ގަތަރުގައި ބެހެއްޓި ޒިދާންއަށް ނިސްބަތްވާ "ސްޓެޗޫ އޮފް ހެޑްބާޓް" ނަގައިފި

31 Oct 2013, 21:03

މި މަހުގެ ކުރީކޮޅުގައި ގަތަރުގެ ވެރިރަށް ދޯހާގެ އަތިރިމަތީ ސަރަހައްދެއްގައި ބެހެއްޓި، ފްރާންސްގެ ޒައިނުއްދީން ޒިދާން 2006 ވަނަ އަހަރުގެ ވޯލްޑް ކަޕް ފައިނަލްގައި އިޓަލީގެ މާކޯ މަޓެރާޒީއަށް ބޮލުން ހަމަލާދޭ މަންޒަރު ދައްކުވައިދޭ "ސްޓެޗޫ އޮފް ހެޑްބާޓް" އެތަނުން ނަގައިފި އެވެ.
http://www.sun.mv/albums/l_20976.jpg

ދުނިޔޭގެ އެންމެ ބޮޑު ފުޓްބޯޅަ މުބާރާތުގެ އެންމެ މަޝްހޫރުއެއް ވާހަކައެއްގެ ގޮތުގައި ދެކެވެމުންދާ އަދި ޒިދާންގެ ފުޓްބޯޅަ ކެރިއަރު ނިންމާލަން މެދުވެރިވި އެ ހާދިސާ ރަމްޒުކޮށްދޭ ގޮތަށް ދޯހާގެ އަތިރިމަތީގައި ރަންވަންލޯއިން ހަދާފައި ބަހައްޓާފައިހުރި ގާތްގަނޑަކަށް 16 ފޫޓުގެ އެ ބުދު ނެގުމަށް ނިންމީ ދޯހާގެ ރައްޔިތުން އެކަމަށް ނުރުހުން ފާޅުކުރުމުގެ ސަބަބުން ކަމަށް ރިޕޯޓުތައް ބުނެ އެވެ.
http://www.sun.mv/albums/l_20981.jpg
ރިޕޯޓުތައް ބުނާގޮތުގައި ދޯހާގެ އޮފިޝަލުން އެ ބުދު އެތަނުން ނެގުމަށް ނިންމުމާއެކު މި ހަފުތާގައި އެތަނަށް "ކްރޭން" ގެނެސްގެން މިއަދުގެ ވަގުތެއްގައި އެ ސްޓެޗޫ ނެގުމަށްފަހު އެތަން އެއްކޮށް ސާފުކޮށްފައިވާ ކަމަށެވެ.

ގަތަރުގެ ކަމާބެހޭ އެއްވެސް އިދާރާއަކުން އެކަމާ ބެހޭ ގޮތުން ބަހެއް ބުނެފައި ނުވާއިރު ބައެއް ރިޕޯޓުތައް ބުނެފައިވަނީ، "ސްޓެޗޫ އޮފް ހެޑްބާޓް" ނެގުމަށް އެގައުމުން ނިންމީ، އެފަދަ ތަކެތި ބެހެއްޓުމަކީ އިސްލާމް ދީނާ ޚިލާފް ކަމެއް ކަމަށްވާތީއާއި އަދި އެއީ ޝިރުކަށް ހުޅުވޭ ދޮރެއް ކަމަށް ބުނެ އެގައުމުގެ މުސްލިމުން ޝަކުވާކުރުމުން ކަމަށެވެ.
http://www.sun.mv/albums/l_20980.jpg
ފީފާ ވޯލްޑް ކަޕް 2022 ވަނަ އަހަރު ބޭއްވުމަށް ހަމަޖެހިފައިވާ ގަތަރުގައި މިމަހުގެ ކުރީ ކޮޅުގައި ބެހެއްޓި އެ ސްޓެޗޫ ތައްޔާރުކުރީ، އަދީލް އަބްދުއްސަމަދު ކިޔާ އަލްޖީރިއާގެ އަތްތެރި މަސައްކަތްތެރިއެކެވެ.
http://www.sun.mv/albums/l_20979.jpg
ސްޓެޗޫ ބެހެއްޓުމާ ދެކޮޅަށް ސޯޝަލް މީޑިއާގައި ގިނަބަޔަކު ފާޑުކިޔަމުން ދިޔައިރު، އަނެއްބައި މީހުން ބުނަމުންދަނީ އެފަދަ ބިނާއެއް ނެގުމަކީ ވަރަށް މޮޔަ ކަމެއް ކަމަށެވެ.

ދޯހާއަށް އެ ސްޓެޗޫ ގެންދިއުމުގެ ކުރިން އޭތި އެންމެ ފުރަތަމަ ދައްކާލާފައިވަނީ، ފްރާންސްގެ ވެރިރަށް ޕެރިހުގައި ހުންނަ މަޝްހޫރު ދާރުލްއާސާރެއް ކަމަށްވާ ޕޮމްޕިޑޯ އާޓް މިއުޒިއަމްގެ ބޭރުގަ އެވެ.