އަފްޣާނިސްތާން ޓީމު ދަތުރު ކުރި ބަސް އެކްސިޑެންޓުވެ ކުޅުންތެރީންނަށް އަނިޔާވެއްޖެ

ބުލޮގު ޚުލާސާ

އަފްގާނިސްތާން ޓީމު އައްޑޫގައި ދަތުރުކުރަމުންދިޔަ ބަސް އެކްސިޑެންޓުވެ ބައެއް ކުޅުންތެރީންނަށް އަނިޔާވެއްޖެ އެވެ.

މި ވަގުތު އައްޑޫގައި ހުރި ސަންގެ ކުޅިވަރު ހޯސްޓް ސާއިދު އަހުމަދު ދެންމެ ބުނީ، މި އެކްސިޑެންޓް ހިނގީ ހެރެތެރެ އަށް ދިޔުމަށް ޓަކައި ހިތަދޫއިން ފުރައިގެން ފޭދޫ އަށް ދިޔަ މަގުމަތީގައި ހަންކެޑެ ބްރިޖު މަތީގައި ކަމަށެވެ.

ސަންގެ ކުޅިވަރު ހޮސްޓް ސާއިދު ދެންމެ ބުނީ ފަސް ކުޅުންތެރީންނާއި އެއް އޮފިޝަލުގެ އިތުރުން ފަސް ފުލުހަކަށް ވެސް އަނިޔާ ވެފައިވާ ކަމަށެވެ. މީގެ ތެރެއިން އެއް ފުލުހެއްގެ އަތް ބިނދިފައިވާ ކަމަށާއި ބަސް ދުއްވަން އިން ޑްރައިވަރަށް ވެސް އަނިޔާ ވެފައިވާ ކަމަށް ސާއިދު ބުންޏެވެ.

މި ހުރިހާ މީހުންނަށް ވެސް ފަރުވާ ދެމުން އަންނަނީ ހިތަދޫ ރީޖަނަލް ހޮސްޕިޓަލުގައި ކަމަށާއި ކުޅުންތެރީންގެ އެކްސްރޭ ނެގުމުގެ މަސައްކަތް މިހާރު ކުރިޔަށްދާ ކަމަށް ސާއިދ ބުންޏެވެ.

މި ހާދިސާ ހިނގާފައި މިވަނީ ބަސް ހިތަދޫއިން ނައްޓައިލިތާ 10 ވަރަކަށް މިނެޓުގެ ތެރޭގައި ކަމަށް އައްޑޫގައި ހުރި ސަންގެ ނޫސްވެރިޔާ ރިފްޝާން މައުލޫމާތުދެ އެވެ.

20:25

މިރޭ 11:00 ގައި އައްޑޫ އިން ފުރާނީ، ޗެލެންޖު ކަޕްގެ ގްރޫޕް ސްޓޭޖުން ކަޓާފައިވާ މިޔަންމާ އާއި ލާއޮސްގެ ޓީމް. އެ ފުލައިޓުގައި އަނިޔާވި ފުލުސް މީހާ ވެސް މާލެ ގެންނާނެ. ނަމަވެސް އަފްގާނިސްތާން ކުޅުންތެރިއަކަށް ސީރިއަށް އަނިޔާތަކެއް ލިބިފައި ނުވާތީ، އެ މީހުން މާލެ ގެނައުމާއެމު އަދި ގޮތެއް ނުނިންމާ.

މުބާރާތުގެ ސެމީއަށް ގޮސްފައިވާ އަފްގާނިސްތާން މާލެ އައުމަށް ހަމަޖެހިފައިވަނީ އަންނަ ހޯމަ ދުވަހު.

20:12އައްޑޫ ސިޓީން

އެކްސިޑެންޓުގައި އަތް ބިންދައިގެން ދިޔައީ މޮޓޯގޭޑުގެ ސައިކަލެއް ދުއްވި ފުލުހެއް. އަނިޔާވި ކުޅުންތެރިން މާލެ ގެނައުމަށް ޗާޓަރު ފުލައިޓެއް ހަމަޖައްސައިފި. މިރޭ 11:00 ގައި އެ ކުޅުންތެރިން މާލެ ގެންނާނެ.

މުހައްމަދު ނަޒީހުއައްޑޫ ސިޓީން

ހިތަދޫ ހޮސްޕިޓަލުގައި ފަރުވާދެމުންދާ ކުޅުންތެރިންގެ ހާލު، ބެލުމަށްފަހު މުހައްމަދު ނަޒީހު "ސަން"އަށް ބުނީ ކުޅުންތެރިންނަށް އެހާ ބޮޑު އަނިޔާތަކެއް ވެފައި ނުވާ ކަމަށް. ނަމަވެސް މިއަދު ކުޅުނު މެޗުގައި އަނިޔާވި އަފްޣާނިސްތާން އަހުމަދު އާރަޝް ހަތީފީ (މިޑްފިލްޑަރު، 18 ނަމްބަރު) އޭނާއަށް ފައިގެ ކުޑަ ހުޅަށް ގެއްލުންތަކެއްވެފައިވާ ކަމަށް.

