Last Updated: 1 decade 2 year ago
އިސްކަންދަރު ކޮށީގައި މިއަދު ހަވީރު ބޭއްވި ނޫސްވެރީންގެ ބައްދަލުވުމުގައި ޑްރަގް އެންފޯސް ޑިޕާޓްމަންޓްގެ ހެޑް، ސްޕްރިންޓެންޑެންޓް އޮފް ޕޮލިސް މުހައްމަދު ރަޝީދު ވިދާޅުވީ އެ މައްސަލައާ ގުޅިގެން ހައްޔަރު ކުރި ހަތަރު ދިވެހީންގެ ތެރޭގައި ފުލުހަކު ވެސް ހިމެނޭ ކަމަށެވެ. އަދި ހައްޔަރު ކުރި ބިދޭސީންގެ ތެރޭގައި ބަނގުލަދޭޝްގެ ތިން މީހަކު ހިމެނޭއިރު ޕާކިސްތާނުގެ 11 މީހުން ހިމެނޭ ކަމަށް ވެސް އޭނާ ވިދާޅުވި އެވެ.
އޭނާ ވިދާޅުވީ ކަނޑުމަގުން ރާއްޖެ އެތެރެކޮށްފައި ވަނީ މަސްތުވާތަކެތީގެ ބާވަތެއް ކަމަށްވާ ހެރޮއިން ކަމަށާއި އެތަކެތި އެތެރެކޮށްފައި ވަނީ އީރާންގައި ރަޖިސްޓްރީވެފައިވާ "ހޮރުމޯޒް" ނަމަކަށް ކިޔާ ބޯޓަކުން ކަމަށެވެ. އަދި އެބޯޓަކީ ކަނޑުމަސް ބަރުކުރުމަށް މީގެކުރިން އެތަށްފަހަރަކު ރާއްޖެ އައިސްފައިވާ ބޯޓެއް ކަމަށް ވެސް ރަޝީދު ވިދާޅުވި އެވެ.
"އެ ބޯޓް ގާތްގަނޑަކަށް ރާއްޖެއާ 30 ނޯޓިކަލް މޭލު ކައިރިވުމުން އެ މައްސަލާގައި ހިމެނޭ ދިވެހިންނާއި ބަންގްލަދޭޝް މީހުން އއ.މަތިވެރި އާއި ދިމާލުން މަސް ދޯޏެއްގައި އެ ބޯޓާ ބައްދަލު ކުރޭ. އަދި އެތަނުން ބައްދަލުކޮށް އެތަކެތި ކުޑަ 'ޑިންގީ' އެއްގައި ނޭންގޭގޮތަށް ފައިބަރު ޖަހައިގެން ބަންދު ކުރުމަށްފަހު ޑިންގީ މަސްދޯންޏަށް ނަގައިގެން ހުޅުމާލެ ކައިރިއަށް އައުމަށްފަހު އެއިން ދެމީހަކު ޑިންގީގައި ހުޅުމާލެއަށް އާދޭ،" ރަޝީދު ވިދާޅުވި އެވެ.
އޭނާ ވިދާޅުވީ އެ މީހުންގެ ތެރެއިން ދެ މީހަކު ހައްޔަރުކޮށްފައި ވަނީ އއ. މަތިވެރި އާއި ދިމާލުން 30 ނޯޓިކަލް މޭލު ބޭރުން ޑިންގީއަކަށް މަސްތުވާތަކެތިލައިގެން ނޭނގޭގޮތަށް ފައިބަރު ޖަހުމަށްފަހު މަސްދޯންޏެއްގައި ހުޅުމާލެއަށް އެ ޑިންގީ ގެނެސް ހުޅުމާލެއަށް ފައިބަނިކޮށް ކަމަށެވެ.
އެ މައްސަލައާ ގުޅިގެން ފުލުހުން މިއަދު އާންމުކުރި ވީޑިއޯއެއްގައި، މަސްތުވާތަކެތި ރާއްޖެ އެތެރެކުރި ބޯޓުކައިރިއަށް ދިވެހި މަސްދޯނިގޮސް މަސްތުވާތަކެތި ހިފައިގެން އެނބުރި އައި ހުރިހާމަގެއް ފެނެއެވެ.
މަސްތުވާތަކެތި ރައްކާކުރުމަށްޓަކައި ޑިންގީގެ ބެއްދުމުގެ ތެރެއަށް ލައި ރައްކާކޮށްފައި ވަނިކޮށް، ފުލުހުންނަށް ޝައްކުކުރެވިގެން ކަރަންޓު ކީހަކާއި ގްރޭންޑަރު ފަދަ އާލާތްތައް ބޭނުންކޮށްގެން، ޑިންގީގެ ބެއްދުން ކަފާލި މަންޒަރު ވެސް އެ ވީޑިއޯ އިން ފެނެއެވެ.
އެ ބޯޓުން އަތުލައިގެންފައިވާ މަސްތުވާތަކެތީގެ މަގުމަތީ އަގު 36 މިލިއަން ރުފިޔާއަށް އަރާނެ ކަމަށާއި އަދި އެއަށް އިތުރު "ޕައުޑަރ" ތަށް އެއްކޮއްގެން ވިއްކައިފިނަމަ އެ ތަކެތީގެ އަގު 100 މިލިއަން ޑޮލަރަށް އަރާނެކަމަށްވެސް ރަޝީދު ވިދާޅުވި އެވެ.
އޭނާ ވިދާޅުވީ ތަހުގީގު ކުރިއަށްދާތީ އެ މައްސަލައިގެ އިތުރު ތަފްސީލް ދެވެން ނެތްކަމަށާއި ތަހުގީގު ނުމުމުން އެ މައްސަލައާ ގުޅޭ އެހެނިހެން މައުލޫމާތުތައް ނޫސްވެރީންނާ ހިއްސާކުރައްވާނެ ކަމަށެވެ.