 3-2 ރާއްޖެ.

އިތުރު 2 މިނިޓްގެ ކުޅުން ދީފި.

ހަމަ ނުޖެހުން ހިނގައިފި. ފިލިޕީންސް ޕެނަލްޓީ އޭރިޔާ ތެރެއިން އެޓީމު ކުޅުންތެރިއަކު އަސަދުﷲ އަށް ހަމަލާ ދިނީ.

މެޗުގައި ބާކީ 3 މިނިޓް.

ފިލިޕީންސް ކުޅުންތެރިއަކު ވެއްޓިފައި.

ފިލިޕީންސް ކުޅުންތެރިން ރާއްޖޭ ޕެނަލްޓީ އޭރިޔާ ތެރެއަށް ބޯޅަ ހުރަސްކޮށްލި އިރު ޕެޓްރިކް އެކަނި ހުރީ. އެނާ ބޮލުން ޖަހައި ފޮނުވާލި ބޯޅަ ބޭރަށް.

ބާކީ 4 މިނިޓް. ރާއްޖެ 2-3 ފިލިޕީންސް.

ރާއްޖެއަށް ހިލޭ ޖެހުމެއް. ފިލިޕީންސް ހާފު މެދެއްހާ ހިސާބުން.

ފިލިޕީންސް ކުޅުންތެރިން ދަނީ ކުޅުން ލަސްކުރުމަށް މަސައްކަތް ކުރަމުން.

ޝްރޮކް މިވަނީ ހޮކޭއަށް ފައުލުކޮށްފައި.

ފިލިޕީންސް ޕެނަލްޓީ އޭރިޔާ ތެރެއިން ދަގަނޑޭ ފޮނުވާލި ބޯޅަ ގޯލަށް އަމާޒެއް ނުވި.

ވެއްޓުނު މާޓީން ދަނޑުން ބޭރުކޮށްފައި ބަދަލުގައި ސައިމަން ގްރޭޓްވިޗް އަރުވައިފި.

ފިލިޕީންސް ކުޅުންތެރިއަކު ވެއްޓިފައި، ރާއްޖޭ ކުޅުންތެރިން ބޯޅަ ބޭރަށް ފޮނުވާލައިފި.

ރާއްޖޭއަށް ކޯނަރެއް. އުމޭރު ނަގައިދިން ކޯނަރު ފިލިޕީންސް ޕެނަލްޓީ އޭރިޔާ ތެރެއިން އަސަދުﷲ ބޮލުން ޖަހަން އެރީ. ބޯޅަ ދިޔައީ މާ މަތިން.

އެކްސްޓްރާ ޓައިމްގެ ދެވަނަ 15 މިނިޓްގެ ކުޅުން ފަށައިފި.

15 މިނިޓްގެ ދެވަނަ ހާފްގެ ކުޅުން ފަށަން ތައްޔާރުވަނީ.

ފުރަތަމަ 15 މިނިޓްގެ ކުޅުން ނިމިއްޖެ.

ފިލިޕްސް ނަގައިދިން ހުރަސް ޕެޓްރިކް ގޯލާ ދިމާއަށް ފޮނުވާލީ، ގޯލްތެރެއަށް ބޯޅަ ވައްދާލީ، ކްރިސް ރޮބާޓް.

ފިލިޕީންސް ލަނޑު ޖަހައިފި.

އިމްރާންގެ މޮޅު ސޭވެއް. ޔަންގްހަސްބަންޑް ފޮނުވާލި ބާރު ހަމަލާ އިމްރާން އަތުން ޖަހައި ކޯނަރަކަށް.

ދެޓީމުގެ ފަރާތުން ވެސް ވަރުބަލިކަން ފެންނަމުންދޭ. އިތުރު ވަގުތުގެ ފުރަތަމަ 12 މިނިޓް ކުޅެވިއްޖެ. ނަތީޖާ ބަދަލެއް ނުވޭ.