ފިޒިކަލް އަނިޔާއަށް ވުރެ ބޮޑަށް، ނަފްސާނީ ގޮތުން ކުޅުންތެރިން ތިބީ ވަރަށް ބޮޑު ހާސް ކަމެއްގައި. ކުއްލިއަކަށް މިފަދަ ކަމެއް ހިނގުމުން.

20:00

ހޮސްޕިޓަލް ސަރަހައްދުން ފުލުހުންގެ މަސައްކަތަށް ހުރަސް އެޅި މީހަކު ހައްޔަރުކޮށްފި.

19:54އައްޑޫ ސިޓީން

އަފްޣާނިސްތާން ޓީމް މިރޭ މާލެ ގެންނާނެ ކަމަށް އެފްއޭއެމްގެ ރައީސް އިލްހާމް އަހުމަދު ދާދި ދެންމެއަކު ވިދާޅުވެއްޖެ. އޭނާ ވިދާޅުވި ގޮތުގައި ޓީމުގެ ހުރިހާ ކުޅުންތެރިން މާލެ ގެނައުމުގެ ބަދަލުގައި އިސްކަން ދޭނީ އަނިޔާވި ކުޅުންތެރިންނާއި އޮފިޝަލުން ގެނައުމަށް ކަމަށް.

19:46ހިތަދޫ ހޮސްޕިޓަލުން

އަނިޔާވި ކުޅުންތެރިންގެ މައުލޫމާތު އެފްއޭއެމުން ހާމަކޮށްފި. އަނިޔާވި މީހުންގެ ތެރޭގައި އަފްޣާނިސްތާން ކެޕްޓަން ހާރޫން ފަރުހުއްދީން (އަމީރީ) ވެސް ހިމެނޭ. އޭނާގެ ކަނައަތު ފައިގެ ކުޑަ ހުޅަށް އަނިޔާވެފައިވޭ.

އަނިޔާވި މީހުންގެ ތެރޭގައި އަފްޣާނިސްތާންގެ ހެޑް ކޯޗާއި މެނޭޖަރާއި މީޑިއާ އޮފިޝަލް ހިމެނޭ. އަދި އެ ޓީމުގެ ފައިސަލާއި ހަސްމަތުލްﷲ އާއި މުސްތަފާ އާއި މުސްތަފާ ހާދީ އަށް ވެސް ވަނީ އެ އެކްސިޑެންޓުގައި އަނިޔާވެފައި.

ޔޫތު މިނިސްޓަރު މުހައްމަދު މަލީހު ދާދި ދެންމެއަކު "ސަން"އަށް ވިދާޅުވީ އަފްޣާނިސްތާން ޓީމު ދަތުރުކުރި ބަސް އެކްސިޑެންޓުވި މައްސަލަ ގާތުންް ބަލަމުންދާ ކަމަށް. އެކްސިޑެންޓުގައި އަނިޔާވި ކުޅުންތެރިންނާއި އޮފިޝަލުންނަށް ދެވެން އޮތް އެހީތެރިކަމެއް ދިނުމަށް ސަރުކާރު ތައްޔާރަށް އޮތް ކަމަށް އޭނާ ވިދާޅުވި

އަނިޔާވި ކުޅުންތެރިންނާއި އޮފިޝަލުންނަށް ކުޅިވަރާ ބެހޭ މިނިސްޓްރީގެ ފަރާތުން ދެވެން އޮތް އެހީތެރިކަމެއް ދޭން ތައްޔާރު. މިކަން ހިނގައިދިޔަ ގޮތް ފުލުހުން މެދުވެރިކޮށް މިދަނީ ބަލަމުން.

19:21

އެފްއޭއެމްގެ އިސް އޮފިޝަލަކު މިރޭ ވިދާޅުވީ އެކްސިޑެންޓުގައި އަނިޔާވި ކުޅުންތެރިން މާލެ ގެނައުމަށް ކުރެވެން ހުރި ހުރިހާ މަސައްކަތެއް ކުރަމުންދާ ކަމަށާއި ސަރުކާރުން އެކަމަށް އެއްބާރުލުން ދެމުންދާ ކަމަށް.

19:20

އެކްސިޑެންޓުގައި އަނިޔާވި ކުޅުންތެރިން އައްޑޫ ސިޓީ، ހިތަދޫގައި ހުންނަ ރީޖަނަލް ހޮސްޕިޓަކަށް ދަނީ ފަރުވާދެމުން. އައްޑޫގައި ހުރި އެފްއޭއެމްގެ އިސް އޮފިޝަލެއް ކަމަށްވާ އިބްރާހިމް ރަޝީދު (ސަތޯ) ބުނީ އެކްސިޑެންޓުގައި އެއްވެސް ކުޅުންތެރިޔަކަށް ސީރިއަސް އަނިޔާއެއް ވެފައި ނުވާ ކަަމަށް

19:17އައްޑޫ ސިޓީން

އެކްސިޑެންޓުގައި ބަހުގައި ތިބި ފަސް ކުޅުންތެރިންނާއި ފަސް ފުލުހަކަށް އަނިޔާވި. އަދި ފުލުހެއްގެ އަތް ވެސް ބިންދައިގެން ގޮސްފައިވޭ.