މީގެ 30 ގަޑިއިރު ކުރިން އިއްޔެ ހަވީރު ނެގި ނަމްބަރުތަކަށް އަލުން ގޮވަން ފަށައިފި. ހިދުމަތް ދެމުންދަނީ ޕީޕީއެމުން ހުށަހެޅި ގޮތަށް އިލެކްޝަންސުން އެއްބަސްވުމުން. އެއީ ރަޖިސްޓްރޭޝަންގެ ރަސްމީ ސުލިޕް އަންގާރަ ދުވަހު ލިބޭ ގޮތަށް ހަމަޖެއްސުމާއި މިރޭ ދޫކުރާ ވަގުތީ ސުލިޕްގައި ކޮމިޝަންގެ އޮފިޝަލުން ލިޔެފައިވާ އަތުލިޔުމުގެ ކައިރީގައި އިލެކްޝަންސްގެ ކޮމިޝަންގެ ނިޝާން ޖެހުމަށް.

ކޮމިޝަން ހިމެނޭ ސަރަހައްދަށް ބަޔަކު އެއްވެފައިތިބިއިރު، އެއްވެސް ހަމަނުޖެހުމެއް ނެތް. އަދި މިހާރު ދެބަސްވުމެއް ވެސް ނުހިނގާ. ފުލުހުން ވަނީ ރަޖިސްޓްރޭޝަން މައި އިދާރާ ކައިރީގައި ސަލާމަތީ ފިޔަވަޅުތައް ވަރުގަދަކޮށްފައި.

މަގުގެ ދެ ފަރާތުގައި ތިބި އެމްޑީޕީއާއި ޕީޕީއެމްގެ ސަޕޯޓަރުންގެ ކޮންމެވެސް ވަރަކަށް ދުރަށް ޖެއްސުމަށްފަހު، ބެރިކޭޑު ޖަހައިފި. މިހާރު އެއްވެސް ހަމަނުޖެހުމެއް ނުހިނގާ.

ރަޖިސްޓްރޭޝަން މައި އިދާރާގެ ބޭރުގައި އެއްވެފައިވާ ޕީޕީއެމްގެ ސަޕޯޓަރުންނާއި އެމްޑީޕީ މީހުންނާ ދެމެދު ހަމަނުޖެހުމެއް ހިނގައިފި. ފުލުހުންދަނީ ދެ ބައި މީހުން ދުރުކުރުމަށް މަސައްކަތް ކުރަމުން.

ފޯމް ހުށަހަޅަން ވަދެ ތިބި މީހުންނަށް ރަޖިސްޓްރީ ކުރާ ކައުންޓަރުތަކުގެ ކައިރިއަށް ދިއުމަށް ވަނީ ދަތިވެފައި. ވަކިވަކިން ނަމްބަރުތަކަށް ދެންމެ ގޮވި. ރިސެޕްޝަން ކައިރީގައި އެއްބަޔަކު މަޑުކޮށްގެން އެބަތިބި.

އަނެއްކާވެސް ދެބަސްވުން އުފެދިގެން ފޯމް ހުށަހަޅަން ވަތް ބައެއް މީހުން ފުލުހުން ނެރެން ފަށައިފި.

ރަޖިސްޓްރޭޝަންގެ ރަސްމީ ސުލިޕް އަންގާރަ ދުވަހު ލިބޭ ގޮތަށް މެނުއަލްކޮށް ރަޖިސްޓްރޭޝަންގެ ކަންކަން ކުރިއަށް ގެންދިއުމަށް ޕީޕީއެމުން އެއްބަސްވެއްޖެ. އަދި މިރޭ ދޫކުރާ ވަގުތީ ސުލިޕްގައި ލިޔެފައިވާ އަތުލިޔުމުގެ ކައިރީގައި އިލެކްޝަންސްގެ ކޮމިޝަންގެ ނިޝާން ޖެހުމަށް ވެސް ވަނީ އެއްބަސްވެފައި. އިރުކޮޅަކުން މެނުއަލްކޮށް ރަޖިސްޓްރޭޝަންގެ ކަންކަން ކުރިއަށް ގެންދާނެ.

އިއްޔެ ދޫކުރި ނަމްބަރުތަކާއެކު ވޯޓު ރަޖިސްޓްރީ ކުރަން ފޯމު ހިފައިގެން އައިސްތިބި މީހުން އިދާރާއަށް ވައްދަން ފަށައިފި. ނަމަވެސް އިލެކްޝަންގެ އޮފިޝަލުންނާއި ޕީޕީއެމްގެ ސަޕޯޓަރުންނާ ދެމެދު އެއްބަސްވުމަކަށް ނާދެވޭ.