ސެންޓޭ ބޯޅަ ހިފައިގެން ފިލިޕީންސް ޕެނަލްޓީ އޭރިޔާ ތެރެއަށް ވަދެ، ހުރަސްކޮށްލެވޭތޯ ބެލީ، އެކަމަކު ފިލިޕީންސް ކުޅުންތެރިން ބޯޅަ ދިފާއުކޮށްފި.

ފިލިޕީންސް ޕެނަލްޓީ އޭރިޔާތެރެއަށް ސެންޓޭ ނަގައިދިން ހުރަސް އުމޭރުގެ ބޮލުން ޖެހޭ ވަރެއްނުވި.

ދަގަނޑޭ ބޯޅަ ހިފައިގެން ފިލިޕީންސް ޕެނަލްޓީ އޭރިޔާތެރެއަށް ދެމި ގަތްނަމަވެސް ފިލިޕީންސް ކުޅުންތެރިން ބޯޅަ ދިފާއުކުރީ.

ކުޑައްޓޭއަކީ ޝާފީއަށް އަނިޔާ ވެގެން އޭނާގެ ބަދަލުގައި ކުޅެން ނެރުނު ކުޅުންތެރިއެއް.

ކުޑައްޓޭއަށް ރީނދޫ ކާޑެއް.

ފިލިޕީންސަށް ކޯނަރެއް.

ރާއްޖޭ ކުޅުންތެރިން ހަމަލާއެއް. ފިލިޕީންސް އޭރިޔާ ތެރެއިން ދަގޭއަށް ލިބުނު ބޯޅަ ގޯލަށް ފޮނުވާލި ނަމަވެސް ކީޕަރު ދިފާއުކުރީ.

ސެންޓޭ ފިލިޕީންސް ޕެނަލްޓީއޭރިޔާ ތެރެއަށް ހުރަސްކޮށްލި ބޯޅަ އުމޭރު ބޮލުން ޖަހައި ފޮނުވާލީ. ގޯލަށް އަމާޒެއް ނުވި.

އިތުރު ވަގުތުގެ ފުރަތަމަ 15 މިނިޓްގެ ހާފްފެށި ރާއްޖެ ޓީމުން.

ދެޓީމް 2-2 އިން އެއްވަރު ވެގެން މެޗުގެ ދެވަނަ ހާފް ނިމިއްޖެ. ދެން ނަތީޖާ ނެރެން 15 މިނިޓްގެ ދެހާފް ކުޅޭނީ.

އިތުރު ވަގުތުގެ ފަހު މިނިޓްގެ ކުޅުން ކުރިއަށް ދަނީ.

ޝާފީއަށް އަނިޔާވެގެން ދަނޑުން ބާލަނީ.

ދަގަނޑޭ ވަރަށް ރީތިކޮށް ބޯޅަ ހޯދައިގެން ފިލިޕީންސް އޭރިޔާތެރެއަށް ވަދެ ފޮނުވާލި ބޯޅަ ކީޕަރު ދިފާއުކުރީ.

ނުރައްކާތެރި ހަމަލާއެއް. ފިލިޕް ރާއްޖޭ ގޯލް އޭރިޔާ ތެރެއިން އިންމަ ކައިރިން ނައްޓާލާފައި ފޮނުވާލި ބޯޅަ ގޯލް ރޮނގުމަތިން ރިލޭ ދިފާއުކުރީ.

އިތުރު ވަގުތުގެ 4 މިނިޓް ދީފި.

ފިލިޕީންސްގެ ސަޓޯއަށް ރާއްޖޭ ޕެނަލްޓީ އޭރިޔާ ބޭރުން އަކޫ މިވަނީ ފައުލް ކޮށްފައި.

މެޗުގެ 90 ވަނަ މިނިޓްގެ ކުޅުން ކުރިއަށް ދަނީ.

ދަގަނޑޭ ބޯޅަ ހިފައިގެން ފިލިޕީންސް އޭރިޔާ ތެރެއަށް ވަދެ ކީޕަރު ކަޓުވާލާފައި ދިނީ، އަސަދުﷲއަށް. އަސަދުﷲ ފޮނުވާލި ބޯޅަ ގޯލް ރޮނގުމަތިން ފިލިޕީންސް ކުޅުންތެރިއަކު ދިފާއުކުރީ. ރާއްޖެއަށް ލަނޑު ޖަހަން ލިނު ރަނުގެ ފުރުސަތެއް މި ގެއްލުނީ.

