ޗެލެންޖް ކަޕް: މުބާރާތް ހުޅުވާ މެޗުގައި ރާއްޖެއާ ދެކޮޅަށް މިޔަންމާ

ބުލޮގު ޚުލާސާ

ރާއްޖޭގައި އަންނަ މޭ މަހު ބާއްވާ އޭއެފްސީ ޗެލެންޖް ކަޕްގެ ގުރު ނެގުމުގެ ރަސްމިއްޔާތު ކުޑަ އިރުކޮޅެއްގެ ތެރޭގައި ޕެރަޑައިސް އައިލެންޑް ރިސޯޓުގައި ފެށޭނެ.

މިއަހަރުގެ ޗެލެންޖް ކަޕްގައި ރާއްޖޭގެ އިތުރުން ބައިވެރިވަނީ، މިޔަންމާ، ކިރްގިސްތާން، އަފްގާނިސްތާން، ފަލަސްތީން، ޕިލިޕީންސް، އަދި ތުރްކުމަނިސްތާނުގެ އިތުރުން ލާއޯސް.

19:21

އަންނަ މޭ މަހު ރާއްޖޭގައި ބާއްވާ އޭއެފްސީ ޗެލެންޖް ކަޕްގެ ގުރުގައި ރާއްޖެ ހިމެނޭ ގްރޫޕް އޭ، ފަޅީގައި ލައްވައިލީ، ފަލަސްތީނާއި މިޔަންމާ އަދި ކިރްގިސްތާނެވެ.

މުބާރާތް ހުޅުވާ މެޗުގައި މޭ މަހުގެ 19 ވަނަ ދުވަހު ރާއްޖެއާއި މިޔަންމާ، ވާދަކުރާއިރު މުބާރާތުގައި ރާއްޖެ ވާދަކުރާ ދެވަނަ މެޗުގައި މޭ މަހުގެ 21 ވަނަ ދުވަހު ނިކުންނާނީ، ކިރުގިސްތާނާ ދެކޮޅަށެވެ. އަދި ގްރޫޕް ސްޓޭޖްގައި ރާއްޖެ ކުޅޭ ފަހު މެޗުގައި މޭ 23 ވަނަ ދުވަހު ނުކުންނާނީ ފަލަސްތީނާ ދެކޮޅަށެވެ.

ޕެރަޑައިސް އައިލެންޑް ރިސޯޓުގައި މީގެ އިރުކޮޅެއް ކުރިން ނިމުނު ގުރުނެގުމުގެ ރަސްމިއްޔާތުގައި، ރާއްޖެ ހިމެނޭ ފަޅީގައި ލައްވައިލި މިޔަންމާ އަކީ 2004 ވަނަ އަހަރުގެ އޭޝިއަން ކަޕް ކޮލިފައިންގައި ރާއްޖެއާ ދެކޮޅަށް ވާދަކުރި ޓީމެކެވެ. އަދި ފަލަސް ތީނަކީ، ނޭޕާލް ގައި 2012 ވަނަ އަހަރު އޮތް ޗެލެންޖު ކަޕްގައި ރާއްޖެއާ އެއް ގްރޫޕެއްގައި ވާދަކުރި ޓީމެކެވެ.

މުބާރާތުގައި ރާއްޖެ ހިމެނޭ ގްރޫޕް އޭ ގެ މެޗުތައް ކުރިއަށް ގެންދާނީ، ގަލޮޅު ރަސްމީ ބޯޅަ ދަނޑުގަ އެވެ.

ދެ ގްރޫޕަކަށް ބަހާލައިގެން ކުރިއަށް ގެންދާ މުބާރާތުގެ ގްރޫޕް ބީގެ މެޗުތައް އައްޑޫ ޒޯން ސްޓޭޑިއަމްގައި ކުޅެން ހަމަޖެހިފައިވާއިރު އެ ގްރޫޕްގައި ހިމެނެނީ، ތުރުކުމަނިސްތާނާއި ފިލިޕިންސްއާއި އަފްޣާނިސްތާނުގެ އިތުރުން ލާއޯސް އެވެ.

މިއަދުގެ ރަސްމިއްޔާތުގައި ރާއްޖޭގެ ކުޅިވަރާ ބެހޭ ވަޒީރު މުހައްމަދު މަލީހު ޖަމާލު ވަނީ ވާހަކަފުޅު ދައްކަވައިފަ އެވެ.

އެމަނިކުފާނުގެ ވާހަކަފުޅުގައި، ފުޓްބޯޅައަކީ ރާއްޖޭގެ އެންމެ މަގުބޫލު ކުޅިވަރު ކަމަށްވާއިރު ޗެލެންޖު ކަޕްގެ ސަބަބުން ރައްޔިތުންގެ މެދުގައި އުފެދިފައިވާ ހަމަނުޖެހުންތައް ނެތި، ކުދިބޮޑު އެންމެހައި ރައްޔިތުންގެ މެދުގައި އުފާވެރިކަމާއި، އެކުވެރިކަމާއި އެއްބާރުލުން އުފެދިގެން ދާނޭކަމަށް އުއްމީދު ކުރައްވާ ކަމަށް ވިދާޅުވި އެވެ.

އަދި ރާއްޖޭގެ އިގްތިސާދަށާއި އެހެނިހެން ދާއިރާ ތަކަށް ވެސް ޗެލެންޖް ކަޕްގެ ސަބަބުން އެދެވޭ ރަނގަޅު އަސަރުތަކެއް ކުރާނޭ ކަން ފާހަގަކުރައްވަމުން މަލީހު ވިދާޅުވީ، މި މުބާރާތަކީ ކާމިޔާބު މުބާރާތަކަށް ހެދުމަށް އެންމެހައި ދިވެހިންގެ އެއްބާރުލުން ލިބޭނޭ ކަމުގެ ފުރިހަމަ ޔަގީންކަން އެބަ އޮތް ކަމަށެވެ.