ވަޅީގެ ހަމަލާގައި އަލްހާންގެ އުނަގަނޑުން ތިރި ވާގި ނެތިއްޖެ: އާއިލާ

ބުލޮގު ޚުލާސާ

ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު އަލްހާން ފަހުމީގެ ގަޔަށް ވަޅި ހަރައި ޒަހަމްކޮށްލައިފި އެވެ.

މިރޭ 9:00 ހާއިރު ވަޅި ހަރާފައި ވަނީ އާޓިފިޝަލް ބީޗު ސަރަހައްދުގައި ހުންނަ ބްރޭކްވޯޓާ ރެސްޓޯރަންޓް ތެރެއިންނެވެ. އަލްހާން ފަހުމީގެ ކޮއްކޮ ޝަޒްބާން ފަހުމީ "ސަން" އަށް ބުނީ ބޭބެގެ ބުރަކަށްޓަށް ވަޅި ހަރައި ޒަހަމްކޮށްލާފައިވާ ކަމަށާއި ބޭބެއަށް އޭޑީކޭގެ އެމެޖެންސީގައި ފަރުވާދެމުންދާ ކަމަށެވެ.

ފުލުހުންގެ މީޑިއާ އޮފިޝަލު ވިދާޅުވީ އެމައްސަލައާ ގުޅިގެން ކުށުގެ ވެށިން ޒުވާނަކު ހައްޔަރުކޮށްފައިވާ ކަމަށެވެ.

މަންޒަރު ދުށް މީހަކު ސަން އަށް ކިޔައިދެމުން ބުނީ އަލްހާން ގަޔަށް ވަޅިހެރުމާއި ގުޅިގެން ޕިކަޕަކަށް އަރުވައިގެން އޭނާ ގެންދިޔައީ އޭޑީކޭ ހޮސްޕިޓަލަށް ކަމަށާއި އެހިސާބުގައި ވަރަށް ގިނަ އަދަދަކަށް ލޭ ހުރި ކަމަށެވެ.

01:51

އޭޑީކޭގެ ޑޮކްޓަރުނާ ހަވާލާދީ އަލްހާންގެ އާއިލާ މެމްބަރަކު ބުނީ ވަޅީގެ ހަމަލާގައި އުނަގަނޑަށް ލިބުނު ގެއްލުމާ ގުޅިގެން އޮޕަރޭޝަން ރަނގަޅަށްކޮށްފިނަމަ އުނަގަނޑުން ތިރި ވާގި ނެތިފައިވާ މައްސަލަ "ރިކަވާވުމުގެ" ފުރުސަތު ބޮޑު ކަމަށް.

01:25އޭޑީކޭ ހޮސްޕިޓަލުން

ވަޅި ހެރުމުން ލިބުނު ޒަހަމްތަކަށް އިތުރު ފަރުވާ ހޯދުމަށް ސްރީލަންކާ އަށް ގެންދިޔުމަށް އަލްހާން އޭޑީކޭ ހޮސްޕިޓަލުން ނެރެގެން ގެންގޮސްފި

01:02

ވަޅި ހެރުމުގެ ހާދިސާއާ ގުޅިގެން އަލްހާން ފަހުމީ ފުލުހުންނަށް ބަޔާނެއް ދެއްވައިފި

23:54އޭޑީކޭ ހޮސްޕިޓަލުން

މައި ބަދައާ ގުޅިފައިވާ ނާރެއް ބުރިވުމުން އަލްހާންގެ ވައަތު ފައިގެ ވާގި ނެތިފައިވާ ކަމަށް އާއިލާގެ މެމްބަރަކު ދެންމެ ބުނެފި. ޑޮކްޓަރުންނާ ހަވާލާދީ އަލްހާންގެ ކޮއްކޮޔަކު ބުނީ އަލްހާންގެ މައިބަދައަށް ވަޅި ހެރުމުން ނާރެއް ބުރިވެ، އިތުރަށް ހާލު ގޯސްވަމުންދާ ކަމަށް.