ދަގަނޑޭ ފިލިޕީންސްގެ ތިން ކުޅުންތެރިން ނައްޓާލާފައި، އެޓީމުގެ ޕެނަލްޓީ އޭރިޔާ ތެރެއަށް ވަދެ ބޯޅަ ފޮނުވާލަން އުޅުނު ނަމަވެސް ބޯޅަ ރަނގަޅަށް ފޮނުވައެއް ނުލެވުނު.

ފިލިޕީންސް ކުޅުންތެރިއެއް ރާއްޖޭ ޕެނަލްޓީ އޭރިޔާތެރެއަށް ނެގި ހުރަސް އެޓީމުގެ ޕެޓްރިކް ބޮލުންޖަހައި ފޮނުވާލި ބޯޅަ ގޯލްގެ ހުރަސް ދަނޑިމަތިން ބޭރަށް.

ފިލިޕީންސް ޕެނަލްޓީ އޭރިޔާ ތެރެއަށް ވަދެފައި ދަގަނޑޭ ފޮނުވާލި ބާރު ހަމަލާ ގޯލްގެ އަރިމަތީ ދަނޑީގެ ކައިރިން ބޭރަށް.

ގޯލް އޭރިޔާ ތެރެއަށް ފޮނުވާލި ބާރު ހިލޭ ޖެހުން އުމޭރު ދިފާޢުުކުރީ.

ރާއްޖޭ ޕެނަލްޓީ އޭރިޔާގެ އަރިމަތިން ފިލިޕީންސް ކުޅުންތެރިއަކަށް އަކޫ ފައުލް ކުރި ކަމަށް ބަލާފައި ފިލިޕީންސަށް ހިލޭ ޖެހުމެއް ދީފި.

ރާއްޖޭ ޕެނަލްޓީ އޭރިޔާގެ ބޭރުން ޝްރޮކް ފޮނުވާލި ބާރު ހަމަލާ ގޯލަށް އަމާޒެއް ނުވި.

ފިލިޕީންސް ޕެނަލްޓީ އޭރިޔާ ތެރެއަށް ސެންޓޭ ނަގައިދިން ހުރަސް އުމޭރުގެ ބޮލަށް އަރާގޮތެއް ނުވި.

ރާއްޖޭ ސަޕޯޓަރުން މިދަނީ މެދު ކެނޑުމެއް ނެތި ތަރުހީބުދެމުން. ހަމަ އެހެންމެ ދަނޑުން ބޭރުގައި މެޗު ބަލަމުން ގެންދާ ދިވެހި ރައްޔިތުންވެސް ގައުމީ ޓީމަށް ތަރުހީބު މެދު ނުކެނޑި ދެމުން ދަނީ.

ދަގަނޑޭ ފިލިޕީންސް ޕެނަލްޓީ އޭރިޔާގެ ބޭރުން ފޮނުވާލި ބޯޅަ ގޯލަށް އަމާޒެއް ނުވި.

އަސަދުﷲ ބޯޅަ ހިފައިގެން ފިލިޕީންސް ޕެނަލްޓީ އޭރިޔާ ތެރެއަށް ވަދެ ބޯޅަ ހުރަސްކޮށްލެވޭތޯ ބެލި. އެހެން ނަމަވެސް ކީޕަރު ދިފާއު ކުރީ.

ފިލިޕީންސް ޓީމުން ބަދަލެއް. އެޓީމުގެ އެންމެ މުހިއްމު ކުޅުންތެރިޔާ ޝްރޮކް ކުޅެން އެރުވީ، 22 ނަންބަރު ޕައުލްގެ ބަދަލުގައި.

އުމޭރު ނަގައިދިން ކޯނަރު ގޯލް އޭރިޔާތެރޭގައި ހުރެފައި އަސަދުﷲ ފައިގެ ފުންނާބުން ޖަހައި ގޯލް ތެރެއަށް ފޮނުވާލީ.

