ނޭޕާލްގެ ވެރިރަށް ކަތުމަންޑޫގެ ދަސަރަތު ސްޓޭޑިއަމްގައި ރާއްޖެ ގަޑިން މިއަދު ހަވީރު 5:45 ގައި ކުޅުނު މެޗުގެ ފުރަތަމަ ލަނޑު ޖަހާ މެޗުގެ ލީޑް ނެގީ ރާއްޖެއިންނެވެ. އެލަނޑު ފުރާތަމަހާފުގެ 15 ވަނަ މިނެޓުގައި ރާއްޖެއަށް ކާމިޔާބު ކޮށްދިނީ އަލީ ފާސިރު (ސެންޓޭ) އެވެ.

މެޗުގެ ފުރަތަމަ ހާފުގައި ރާއްޖެ ލީޑް ނަގާފައި ވަނިކޮށް ބޫޓާނުން ވަނީ ފަހަތުން އަރައި ދެ ގޯލު ޖަހައި ކުރި ހޯދައިފައެވެ. އެހެން ނަމަވެސް މެޗުގެ ފުރަތަމަ ހާފް ނިމެން އުޅެނިކޮށް ރާއްޖެއަށް ލިބުނު ހިލޭ ޖެހުމަކުން މުހައްމަދު އުމޭރު ގޯލެއް ޖަހާ މެޗޗުގެ ނަތީޖާ 2-2 އަށް ހަމަހަމަ ކުރިއެވެ.

މެޗުގެ ފުރަތަމަ ހާފަށް ވުރެ ދެ ވަނަ ހާފުގައި ރާއްޖޭގެ ފަރާތުން މޮޅުކުޅުމެއް ފެނުނު އެ މެޗުގެ ލީޑް އަނެއްކާވެސް ރާއްޖެއަށް ހޯދަދިނީ މެޗްގައި ހަތަރު ލަނޑު ޖެހި ކެޕްޓަން ދަނގަޑޭ އެވެ.

ގްރޫޕްގެ ފުރަތަމަ މެޗުގައި ލަންކާ ކޮޅަށް ވެސް ދަނގަޑޭ ވަނީ ދެ ހެޓްރިކް ހަދައިފައެވެ. މުބާރާތުގައި ދަނގަޑޭ ޖެހި ގޯލުގެ އަދަދު މިހާރު ވަނީ 10 އަށް އަރާފައެވެ.

މިއަދުގެ މެޗުގައި ބޫޓާން ކޮޅަށް ރާއްޖެއިން ޖެހި އަނެއް ދެލަނޑު ކާމިޔާބު ކޮށްދިނީ ފުރަތަމަ ހާފުގައި ރާއްޖެއަށް ލީޑް ނަގައިދިން ކުޅުންތެރިޔާ ސެންޓޭ އާއި ދެ ވަނަ ހާފުގައި ކުޅެން ނިކުތް އަލީ އުމަރެވެ.

މިއަދު މޮޅާއެކު ގްރޫޕް ބީގައި ރާއްޖެ އޮތީ ހަ ޕޮއިންޓާއެކު ގްރޫޕްގެ އެއްވަނަ މަގާމް ގައެވެ. ދެ ވަނާގައި އަފްގާނިސްތާން އޮތީ ވެސް ހަ ޕޮއިންޓާއެކުގަ އެވެ. ނަމަވެސް ގޯލުގެ ތަފާތުން ކުރި ލިބެނީ ރާއްޖެ އަށެވެ. މިހެންވެ ގްރޫޕުގެ ކުރި ލިބޭނެ ޓީމެއް ޔަގީންވާނީ މި ދެ ގައުމު އަންނަ ހުކުރު ދުވަހުރާއްޖެ ގަޑިން 2:45 ގައި ކުލޭ މެޗަށްފަހު އެވެ.

ގްރޫޕް ބީގެ ފަހު މެޗުގައި ބައްދަލުކުރާނީ ލަންކާ އާއި ބޫޓާނެވެ. އެ މެޗް ކުޅޭނީ ހުކުރު ދުވަހު ރާއްޖެ ގަޑިން 5:45 ގައެވެ. އެ މެޗަށް މިދެޓީމް ނިކުތް ކަމުގައި ވިޔަސް، އެ ދެޓީމް މިހާރު ވަނީ މުބާރާތުން ކަޓައިފައެވެ.