އިތުރު ފަރުވާއަށް އަލްހާން ލަންކާއަށް ގެންދިއުމުގެ މަސައްކަތް ވަނީ ފަށާފައި. އާއިލާއިން ބުނާ ގޮތުގައި މިރޭ މެމްދަމު 1:10 ގައި ސްރީލަންކަން އެއާލައިންގައި އޭނާ ލަންކާއަށް ފޮނުވާލާނެ.

23:36

23:23އޭޑީކޭ ހޮސްޕިޓަލުން

އަލްހާންގެ މައިބަދަ ކައިރިއަށް ވަޅި ޖެހުމުން ހަށިގަނޑު ލޭ އައުން އަދިވެސް މަނާ ނުވޭ. މައިބަދައި ކައިރިއަށް ފުންކޮށް ވަޅި ހަރާފައި ހުރުމުން، ހަށިގަނޑުގެ މައި ނާރެއް ބުރިވެފައިވާ ކަމަށް ޑޮކްޓަރުން ބުނޭ.

23:18

އަލްހާނަށް ދިން ހަމަލާ ސިޔާސީ ޕާޓީތަކުން ކުށްވެރިކޮށްފި. އެމްޑީޕީ އާއި ޕީޕީއެމާއި އެމްޑީއޭއިން ވަނީ އަލްހާނަށް ދިން ހަމަލާ ކުށްވެރިކޮށްފައި.

ޖުމްހޫރީ ޕާޓީގެ ލީޑަރު ގާސިމް އިބްރާޙިމާއި އެ ޕާޓީގެ ނައިބު ލީޑަރު އިލްހާމް ދާދި ދެންމެއަކު އޭޑީކޭ ހޮސްޕިޓަލަށް ވަޑައިގެން އަލްހާންގެ އާއިލާއާ ބައްދަލުކޮށްފި.

22:56

އަލްހާން ގަޔަށް ވަޅި ހެރުމާ ގުޅިގެން އެމްޑީޕީ ޕާލަމެންޓްރީ ގްރޫޕުގެ މެމްބަރުން އެޑީކޭ ހޮސްޕިޓަލުގައި އެބަ ތިއްބެވި. ރައީސް ނަޝީދު ވެސް އޭޑީކޭއަށް ވަޑައިގެންނެވި.

22:54އޭޑީކޭ ހޮސްޕިޓަލުން

އަލްހާންގެ ހާލު މަޑުމަޑުން އަންނަނީ ރަނގަޅުވަމުން. ހާލު ސީރިއަސް ނަމަވެސް އަލްހާނަށް މިހާރު ވާހަކަދެއްކޭ. އޭޑީކޭއިން ބުނަނީ ވަޅި ހަރާފައި ވަނީ އަލްހާންގެ މައިބަދަ ކަރިއަށް. މިހާރު ވަނީ ސްކޭން ކުރަން ވައްދާފައި.

22:34

އަލްހާންގެ ގަޔަށް ވަޅިހެރުމުގެ މައްސަލައިގައި އިތުރު ދެމީހަކު ފުލުހުން ހައްޔަރުކޮށްފި.

22:15

އަލްހާންގެ ގަޔަށް ވަޅިހެރި މައްސަލައިގައި ކުށުގެ ވެށިން ފުލުހުން ހައްޔަރުކޮށްފައިވަނީ 18 އަހަރުގެ ޒުވާނެއް ކަމަށް ފުލުހުން މައުލޫމާތުދޭ. އަދި އެޒުވާނާ ހައްޔަރުކޮށްފައިވަނީ، އެސަރަހައްދުގައި ކުލަހެދުމުގައި ހަރަކާތްތެރިވި ދެ ފުލުހުން ކަމަށް ވެސް ފުލުހުން މައުލޫމާތުދޭ.

22:04

އަލްހާންގެ އާއިލާގެ މެންބަރަކު ދެންމެ ސަންއަށް ވިދާޅުވީ، އަލްހާންގެ ހާލު ވަރަށް ސީރިއަސް ކަމަށާއި، އޭނާއަށް ތޫނު އެއްޗަކުން ހަމަލާދީ ވަރަށް ފުންކޮށް ޒަހަމުކޮށްލާފައިވާ ކަމަށް. އަލްހާނަށް ފަރުވާދެމުން ދަނީ އޭޑީކޭގެ އިމަޖެންސީގައި.