ރާއްޖެ ލަނޑު ޖަހައިފި.

ދަގަނޑޭ ފޮނުވާލި ހިލޭ ޖެހުން ފިލިޕީންސްގެ ވޯލް ހަދައިގެން ހުރި ކުޅުންތެރިއެއްގެ ގައިގައި ޖެހިފައި ކޯނަރަކަށް.

ފިލިޕީންސް ޕެނަލްޓީ އޭރިޔާގެ ކުޑަތަންކޮޅެއް ބޭރުން އެޓީމުގެ ކުޅުންތެރިއަކު ސެންޓޭއަށް ފައުލުކޮށްފި. ރާއްޖެއަށް ހިލޭ ޖެހުމެއް.

އަސަދުﷲ ބޯޅަ ހިފައިގެން ފިލިޕީންސް އޭރިޔާ ކުރިމަތިން ފޮނުވާލި ބޯޅަ ކީޕަރު މުލާ ހިފީ.

ރާއްޖެ ޓީމުން ބަދަލެއް. އޮއްޕޮގެ ބަދަލުގައި އަސަދުﷲ ކުޅެން އެރުވީ.

މެޗުގެ 60 މިނިޓްގެ ކުޅުން ނިމިއްޖެ. ރާއްޖެ 1-2 ފިލިޕީންސް.

ފިލިޕީންސް ކުޅުންތެރިން އަނެއްކާވެސް ރާއްޖޭ ގޯލަށް ނުރައްކާ ކޮށްފި. ޝާފީ ބޮލުން ކީޕަރަށް ދެވޭތޯ ޖެހިބޯޅަ ކޯނަރަކަށް ބޭރު.

ރާއްޖެއަށް ލިބުނު ކޯނަރަކުން ހަމަލާއެއް އުފެއްދޭތޯ މަސައްކަތްކުރި. އެހެން ނަމަވެސް އެޓީމުގެ ކުޅުންތެރިން ބޯޅަ ދިފާއުކޮށް ފޮނުވާލީ.

އޮއްޕޮ ފޮނުވާލި ޕެނަލްޓީ ކީޕަރުގެ އަތުގައި ޖެހިފައި ބޭރަށް. ރާއްޖެއަށް ގޯލް ޖަހާނޭ ރަނުގެ ފުރުސަތެއް ގެއްލުނީ.

ޕެނަލްޓީ ޖަހަނީ އޮއްޕޮ.

ރާއްޖެއަށް ޕެނަލްޓީއެއް. ދަގަނޑޭ ފިލިޕީންސް އޭރިޔާތެރެއަށް ވަދެގެން ދަނިކޮށް ފިލިޕީންސް ދެކުޅުންތެރިން ވެގެން ދަގަނޑޭ ވައްޓައިލީ.

ރާއްޖޭ ޕެނަލްޓީ އޭރިޔާ ތެރެއަށް ފިލިޕީންސް ކުޅުންތެރިން ނެގި ހުރަސް އެޓީމުގެ ފިލިޕް ޖޭމްސް ހުސްކޮށް ހުރެ ބޮލުން ފޮނުވާލި ބޯޅަ ގޯލަށް އަމާޒެއް ނުވި.

ރައްޖޭ ޓީމުން ނުރައްކާތެރި ހަމަލާއެއް. އަކޫ ޕެނަލްޓީ އޭރިޔާ ބޭރުން ފޮނުވާލި ބޯޅަ ކީޕަރު މުލާގެ އަތުގައި ޖެހިފައި ބޭރަށް ނުކުތް ބޯޅަ އެޓީމު ކުޅުންތެރިން ކޯނަރަކަށް ބޭރުކޮށްލީ.

ޕެޓްރިކް އެކަނި ބޯޅަ ހިފައިގެން ރާއްޖޭ ޕެނަލްޓީ އޭރިޔާ ބޭރުން ފޮނުވާލި ބޯޅަ ގޯލަށް އަމާޒެއް ނުވި.

