އޭއެފްސީ ކަޕުގެ ކުއާޓާ ފައިނަލުގެ ފުރަތަމަ ލެގުގައި އެންމެ ފަހުގެ ޗެމްޕިއަން ކުވެއިތު ސްޕޯޓްސް ކްލަބް އަތުން 7-2 ލަނޑުގެ ތަފާތު ބޮޑު ނަތީޖާއަކުން ރާއްޖޭގެ ނިއުރޭޑިއަންޓް ސްޕޯޓްސް ކުލަބް ބަލިވެއްޖެ އެވެ.

ގަލޮޅު ދަނޑުގައި މިއަދު ހަވީރު ކުޅުނު މެޗުގެ ފުރަތަމަ ލަނޑު މެޗުގެ ދެ ވަނަ މިނެޓުގައި ކުވައިތު ޓީމަށް ކާމިޔާބު ކޮށްދިނީ ކޫޓީނިއޯ އެވެ.

ކުވައިތު ޓީމުގެ ފަރާތުން މެޗުގެ ފުރަތަމަ ހާފުގައި މޮޅު ކުޅުމެއް ފެނިގެން ދިޔައިރު، އެޓީމުން ފުރަތަމަ ހާފް ނިއްމާލީ ނިއު ކޮޅަށް ހަ ލަނޑު ޖެހުމަށް ފަހު އެވެ. ކުވައިތުގެ ދެ ވަނަ ލަނޑު މެޗުގެ 16 ވަނަ މިނެޓުގައި އެޓީމަށް ކާމިޔާބު ކޮށްދިނީ ހައްމާމީ އެވެ. އަދި ކުވައިތުގެ ތިން ވަނަ ލަނޑު އެޓީމަށް ކާމިޔާބު ކޮށްދިނީ ނިއު ކޮޅަށް ފުރަތަމަ ހާފުގައި ހަތަރު ލަނޑު ޖެހި ކުވައިތު ޓީމުގެ 17 ނަންބަރު ކުޅުންތެރިޔާ އެވެ. މެޗުގައި ނިއު ކޮޅަށް ކުވޭތު ޓީމުން ޖެހި ހަތް ވަނަ ލަނޑު ދެ ވަނަ ހާފުގައި ލިބުނު ޕެނަލްޓީއަކުން އެޓީމަށް ކާމިޔާބު ކޮށްދިނީ ހަމާމީ އެވެ.

މިއަދުގެ މެޗުގައި ނިއު އިން ކުވޭތު ކޮޅަށް ޖެހި ދެ ލަނޑު ވެސް ކާމިޔާބު ކުރީ މެޗުގެ ދެ ވަނަ ހާފުގަ އެވެ. އެގޮތުން ނިއުގެ ފުރަތަމަ ލަނޑު ކާމިޔާބު ކޮށްދިނީ އަލީ ފާސިރު (ސެންޓޭ) އެވެ. ދެ ވަނަ ލަނޑު ކާމިޔާބު ކޮށްދިނީ އަލީ އަޝްފާގް (ދަނގަޑޭ) އެވެ.

މިއަދުގެ މެޗުން ނިއު ބަލިވުމުން އެޓީމަށް ސެމީ ފައިނަލަށް ދިއުމުގެ ފުރުސަތު ވަނީ ވަރަށް ބޮޑަށް ހަނިވެފަ އެވެ.

މިއަދުގެ މެޗުގައި ކުވައިތު ޓީމުގެ ކުޅުންތެރިއަކާއި ނިއުގެ މުހައްމަދު އުމައިރަށް ވެސް ރެފްރީ ވަނީ ރަތް ކާޑު ދައްކާ ދަނޑުން ފޮނުވާލައިފަ އެވެ. އަދި މިއަދުގެ މެޗުގެ 63 ވަނަ މިނެޓުގައި ނިއުއަށް ލިބުނު ޕެނަލްޓީ އަލީ އަޝްފާގް (ދަގަނޑޭ) ޖެހީ ބޭރަށެވެ.

މިއަދު މެޗުގެ ފުރަތަމަ ހާފުގައި އިރާންގެ ރެފްރީ ވަނީ ނިއުގެ ކޯޗް ޕޮޕޯފް ދަނޑުން ފޮނުވާލައިފަ އެވެ. ޕޮޕޯފް ދަނޑުން ފޮނުވާލީ ރެފްރީގެ ނިންމުންތަކާ މެދު ތަކުރާރުކޮށް ހިތްހަމަނުޖެހުން ފާޅުކުރުމުން ނެވެ.

ކުވޭތު ޓީމުގައި ފާހަގަ ކޮށްލެވޭ ބައެއް ކުޅުންތެރިންގެ ތެރޭގައި ޓިއުނީޝިޔާގެ ފޯވަޑަކާއި ބްރެޒިލްގެ ޑިފެންޑަރަކާއި ބަހުރޭނުގެ ކުޅުންތެރިއަކު ވެސް ހިމެނެ އެވެ. ޓީމުގެ ކޯޗަކީ ރޫމޭނިޔާގެ މާރިން ލޮން އެވެ.

ކުއާޓާ ފައިނަލުގެ ދެ ވަނަ ލެގް ކުޅޭނީ މިމަހުގެ 24 ވަނަ ދުވަހު ކުވޭތުގަ އެވެ.

އޭއެފްސީ ކަޕްގެ ކުއާޓާ ފައިނަލުގެ ފުރަތަމަ ލެގުގައި ރާއްޖޭގެ ނިއުރޭޑިއަންޓާ ކުވައިތުގެ ކުވޭތްސްޕޯޓްސް ކުލަބް ބައްދަލުކުރާ މެޗުގެ ފުރަތަމަ ހާފުގެ ކުޅުން ނިމިއްޖެއެވެ. ފުރަތަމަ ހާފުގެ ކުޅުން ނިމުނުއިރު ނަތީޖާއަކީ ކުވައިތު 6 ނިއު 0 އެވެ.
މިނަތީޖާއަކީ މިސީޒަންގައި ނިއުކޮށް އެންމެ ގިނަލަނޑު ޖެހި މެޗެވެ. އަދި މިއަދުގެ ނަތީޖާއަކީ ނިއުގެ ސަޕޯޓަރުން އުންމީދު ކުރި ނަތީޖާއެއް ނޫނެވެ. މެޗުގެ ކުވައިތު ޓީމުގެ ޖޯޒީ ނަންބަރު 17 ވަނީ ހެޓްރިކް ހަދައިފައެވެ.