ރެޖިސްޓްރޭޝަންގެ މަސައްކަތް މިވަގުތަށް ހުއްޓާލި ކަމަށް އާސިމް ވިދާޅުވެއްޖެ. އިލެކްޝަންސްގެ މުވައްޒަފުނާއި ފުލުހުން ފިޔަވައި ހުރިހާ އެންމެން އިދާރާއިން ނެރެފި

މެނުއަލްކޮށް ނުވަތަ އޮފްލައިންކޮށް ރެޖިސްޓްރޭޝަން ބަލައިގަތުމަށް ފުރުސަތު ދިނުމަށް އިލެކްޝަންސުން އެދިއްޖެ. މެނުއަލްކޮށް، ފޯމް ބަލައިގަތްކަމުގެ ލިޔުން ހަވާލު ކުރާނެ ކަމަށާއި އަންނަ ބުދަ ދުވަހު ރަޖިސްޓްރީ ކުރި ކަމުގެ ރަސްމީ ލިޔުން ހަވާލު ކުރާނެ ކަމަށް އިލެކްޝަނުން ބުނި. ނަމަވެސް ޕީޕީއެމުން އެކަމަށް އެއްބަހެއް ނުވެ.

ރެޖިސްޓްރޭޝަން މައި އިދާރާ ތެރޭގައި ތިބި ޕީޕީއެމްގެ މަޖިލިސް މެންބަރުން ބުނަމުންދަނީ، ފޯމް ބަލައިގަންނަން ޖެހޭނީ އޮންލައިކޮށް ކަމަށާއި މީގެ ކުރިން ވެސް ފޯމް ބަލައިގެންފައިވަނީ އެގޮތަށް ކަމަށް. ރެޖިސްޓްރީ ކުރުމަށް މިވަގުތު އެތަނުގައި ގޮސް ތިބި މީހުންގެ ތެރެއިން ގިނައީ ޕީޕީއެމް މީހުން.

އިލެކްޝަންސް ރަޖިސްޓްރޭޝަން މައި އިދާރާގައި ފުލުހުން ދަނީ ސަލާމަތީ ފިޔަވަޅުތައް ވަރުގަދަ ކުރަމުން. ރަޖިސްޓްރީ ކުރުމަށް އިއްޔެ ދޫކުރި ނަމްބަރުތައް އަދިވެސް ނުޖެހިގެން، ފޯމް ހުށަހެޅުމުގެ އިންތިޒާރުގައި ބަޔަކު އެތަނުގައި އެބަތިބި. ރަޖިސްޓްރީ ކުރުމަށް އެ އިދާރާ ތެރެއަށް އިތުރު ބަޔަކު އަދި ނުވައްދާ.

މެނުއަލްކޮށް ރެޖިސްޓްރޭޝަން ކުރިއަށް ގެންދާތީ ކަންބޮޑުވުން ފާޅު ކުރަން ފަށައިފި. ރަށްވެހިވެފައިވާ ރަށް ނޫން އެހެންތަނެއްގައި ވޯޓުލުމަށް ރެޖިސްޓްރީ ކުރުމުގެ ކަންތައްތައް މެދުނުކެނޑި ކުރިއަށް ގެންދަނިކޮށް، އިލެކްޝަންސްގެ ސިސްޓަމް ޑައުންވުމުން، މެނުއަލްކޮށް ރެޖިސްޓްރީ ކުރިއަށް ގެންދިއުމާ ގުޅިގެން ރެޖިސްޓްރޭޝަންގެ މައި އިދާރާ ދޮށަށް އެއްވެ ބަޔަކު ދަނީ ކަންބޮޑުވުން ފާޅުކުރަމުން. އެތަނަށް ގިނައިން އެއްވެ ތިބީ ޕީޕީއެމްގެ ސަޕޯޓަރުން. އެމްޑީޕީގެ ބަޔަކުވެސް އެ ސަރަހައްދުގައި އެބަތިއްބި.

މެނުއަލްކޮށް ރެޖިސްޓްރޭޝަން ކުރިއަށް ގެންދާތީ ރެޖިސްޓްރޭޝަން އިދާރާގެ ތެރޭގައި ކަންބޮޑުވުން ފާޅުކޮށް، ޕީޕީއެމް/އެމްޑީއޭ ކޯލިޝަންގެ މެންބަރުންދަނީ ހަރަކާތްތެރިވަމުން. މިހާރު ވަނީ ރަޖިސްޓްރީ ކުރުން ހުއްޓިފައި.