އުމޭރު ބޯޅަހިފައިގެން ފިލިޕީންސް ޕެނަލްޓީ އޭރިޔާއާ ހަމައަށް ދިޔަ. އެހެން ނަމަވެސް ތަންކޮޅެއް ބާރަށް ކުރިއަށް ބޯޅަ ޖައްސާލެވުނީ. އެޓީމުގެ ކީޕަރު ބޯޅަ ހިފައިފި.

ރާއްޖޭ ޓީމުން ދެވަނަ ހާފް ފެށީ ބަދަލަކާއެކު. އަޑުބަރޭގެ ބަދަލުގައި ކުޅެން އެރުވީ އަކުރަމް އަބްދުލް ޣަނީ.

ދެވަނަ ހާފު ފަށައިފި.

ފުރަތަމަ ހާފް ނިމިއްޖެ. ރާއްޖެ 1-2 ފިލިޕީންސް.

ފިލިޕީންސުން އަނެއްކާވެސް ނުރައްކާތެރި ހަމަލާއެއް. ކީޕަރު އިމްރާން ދިފާއުކުރީ.

ފުރަތަމަ ހާފުގެ އިތުރު ވަގުތުގެ 2 މިނިޓް.

ދަގަނޑޭ ބޯޅަ ހިފައިގެން ފިލިޕީންސް އޭރިޔާތެރެއަށް ވަތް ނަމަވެސް ބޯޅަ ފޮނުވާލެވޭ ގޮތެއް ނުވި.

ދަގަނޑޭ ބޯޅަ ހިފައިގެން ފިލިޕީންސް ހާފުތެރެއިން ދަނިކޮށް އެޓީމު ކުޅުންތެރިން ފައުލުކޮށްފި.

ފިލިޕީންސުން ފޮނުވާލި ބާރު ހިލޭޖެހުން ގޯލް ދަނޑީގެ މަތީ ކަނާދިމާއިން ކުޑަތަންކޮޅެއް މަތިން ބޭރަށް.

ރާއްޖޭ ޕެނަލްޓީ އޭރިޔާގެ ކުޑަތަންކޮޅެއް ބޭރުން ފިލިޕީންސަށް ހިލޭ ޖެހުމެއް.

މިހާރު ގިނައިރު ކުޅެމުން މިގެންދަނީ ފިލިޕީންސް.

ދަގަނޑޭ ބޯޅަ ހިފައިގެން ދާންއުޅުމުގެ ތެރޭގައި ކޮންޓްރޯލް ނުވެގެން ގޮސް ފިލިޕީންސް ކުޅުންތެރިއެއްގެ ގައިގައި ޖެހުމުން ރެފްރީ މިވަނީ ދަގަނޑޭއަށް ރީނދޫ ކާޑެއް ދައްކާފައި.

ފިލިޕިންސުން ލަނޑު ޖަހައިފި.

ސެންޓޭ ވަރަށް ރީތިކޮށް ފިލިޕީންސް ޕެނަލްޓީ އޭރިޔާ ކުރިމައްޗަށް ވައްޓާލި ބޯޅަ އެހާރީތިކޮށް އުމޭރު ގޯލްތެރެއަށް ފޮނުވާލީ ކީޕަރު ކުރިއަށް އެރި ވަގުތު އޭނާގެ ބޯމަތިން.

އުމޭރު ލަނޑެއް ޖަހައިފި.

ދަގަނޑޭއަށް އަނެއްކާ ވެސް ރަނގަޅު ބޯޅައެއް. އެހެން ނަމަވެސް ބޯޅަ ލިބުނު އިރު ލައިންސްމަން ހުރީ ދިދަ ނަގާފައި.

ރާއްޖޭ ހާފްގެ މެދެއްހާ ހިސާބުން ފިލިޕީންސަށް ލިބުނު ހިލޭ ޖެހުމެއް.

އަމްދާނަށް ރީނދޫ ކާޑެއް.

ދަގަނޑޭ ފިލިޕީންސް ޕެނަލްޓީ އޭރިޔާތެރެއަށް ވަދެ ގޯލަށް ބޯޅަ ފޮނުވާލުމުގެ ކުރިން އެޓީމުގެ ކުޅުންތެރިން ބޯޅަ ބޭރުކޮށްލައިފި. ރާއްޖެއަށް ލިބުނު ރަނގަޅު ފުރުސަތެއް.

