13 May 2014, 19:52
ޖިންސީ ފުރައްސާރަ ކުރުމާއި ގޯނާކުރުން ހުއްޓުވުމުގެ ބިލާއި ޖިންސީ ކުށުގެ ބިލު ރައީސުލްޖުމްހޫރިއްޔާ ޢަބްދުﷲ ޔާމީން އަބްދުލްޤައްޔޫމް މިއަދު ތަޞްދީގު ކުރައްވައިފި އެވެ.
ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ގާނޫނަކީ، ވަޒީފާ އަދާކުރާ ތަންތަނާއި ތަޢުލީމުދޭ ތަންތަނާއި ޞިއްޙީ ޚިދުމަތްދޭ ތަންތަނާއި މިނޫން ވެސް އިޖްތިމާޢީ ޚިދުމަތްދޭ އެހެނިހެން ތަންތަނުގައި ދިމާވާ ޖިންސީ ފުރައްސާރަކުރުމާއި ގޯނާކުރުމުގެ ޢަމަލުތައް ހުއްޓުވުމަށް ބާރު އަޅާފައިވާ ގާނޫނެކެވެ. އެ ގާނޫނުގައި ޖިންސީ ފުރައްސާރަކުރުމާއި ގޯނާކުރުމަކީ ކޮބައިކަން ކަނޑައެޅައި އެފަދަ ކަންކަން ހުއްޓުވުމުގައި އެކި ފަރާތްތަކުގެ ޒިންމާ ބަޔާންކޮށް އެފަދަ ކަންކަމާ ގުޅިގެން އަޅާނެ ފިޔަވަޅުތައް އެ ގާނޫނުގައި ކަނޑައަޅާފައިވެ އެވެ.
ޖިންސީ ކުށުގެ ޤާނޫނަކީ ދިވެހި ރާއްޖޭގައި ޖިންސީ ކުށް ކަނޑައެޅުމާއި އެ ކުށާގުޅޭ އުސޫލުތައް ބަޔާންކުރުމުގެ ޤާނޫނެވެ.