21 Oct 2013, 13:49
މިދިޔަ އަހަރުގެ ފެބުރުއަރީ އަށް ވަނަ ދުވަހު ގދ. ތިނަދޫ ޕޮލިސްޓޭޝަންގައި ހުޅުޖެހި މައްސަލައިގެ ތުހުމަތުގައި ދައުލަތުން ޓެރަރިޒަމްގެ ދައުވާ އުފުލާފައިވާ ހަތަރު ކުދީންގެ ޝަރީއަތް އަންނަ ހަފްތާއަށް ތާވަލް ކޮށްފި އެވެ.
ޖުވެނައިލް ކޯޓުގެ އިސް އޮފިޝަލަކު މިއަދު ވިދާޅުވީ އެ މައްސަލަ ތާވަލްކޮށްފައި ވަނީ މިމަހުގެ 30 ވަނަ ދުވަހަށް ކަމަށެވެ.
މިހާތަނަށް އެ މައްސަލައިގެ ޝަރީއަތް މެދުކަނޑާލާފައި އޮތީ ހައިކޯޓުން ނެރުނު ވަގުތީ އަމުރަކާ ގުޅިގެންނެވެ.
އެ ހަތަރު ކުދީންގެ މައްޗަށް ދައުލަތުން ޓެރަރިޒަމްގެ ދައުވާ އުފުލާފައި ވަނީ މިދިޔަ އަހަރުގެ ފެބްރުއަރީ އަށް ވަނަ ދުވަހުގެ ހަވީރުގެ ވަގުތެއްގައި ތިނަދޫ ޕޮލިސްޓޭޝަން ދޮށަށް އެއްވެ ފުލުހުންނަށް ހަމަލާދީ، ޕޮލިސްޓޭޝަންގެ އިމާރާތަށާއި މުދަލަށް ގެއްލުންދީފައިވާ ކަމަށް ތުހުމަތު ކުރެވޭތީ އެވެ.
އެ ކުދީންގެ މައްޗަށް ދައުވާ ސާބިތުކުރުމަށް ދައުލަތުން ހުށަހެޅި ހެކީންގެ ހެކިބަސް ވަނީ ނަގައިނިމިފަ އެވެ. އަދި އެ ކުދީން ދިފާއުގައި ހުށަހެޅި ބައެއް ހެކީންގެ ހެކިބަސް ވެސް ވަނީ ނަގާފަ އެވެ.
އަންނަ ހަފްތާގަގައި ބާއްވާ އަޑުއެހުމުގައި ވެސް އޮންނާނީ އެ ހަތަރު ކުދީން ދިފާއުގައި ހުށަހެޅި ހެކީންގެ ހެކިބަސް ނެގުމެވެ.
މިދިޔަ އަހަރުގެ ފެބްރުއަރީ އަށް ވަނަ ދުވަހު ތިނަދޫ ޕޮލިސްޓޭޝަންގެ އިތުރުން ގދ. އަތޮޅު ކައުންސިލްގެ އިދާރާ އާއި ތިނަދޫ ކޯޓުގައިވެސް ވަނީ ހުޅުޖަހައި އަންދާލާފަ އެވެ.