ދަގަނޑޭ ފިލިޕީންސް ޕެނަލްޓީ އޭރިޔާތެރެއަށް ނަގައިދިން ހުރަސް އެޓީމުގެ ރޮޓާ ދިފާއުކޮށް ފޮނުވާލީ.

ދަގަނޑޭއަށް ލޯންގް ޕާހެއް ދެވޭތޯ ސެންޓޭ މަސައްކަތް ކުރި ނަމަވެސް ސެންޓޭ ބޯޅަ ފޮނުވާލި އިރު ދަގަނޑޭ ހުރީ އޮފްސައިޑަށް ފައިބައި.

ފިލިޕީންސް ޕެނަލްޓީ އޭރިޔާ ތެރެއަށް ދަގަނޑޭ ބޯޅަ ހިފައިގެން ދެމިގަތް ނަމަވެސް ދަގޭ ބޯޅަ ފޮނުވާލުމުގެ ކުރިން ކީޕަރު މުލާ ބޯޅަ ދިފާއުކޮށްފި.

ދަގަނޑޭ ފޮނުވާލި ހިލޭ ޖެހުން މާ މަތިން ބޭރަށް.

ފިލިޕީންްސް ޕެނަލްޓީ އޭރިޔާ ބޭރުން އެޓީމު ކުޅުންތެރިއަކު ސެންޓޭއަށް ފައުލުކޮށްފި. ރާއްޖެއަށް ހިލޭ ޖެހުމެއް. ބޯޅަ ފޮނުވާލަނީ ދަގަނޑޭ

ފިލިޕީންސަށް ލަނޑު ޖަހައިދިނީ އެޓީމުގެ 10 ނަންބަރު ޔަންގްހަޒްބަންޑް.

ފިލިޕީންސް ލަނޑު ޖަހައިފި.

ފިލިޕީންސް ކުޅުންތެރިއަކާ ރާއްޖޭގެ ކެޕްޓަން ދަގަނޑޭއާ ދޭތެރޭ ކޮންމެވެސް ވަރެއްގެ ހަމަނުޖެހުމެއް ހިނގައިފި.

ފިލިޕީންސް ޕެނަލްޓީ އޭރިޔާ ތެެރެއަށް ސެންޓޭ ނަގައިދިން ރީތި ހުރަހެއް ގޯލްކީޕަރު މުލާ ދިފާޢުކޮށް ފޮނުވާލައިފި.

އަނެއްކާވެސް ފިލިޕީންސް ކުޅުންތެރިން ރާއްޖޭ ޕެނަލްޓީ އޭރިޔާ ތެރެއަށް ހުރަހެއް ނަގައިފި. ރާއްޖޭ ކުޅުންތެރިން ދިފާއުކޮށްފި.

ފިލިޕީންސުން މަސައްކަތް ކުރަމުން މިގެންދަނީ ރާއްޖޭ އޭރިޔާތެރެއަށް ދިގު ހުރަސްތަކެއް ނަގައިދީގެން އެޓީމު ކުޅުންތެރިން ލައްވައި ބޮލުން ޖެއްސުވޭތޯ.

އުމޭރު ފޮނުވާލި ބޯޅައަށް އަޑޭ ފުންމައިގެން އެރި ނަމަވެސް ކީޕަރު ބޯޅަ ދިފާއުކުރި. އަދި އޭރިޔާ ތެރެއިން ފިލިޕީންސަށް ޖެހުމެއް ދީފި.

ރާއްޖެއަށް ހިލޭ ޖެހުމެއް. ފިލިޕީންސް ޕެނަލްޓީ އޭރިޔާ ބޭރުން. ފޮނުވާލަނީ އުމޭރު.

ފިލިޕީންސުން ރާއްޖޭ އޭރިޔާ ތެރެއަށް ނެގި ކޯނަރު، އެޓީމުގެ ފިލިޕް ޖޭމްސް ބޮލުން ފޮނުވާލި ނަމަވެސް ކީޕަރު އިމްރާން ބޯޅަ ދިފާއުކުރީ. ނުރައްކާތެރި ހަމަލާއެއް.

ޕައުލް ފޮނުވާލި ހިލޭ ޖެހުން ރައްޖޭ ޕެނަލްޓީ އޭރިޔާ ތެރެއިން ރިލޭ ބޮލުން ޖަހައި ކޯނަރަކަށް ބޭރަށް.

ރައްޖޭ ޕެނަލްޓީ އޭރިޔާ ބޭރުން ފިލިޕީންސަށް ހިލޭ ޖެހުމެއް.

އުމޭރު ފޮނުވާލި ހިލޭޖެހުން ގޯލް ދަނޑީގައި ޖެހިފައި ބޭރަށް.

ދަގަނޑޭ ބޯޅަ ހިފައިގެން ފިލިޕީންސްގެ ޕެނަލްޓީ އޭރިޔާތެރެއަށް ވަންނަން އުޅެނިކޮށް އެޓީމު ކުޅުންތެރިން މިވަނީ ދަގަނޑޭއަށް ފައުލްކޮށްފައި. ޕެނަލްޓީ އޭރިޔާ ބޭރުން ރާއްޖެއަށް ހިލޭ ޖެހުމެއް.

ރާއްޖޭ ޓީމުން ވެސް އަވަސް ޕާސްތަކެއް ދީގެން ރީތި ކުޅުމެއް ކުޅެމުންދާއިރު ފިލިޕީންސް ކުޅުންތެރިން އެއްކޮށްހެން ކުރިއަށް އަރައިގެން ހަމަލާ އުފެއްދޭތޯ މިއުޅެނީ.

ރާއްޖޭ އޭރިޔާ ތެރެއަށް ފިލިޕިންސްގެ ޔަންގްހަޒްބެންޑް ނަގައިދިން ހުރަސް އެޓީމުގެ ޕައުލްގެ ފަޔަށް އަރާގޮތެއް ނުވި.

ރާއްޖޭ ގޯލަށް ފުރަތަމަ ހަމަލާ ފިލިޕީންސުން އުފައްދައިފި. އެޓީމުގެ ޕެޓްރިކް، ބޯޅަ ހިފައިގެން ރާއްޖޭ އޭރިޔާ ތެރެއަށް ވަދެ ބޯޅަ ފޮނުވާލަން އުޅެނިކޮށް އިންމަ ވަނީ ބޯޅަ ދިފާއުކޮށް ފޮނުވާލާފައި، އެ ބޯޅަ އަނެއްކާ ވެސް ލިބުނީ ފިލިޕީންސް ކުޅުންތެރިއަކަށް. އެހެން ނަމަވެސް ބޯޅަ ގޯލަށް އަމާޒެއް ނުވި.

މެޗު ފަށައިފި.

މެޗު ފެށުމަށް ދެޓީމު ދަނޑަށް އަރައިފި. ކިކްއޮފް ކުރަނީ ރާއްޖެ.

ރާއްޖޭގެ ގައުމީ ސަލާމް.

މިހަރު ކުރިއަށްދަނީ ފިލިޕީންސްގެ ގައުމީ ސަލާމް.

ޝަރަފްވެރި މެހެމާން ދެ ޓީމުގެ ކުޅުންތެރިންނާ ސަލާމް ކުރައްވައިފި.

މިރޭގެ މެޗުގެ ޝަރަފްވެރި މެހެމާނަކީ ނައިބް ރައީސް ޑރ. މުޙައްމަދު ޖަމީލް އަހްމަދު.

ދެޓީމުގެ ކުޅުންތެރިން ދަނޑަށް ނުކުމެއްޖެ.

މެޗު ފަށަން 12 ވަރަކަށް މިނިޓަށް ވެފައިވާއިރު، ގައުމީ ފުޓްބޯޅަ ދަނޑު މިވަނީ ދިވެހި "ރަތް" ސަޕޯޓަރުން ވަދެ ފުރާލާފައި. އަދި ހަމަ އެހެންމެ ބޮޑު ސްރީނުން މެޗު ބެލުމަށްޓަކައި މާފަންނު ޓްރެކް ދަނޑާއި ހެންވޭރު އަޑިޕާކާއި ޒުވާނުންގެ މަރުކަޒަށް ވެސް ވަނީ ގައުމީ ޖާޒީއާއި ރަތް ހެދުމުގައި ގިނަ ބަަޔަކު ޖަމާވެފައި.

ގައުމީ ޓީމުގެ ކޯޗު ޑްރާގޯ މަމިޗް ބުނެފައިވަނީ، މި މެޗު އުނދަގޫ ވާނެ ކަމަށް އަދި ހަމަ އެހެންމެ ވަރަށް ވާދަވެރި ވާނެ ކަމަށް. އެހެން ނަމަވެސް މި މެޗު ކާމިޔާބުކޮށް ފައިނަލުން ޖާގަ ހޯދޭފަދަ ރަނގަޅު "ޝޭޕެއް"ގައި ކަމަށް ގައުމީ ޓީމް އޮތީ.

މެޗަށް ނުކުތުމުގެ ކުރިން ފިލިޕީންސް ކޯޗު ތޯމަސް ޑޫލޭ ބުނެފައިވަނީ، މި މެޗަކީ ދެޓީމަށް ވެސް އުނދަގޫ އެހެން ނަމަވެސް ޝައުގުވެރި މެޗަކަށް ވާނޭ ކަމަށް.

ރާއްޖެއާއި ފިލިޕީންސް މީގެ ކުރިން ވާދަކޮށްފައި ވަނީ އެންމެ ފަހަރަކު. 2009 ވަނަ އަހަރު ޗެލެންޖް ކަޕް ކޮލިފައިންގައި މިދެޓީމު ގަލޮޅު ބޯޅަ ދަނޑުގައި ވާދަކުރި މެޗު 3-2 ލަނޑުން ކާމިޔާބު ކުރީ ރާއްޖެ.

ޗެލެންޖް ކަޕްގެ ސެމީފައިނަލްގައި މިރޭ ރައްޖެއާ ދެކޮޅަށް ފިލިޕީންސް ނުކުންނަ އިރު ފިލިޕީސްން މި މުބާރާތުގެ ފައިނަލުން ޖާގަ ހޯދާފައިވަނީ ގްރޫޕް ސްޓޭޖްގައި އެޓީމު ކުޅުނު ތިން މެޗުން ދެމެޗު ކާމިޔާބުކޮށް އަނެއް މެޗު އެއްވަރުކޮށް ޖުމުލަ ހަތް ޕޮއިންޓް ހޯދައިގެން ގްރޫޕްގެ އެއްވަނަ ޓީމުގެ ގޮތުގައި. އަދި ރާއްޖެ ސެމީން ޖާގަ ހޯދީ، ތިން މެޗުގެ ތެރެއިން އެއް މެޗުން މޮޅުވެ އެއްމެޗުން ބަލިވެ އެއްމެޗު އެއްވަރުކޮށް ޖުމުލަ ހަތަރު ޕޮއިންޓާއެކު ގްރޫޕްގެ ދެވަނަ ޓީމުގެ ގޮތުގައި.

ފިލިޕީންސާ ދެކޮޅަށް ރާއްޖޭ ޓީމުން ނެރޭ ފުރަތަމަ 11:
- އިމްރާން މުހައްމަދު (އިންމަ) ގޯލް ކީޕަރު
- އަމްދާން އަލީ
- ޝާފިއު އަޙްމަދު (ޝާފީ)
- މުޙައްމަދު ރަޝީދު (ހޮކޭ)
- ރިލްވާން ވަހީދު (ރިލޭ)
- އިބްރާހީމް ފަޒީލް (އޮއްޕޮ)
- މުޙައްމަދު އާރިފް (ބަކާ)
- މުޙައްމަދު އުމެއިރު ( އުމޭ)
- ޢަލީ އަޝްފާޤު (ދަގަނޑޭ) ކެޕްޓަން
- އަޝްހަދު ޢަލީ (އަޑޭ)
- ޢަލީ ފާސިރު (ސެންޓޭ)